2 Mose 39:1-43
39 A ngɔ kpã bluu, lohwe he bwɔmi nɛ hɛɛ alamua tu su,* kɛ bo tsutsu kɛ pee tadehi nɛ a lo saminyawiiwi nɛ́ a kɛ ma sɔmɔ ngɛ he klɔuklɔu ɔ. A pee Aaron tade klɔuklɔu ɔmɛ kaa bɔ nɛ Yehowa fã Mose ɔ pɛpɛɛpɛ.
2 E ngɔ sika tsu, kpã bluu, lohwe he bwɔmi nɛ hɛɛ alamua tu su, bo tsutsu, kɛ klala kpakpa nɛ a lo kɛ pee efɔd ɔ.
3 A ngɔ hamle kɛ kó sika tsu nɛ e pee pɛtɛpɛtɛ, nɛ Bezalel poo lɛ kaa kpa, nɛ e lo kɛ piɛɛ kpã bluu, lohwe he bwɔmi nɛ hɛɛ alamua tu su, bo tsutsu, kɛ klala kpakpa a he kɛ wo efɔd ɔ mi.
4 A pee bo tsɔwi enyɔ kɛ fɔ e konɔ hiɛ kɛ hiɛ nɛ a kpɛ kɛ tsa efɔd ɔ nya enyɔ ɔmɛ.
5 Mlɛ mi fimi nɔ́* nɛ a lo nɛ a kɛ maa fi efɔd ɔ nɔ konɛ e muɛ* lɛ bɔ nɛ sa a hu, jamɛ a ní ɔmɛ nɔuu nɛ a kɛ pee; sika tsu, kpã bluu, lohwe he bwɔmi nɛ hɛɛ alamua tu su, bo tsutsu, kɛ klala kpakpa nɛ a lo. A pee lɛ kaa bɔ nɛ Yehowa fã Mose ɔ pɛpɛɛpɛ.
6 Lɔ ɔ se ɔ, a to oniks* tɛ ɔmɛ nɛ a sile sika tsu kɛ bɔle mɛ, nɛ a kpɛ́ Israel binyumu ɔmɛ a biɛhi ngɛ a nɔ kaa bɔ nɛ a kpɛ́ɔ nɔ́ ngɛ nɔ́ nya sɔumi nɔ́ nɔ ɔ.
7 E ma tɛ ɔmɛ ngɛ bo tsɔwi ɔmɛ nɛ a ngɛ efɔd ɔ konɔ ɔ nɔ kaa kaimi tɛhi kɛ ha Israel bi ɔmɛ kaa bɔ nɛ Yehowa fã Mose ɔ pɛpɛɛpɛ.
8 Lɔ ɔ se ɔ, e pee gugue nɔ hami nɔ́ ɔ nɛ e lo ní kɛ wo mi kaa bɔ nɛ a pee efɔd ɔ. Sika tsu, kpã bluu, lohwe he bwɔmi nɛ hɛɛ alamua tu su, bo tsutsu, kɛ klala kpakpa nɛ a lo nɛ e kɛ pee.
9 Ke a ku mi enyɔ ɔ, e kami kɛ e blimi sɔ. A pee gugue nɔ hami nɔ́ ɔ nɛ ke a ku mi enyɔ ɔ, e kami ji nine mi blimi kake, nɛ e blimi hu ji nine mi blimi kake.*
10 A to tɛhi ngɛ nɔ; tɛ ɔmɛ ngɛ zã eywiɛ mi. Kekle zã a mi tɛ ɔmɛ ji rubi, topaz, kɛ emerald.
11 Zã enyɔne ɔ mi tɛ ɔmɛ ji tɛkuɔis, safiro, kɛ yaspi.
12 Zã etɛne ɔ mi tɛ ɔmɛ ji leshem tɛ,* agate kɛ ametisto.
13 Zã eywiɛne ɔ mi tɛ ɔmɛ ji krisolito, oniks* kɛ yade. A ngɔ sika tsu kɛ bɔle eko fɛɛ eko he.
14 Tɛ ɔmɛ a hiɛmi kɛ Israel binyumuhi 12 ɔmɛ a biɛ ɔmɛ a hiɛmi sɔ. A kpɛ́ biɛ ɔmɛ kakaaka ngɛ tɛ ɔmɛ a nɔ kaa bɔ nɛ a kpɛ́ɔ nɔ́ ngɛ nɔ́ nya sɔumi nɔ́ nɔ ɔ. Biɛ ɔmɛ eko fɛɛ eko daa si ha wɛtso 12 ɔmɛ a kpɛti kake.
15 Lɔ ɔ se ɔ, a ngɔ sika tsu ngmingmiingmi kɛ pee kɔsɔkɔsɔ nɛ́ a tslɔ kaa kpã kɛ wo gugue nɔ hami nɔ́ ɔ nya tsuo kɛ kpe.
16 A ngɔ sika tsu kɛ pee nɔ́ tɛtlɛɛ enyɔ kɛ sika tsu ga enyɔ, nɛ a ngɔ ga enyɔ ɔmɛ kɛ wo gugue nɔ hami nɔ́ ɔ yi nɔ kɔ̃ nya enyɔ ɔmɛ a mi.
17 Lɔ ɔ se ɔ, a ngɔ sika tsu kpã enyɔ ɔmɛ kɛ hɔɔ ga enyɔ ɔmɛ nɛ a ngɛ gugue nɔ hami nɔ́ ɔ kɔ̃ nya enyɔ ɔmɛ a mi.
18 Jehanɛ ɔ, a ngɔ kpã enyɔ ɔmɛ a nya enyɔ ɔmɛ kɛ hɔ nɔ́ tɛtlɛɛ enyɔ ɔmɛ a nya, nɛ a kɛ mɛtɛ bo tsɔwi ɔ nɛ ngɛ efɔd ɔ konɔ ɔ nɔ kɛ ma e hɛ mi je.
19 Lɔ ɔ se ɔ, a ngɔ sika tsu kɛ pee ga enyɔ, nɛ a kɛ wo gugue nɔ hami nɔ́ ɔ sisi kɔ̃ nya enyɔ ɔmɛ a mi ngɛ e mi blɔ, nɛ a hɛ mi tsɔɔ efɔd ɔ.
20 Kɛkɛ nɛ a ngɔ sika tsu kɛ kpale pee ga enyɔ ngɛ efɔd ɔ hɛ mi, ngɛ mlɛ mi fimi nɔ́* nɛ a lo ɔ yi nɔ bɔɔ, ngɛ he nɛ e kɛ efɔd ɔ tsa ngɛ ɔ.
21 Nyagbe ɔ, a ngɔ kpa bluu kɛ hɔɔ gugue nɔ hami nɔ́ ɔ nya ga amɛ a mi, nɛ a kɛ muɔ efɔd ɔ nya ga amɛ, nɛ e nu gugue nɔ hami nɔ́ ɔ kɛ da si ngɛ efɔd ɔ nɔ ngɛ mlɛ mi fimi nɔ́* nɛ a lo ɔ yi nɔ, kaa bɔ nɛ Yehowa fã Mose ɔ pɛpɛɛpɛ.
22 Lɔ ɔ se ɔ, e kɛ kpã bluu ngmingmiingmi pee efɔd ɔ sisi tade klɔii nɛ kɔni be he ɔ kaa bɔ nɛ ní lolɔ loɔ ní kɛ woɔ bo mi ɔ.
23 A je kuɛ mi puɔ kɛ wo tade klɔii nɛ kɔni be he ɔ he ngɛ e kpɛti, kaa bɔ nɛ dade tade kuɛ mi ngɛ ɔ. A fia e kuɛ mi ɔ bɔ nɛ pee nɛ e ko gba.
24 Lɔ ɔ se ɔ, a lo kpã bluu, lohwe he bwɔmi nɛ hɛɛ alamua tu su, kɛ bo tsutsu kɛ bla, nɛ a kɛ pee pomegranet kɛ wo tade klɔii nɛ kɔni be he ɔ nya fiami ɔ nya.
25 A ngɔ sika tsu ngmingmiingmi kɛ pee ngmlɛhi kɛ wo pomegranet ɔmɛ a kpɛti ngɛ tade klɔii nɛ kɔni be he ɔ nya fiami ɔ nya kɛ kpe. Sika tsu ngmlɛ ɔmɛ ngɛ pomegranet ɔmɛ a kpɛti;
26 a ha nɛ ngmlɛ ɔmɛ kɛ pomegranet ɔmɛ nyɛɛ a sibi a se ngɛ tade klɔii nɛ kɔni be he nɛ a kɛ ma sɔmɔ ɔ nya fiami ɔ nya kɛ kpe, kaa bɔ nɛ Yehowa fã Mose ɔ pɛpɛɛpɛ. Ke ngmlɛ kake ba a, kɛkɛ pomegranet kake nyɛɛ se.
27 A ngɔ klala kpakpa kɛ pee tade klɔii kɛ ha Aaron kɛ e binyumu ɔmɛ,
28 nɛ a ngɔ klala kpakpa kɛ pee yi fimi nɔ́, kɛ osɔfo pɛɛ nɛ ngɛ fɛu, nɛ a ngɔ klala kpakpa nɛ a lo kɛ pee tagajami,
29 nɛ a ngɔ klala kpakpa nɛ a lo, kpã bluu, lohwe he bwɔmi nɛ hɛɛ alamua tu su, kɛ bo tsutsu, nɛ a lo mɛ kɛ bla kɛ pee mlɛ mi fimi nɔ́ ɔ, kaa bɔ nɛ Yehowa fã Mose ɔ pɛpɛɛpɛ.
30 Nyagbe ɔ, a ngɔ sika tsu ngmingmiingmi kɛ pee nɔ́ pɛtɛɛ nɛ ngɛ tsɛ̃e, nɛ ji he nɔ jɔɔmi he okadi klɔuklɔu* ɔ, nɛ a kpɛ́ ní ngɛ nɔ kaa bɔ nɛ nɔ ko ma kpɛ́ nɔ́ ngɛ nɔ́ nya sɔumi nɔ́ nɔ ɔ. A kpɛ́ ngɛ nɔ ke: “Klɔuklɔu ji Yehowa.”
31 A ngɔ kpã bluu kɛ fi lɛ kɛ wo yi fimi nɔ́ ɔ he kaa bɔ nɛ Yehowa fã Mose ɔ pɛpɛɛpɛ.
32 Lɔ ɔ he ɔ, a gbe bo tsu ɔ, nɛ ji kpe he bo tsu ɔ he ní tsumi ɔ tsuo nya, nɛ Israel bi ɔmɛ pee nɔ́ fɛɛ nɔ́ nɛ Yehowa fã Mose ɔ. A pee jã a pɛ.
33 Kɛkɛ nɛ a ngɔ bo tsu ɔ kɛ ba ha Mose, bo tsu ɔ kɛ e mi ní ɔmɛ tsuo: e gbowe ɔmɛ, e si mami tso ɔmɛ, e tso tlaatlaa amɛ, kɛ e titima amɛ kɛ e nɔ dami ní ɔmɛ;
34 e we agbosu he womihi nɛ a wo lɛ tsopa tsutsu ɔ, e pa mi gbe he womihi, tsu mi pomi bo nɛ a kɛ maa tsi níhi a hɛ mi ɔ;
35 Odase daka a, kɛ e tso ɔmɛ nɛ a hlɔ ɔ, kɛ odase daka a nya nɔ ɔ;
36 okplɔɔ ɔ, kɛ e he ní ɔmɛ tsuo kɛ hɛ mi mami abolo ɔ;
37 kane tso nɛ a kɛ sika tsu ngmingmiingmi pee ɔ, kɛ e kane ɔmɛ, kɛ kane ɔmɛ nɛ a ngɛ zã mi ɔ, kɛ kane tso ɔ he ní ɔmɛ tsuo, kɛ nu nɛ a kɛ maa wo kane ɔmɛ a mi ɔ;
38 sika tsu afɔle sami la tɛ ɔ, nɔ pɔmi nu ɔ, tsopa kɛ e he via a, bo tsu ɔ nya patesia a;*
39 akɔblee afɔle sami la tɛ ɔ kɛ e we lo tsukɔmi dade nɛ a kɛ akɔblee pee ɔ, e tso ɔmɛ, e he ní ɔmɛ tsuo, kã a, kɛ nɔ́ nɛ a kɛ kã a maa ma nɔ ɔ;
40 bo nɛ ma kpla si ngɛ yale ɔ he ɔ, yale ɔ titima amɛ kɛ a nɔ dami ní ɔmɛ, yale ɔ nya patesia a,* yale ɔ kpã amɛ kɛ e plɛɛko ɔmɛ, kɛ níhi tsuo nɛ a kɛ ma sɔmɔ ngɛ bo tsu, nɛ ji kpe he bo tsu ɔ mi ɔ;
41 tadehi nɛ a lo mɛ saminyawiiwi nɛ a kɛ ma sɔmɔ ngɛ jami he ɔ, osɔfo Aaron tade klɔuklɔu ɔmɛ, kɛ e bimɛ ɔmɛ a tadehi nɛ a kɛ ma sɔmɔ kaa osɔfohi ɔ.
42 Israel bi ɔmɛ tsu ní tsumi ɔ tsuo kaa bɔ nɛ Yehowa fã Mose ɔ pɛpɛɛpɛ.
43 Benɛ Mose ba hyɛ ní nɛ a tsu ɔ tsuo ɔ, e na kaa a pee kaa bɔ nɛ Yehowa fã a pɛpɛɛpɛ, nɛ Mose jɔɔ mɛ.
Sisi Ningmahi
^ “Lohwe he bwɔmi.” E ji jijɔ he bwɔmi nɛ a lo lɛ kaa kpa, nɛ a wo lɛ kɔla nɛ ji alamua tu su.
^ Aloo “mi mi fimi nɔ́.”
^ Aloo “mu.”
^ Aloo “shoham.”
^ Maa pee sɛntimita 22.2 (intsisi 8.75). Hyɛ Mi Tsɔɔmi Munyu B14.
^ Tɛ ko nɛ e he jua wa, se a li tɛ tutuutu nɛ e ji. E ma nyɛ maa pee kaa amber, hiakinto, opal, loo tourmaline.
^ Aloo “Shoham.”
^ Aloo “mi mi fimi nɔ́.”
^ Aloo “mi mi fimi nɔ́.”
^ Aloo “jlasi klɔuklɔu.”
^ Aloo “bo ɔ.”
^ Aloo “bo ɔ.”
