2 Mose 35:1-35
35 Pee se ɔ, Mose bua Israel asafo ɔ tsuo nya, nɛ e de mɛ ke: “Níhi nɛ Yehowa fã ke waa pee ji nɛ ɔ nɛ:
2 Nyɛ tsu ní ligbi ekpa, se ligbi kpaagone ɔ maa pee ligbi klɔuklɔu ha nyɛ, e ji hejɔɔmi ligbi nɛ nyɛɛ kɛ maa jɔɔ nyɛ he kulaa kɛ ha Yehowa. Nɔ fɛɛ nɔ nɛ e ma tsu ní ngɛ jamɛ a ligbi ɔ nɔ ɔ, á gbe lɛ.
3 Nyɛ ko slɛ la ngɛ nyɛ hi he ɔmɛ ngɛ Hejɔɔmi Ligbi ɔ nɔ.”
4 Jehanɛ ɔ, Mose de Israel asafo ɔ tsuo ke: “Nɔ́ nɛ Yehowa fã ke waa pee ji nɛ ɔ nɛ,
5 ‘Nyɛɛ ngɔ níhi nɛ nyɛ ngɛ ɔ eko kɛ ba ke Yehowa. Nɔ fɛɛ nɔ nɛ e tsui suɔ ɔ, é ba ke Yehowa ní: sika tsu, sika hiɔ, akɔblee,
6 kpã bluu, lohwe he bwɔmi nɛ hɛɛ alamua tu su,* bo tsutsu, klala kpakpa, apletsi he bwɔmi,
7 agbosu he womihi nɛ a wo lɛ tsopa tsutsu, pa mi gbe he womihi, akasia tso,
8 nu nɛ a kɛ maa wo kane ɔmɛ a mi, balsam nɛ a kɛ maa pee nɔ pɔmi nu, kɛ tsopa kɛ e he via,
9 oniks* tɛhi, kɛ tɛ kpahi nɛ a maa ma ngɛ efɔd ɔ kɛ gugue nɔ hami nɔ́ ɔ nɔ.
10 “‘Nguɛ nya ní tsuli ɔmɛ* tsuo nɛ a ngɛ nyɛ kpɛti ɔ, a ba nɛ a ba pee nɔ́ fɛɛ nɔ́ nɛ Yehowa fã ke a pee ɔ;
11 bo tsu ɔ kɛ e he níhi tsuo, e he hami nɔ́ ɔ, e gbowe ɔmɛ, e si mami tso ɔmɛ, e mi biami tso ɔmɛ, e titima amɛ, kɛ nɔ dami ní ɔmɛ;
12 Daka a kɛ e tso ɔmɛ, nya nɔ́ ɔ, kɛ tsu mi pomi bo nɛ a kɛ maa tsi níhi a hɛ mi ɔ;
13 okplɔɔ ɔ kɛ e tso ɔmɛ kɛ e he ní ɔmɛ tsuo kɛ hɛ mi mami abolo ɔ;
14 kane tso ɔ nɛ a kɛ kane ɔ maa ma nɔ ɔ kɛ e he ní ɔmɛ kɛ e kane ɔmɛ, kɛ nu nɛ a kɛ maa wo kane ɔmɛ a mi ɔ;
15 afɔle sami la tɛ nɛ a kɛ maa sã tsopa kɛ e he via a kɛ e tso ɔmɛ; nɔ pɔmi nu ɔ kɛ tsopa kɛ e he via a; patesia* nɛ a kɛ maa wo bo tsu ɔ nya a;
16 afɔle sami la tɛ nɛ a maa sã sami afɔle ngɛ nɔ ɔ, kɛ e we lo tsukɔmi dade nɛ a kɛ akɔblee pee ɔ, e tso ɔmɛ kɛ e he ní ɔmɛ tsuo; e kã a kɛ nɔ́ nɛ a kɛ kã a maa ma nɔ ɔ;
17 bohi nɛ a ma kpla si ngɛ yale ɔ he ɔ, e titima amɛ kɛ nɔ dami ní ɔmɛ; patesia* nɛ a kɛ maa wo yale ɔ nya a;
18 bo tsu ɔ plɛɛko ɔmɛ, kɛ yale ɔ plɛɛko ɔmɛ kɛ a kpã amɛ;
19 tadehi nɛ a lo saminyawiiwi nɛ a kɛ ma sɔmɔ ngɛ jami he ɔ, osɔfo Aaron tade klɔuklɔu ɔmɛ, kɛ e bimɛ ɔmɛ a tadehi nɛ a kɛ ma sɔmɔ kaa osɔfohi ɔ.’”
20 Enɛ ɔ he ɔ, Israel asafo ɔ tsuo je Mose hɛ mi kɛ ho.
21 Kɛkɛ nɛ nihi tsuo nɛ e ta a tsui he ɔ ngɔ a nike ní ɔmɛ kɛ ba ha Yehowa konɛ a kɛ pee bo tsu ɔ, kɛ níhi tsuo nɛ a kɛ ma sɔmɔ ngɛ lejɛ ɔ, kɛ tade klɔuklɔu ɔmɛ.
22 A ya nɔ nɛ a kɛ ní ɔmɛ ba, nyumuhi kɛ yihi tsuo je a tsui mi nɛ a ngɔ gahi nɛ a maa ngɛ tade gugue nɔ, tue nya níhi, nguɛ níhi, kɛ june ní kpahi kɛ sika tsu ní slɔɔtoslɔɔtohi tsuo kɛ ba. Mɛ tsuo a ngɔ a sika tsu afɔle ɔmɛ* kɛ ba ha Yehowa.
23 Nɛ nihi tsuo nɛ a ngɛ kpã bluu, lohwe he bwɔmi nɛ hɛɛ alamua tu su, bo tsutsu, klala kpakpa, apletsi he bwɔmi, agbosu he womihi nɛ a wo lɛ tsopa tsutsu, kɛ pa mi gbe he womihi ɔ ngɔ kɛ ba.
24 Nihi tsuo nɛ a ngɛ sika hiɔ kɛ akɔblee ɔ ngɔ kɛ ba ke Yehowa, nɛ nihi tsuo nɛ a ngɛ akasia tso nɛ a kɛ ma nyɛ ma tsu ní tsumi ɔ eko ɔ hu ngɔ kɛ ba.
25 Yihi tsuo nɛ a le nguɛ nya ní tsumi ɔ ngɔ a nine kɛ lo níhi, nɛ a ngɔ níhi nɛ a lo ɔ kɛ ba: kpã bluu, lohwe he bwɔmi nɛ hɛɛ alamua tu su, bo tsutsu, kɛ klala kpakpa.
26 Yihi tsuo nɛ a le nguɛ nya ní tsumi ɔ je a tsui mi nɛ a ngɔ apletsi he bwɔmi kɛ tslɔ kpa.
27 Ganɔ ɔmɛ ngɔ oniks tɛhi kɛ tɛ kpahi nɛ a maa ma ngɛ efɔd ɔ kɛ gugue nɔ hami nɔ́ ɔ nɔ,
28 kɛ balsam nu, kɛ nu nɛ a kɛ maa wo kane ɔmɛ a mi, kɛ nɔ́ nɛ a kɛ maa pee nɔ pɔmi nu, kɛ nɔ́ nɛ a kɛ maa pee tsopa kɛ e he via a kɛ ba.
29 Nyumuhi kɛ yihi tsuo nɛ a tsui suɔ ɔ ngɔ níhi kɛ ba konɛ a kɛ ba tsu ní tsumi nɛ Yehowa fã Mose kaa a tsu ɔ; Israel bi ɔmɛ je a tsui mi faa nɛ a kɛ ní nɛ ɔmɛ ba sã afɔle ha Yehowa.
30 Kɛkɛ nɛ Mose de Israel bi ɔmɛ ke: “Hyɛ, Yehowa hla Bezalel, nɛ ji Hur binyumu Uri bi ɔ kɛ je Yuda wɛtso ɔ mi.
31 Mawu ngɔ e mumi ɔ kɛ wo e mi, nɛ e ha lɛ juɛmi, nɔ́ sisi numi, kɛ nile nɛ́ ma ha nɛ e tsu ga ní tsumi slɔɔtohi tsuo,
32 konɛ e le ní tɛnimi, nɛ e pee sika tsu, sika hiɔ, kɛ akɔblee níhi,
33 nɛ́ e pee tɛhi nɛ a he jua wa he ní tsulɔ, nɛ e pee nɔ́ fɛɛ nɔ́ nɛ ga ní tsulɔ kɛ tso peeɔ ɔ.
34 E kɛ wo Bezalel tsui mi kaa e tsɔɔ ni kpahi ní tsumi ɔ, e kɛ Oholiab, nɛ ji Ahisamak nɛ e je Dan wɛtso ɔ mi ɔ binyumu ɔ.
35 E ha mɛ ga ní tsumi he nile* nɛ́ ma ha nɛ a tsu níhi tsuo nɛ ga ní tsulɔ tsuɔ ɔ, nɛ́ a ngɔ kpã bluu, lohwe he bwɔmi nɛ hɛɛ alamua tu su, bo tsutsu kɛ klala kpakpa kɛ lo níhi. Nyumu nɛ ɔmɛ ma tsu ní tsumi fɛɛ ní tsumi, kɛ ga ní tsumihi tsuo.
Sisi Ningmahi
^ “Lohwe he bwɔmi.” E ji jijɔ he bwɔmi nɛ a lo lɛ kaa kpa, nɛ a wo lɛ kɔla nɛ ji alamua tu su.
^ Aloo “shoham.”
^ Ngɛ Hebri gbi mi ɔ, “Ni nɛmɛ nɛ a tsui le ní.”
^ Aloo “tsu nya bo.”
^ Aloo “tsu nya bo.”
^ Aloo “fɔ̃mi afɔle ɔmɛ.”
^ Ngɛ Hebri gbi mi ɔ, “tsui nɛ ngɛ nile.”
