2 Mose 9:1-35
9 Lɔ ɔ he ɔ, Yehowa de Mose ke: “Yaa Farao ngɔ nɛ o ya de lɛ ke, ‘Nɔ́ nɛ Yehowa, Hebri bi ɔmɛ a Mawu ɔ de ji nɛ ɔ nɛ: “Wo ye we bi ɔmɛ blɔ kɛ ho konɛ a ya sɔmɔ mi.
2 Se ke o kplɛɛ we kaa o ma ha nɛ a ho, nɛ o ya nɔ nɛ o tsi a nya a,
3 hyɛ! Yehowa ma wo e nine nɔ ngɛ o lohwe ɔmɛ nɛ a ngɛ nga a nɔ ɔ a nɔ. Hiɔ nɛ nya wa nitsɛ maa fia okpɔngɔ ɔmɛ, teji ɔmɛ, afukpɔngɔ ɔmɛ, na amɛ, kɛ to ɔmɛ.
4 Nɛ Yehowa ma ha nɛ slɔɔto maa ba Israel bi ɔmɛ a lohwe ɔmɛ kɛ Egipt bi ɔmɛ a lohwe ɔmɛ a kpɛti kokooko, nɛ Israel bi ɔmɛ a lohwe ko lohwe ko be gboe.”’”
5 Jehanɛ se hu ɔ, Yehowa to be pɔtɛɛ ko, nɛ e de ke: “Hwɔɔ ɔ, imi Yehowa, ma pee nɔ́ nɛ ɔ ngɛ zugba a nɔ.”
6 E nɔ jena a, Yehowa pee kaa bɔ nɛ e de ɔ, nɛ Egipt bi ɔmɛ a lohwe slɔɔto ɔmɛ tsuo bɔni gbomi, se Israel bi ɔmɛ lɛɛ a lohwe kake po gbo we.
7 Benɛ Farao tsɔ e tsɔli ɔmɛ nɛ a ya bi si ɔ, hyɛ! Israel bi ɔmɛ a lohwe kake ngmelu po gbo we. Ngɛ enɛ ɔ tsuo se ɔ, Farao kplii e tsui, nɛ e ha we nɛ ni ɔmɛ nɛ́ a ho.
8 Kɛkɛ nɛ Yehowa de Mose kɛ Aaron ke: “Nyɛ piti flɔɔnɔɔ mi la zu kɛ wo nyɛ dɛ mi, nɛ́ Mose nɛ e fɔ la zu ɔ kɛ wo kɔɔhiɔ mi ngɛ Farao hɛ mi.
9 Nɛ e maa pee bunyuku ngɛ Egipt zugba a nɔ tsuo, nɛ e maa pee tslɔɔ yaya nɛ e maa fuu nimli kɛ lohwehi nɛ a ngɛ Egipt zugba a nɔ ɔ tsuo.”
10 Lɔ ɔ he ɔ, a piti flɔɔnɔɔ mi la zu nɛ a ya da Farao hɛ mi, nɛ Mose fɔ la zu ɔ kɛ wo kɔɔhiɔ mi nɛ e pee tslɔɔ yaya, nɛ e fuu nimli kɛ lohwehi tsuo.
11 Tslɔɔ ɔ he je ɔ, wɔnɔ ɔmɛ nyɛ we nɛ a da Mose hɛ mi, ejakaa tslɔɔ ɔ fuu wɔnɔ ɔmɛ kɛ Egipt bi ɔmɛ tsuo.
12 Se Yehowa ngmɛ blɔ nɛ Farao kplii e tsui, nɛ e bui mɛ tue kaa bɔ nɛ Yehowa de Mose ɔ.
13 Kɛkɛ nɛ Yehowa de Mose ke: “Tee si mɔtu mla nɛ o ya da Farao hɛ mi, nɛ o de lɛ ke, ‘Nɔ́ nɛ Yehowa, Hebri bi ɔmɛ a Mawu ɔ de ji nɛ ɔ nɛ: “Wo ye we bi ɔmɛ blɔ kɛ ho konɛ a ya sɔmɔ mi.
14 Ejakaa amlɔ nɛ ɔ, ma ngɔ haomihi kɛ ba o kɛ o sɔmɔli ɔmɛ kɛ o ma mi bi ɔmɛ nyɛ nɔ, bɔ nɛ pee nɛ o na kaa nɔ ko be nɛ e ngɛ kaa imi ngɛ zugba a nɔ tsuo.
15 Jinɛ i ko kpã ye nine mi nɛ i ko ngɔ hiɔ nɛ kpataa nɔ hɛ mi kɛ ko fia o kɛ o ma mi bi ɔmɛ momoomo. Jinɛ i ko bɛɛ nyɛ* kɛ je zugba a nɔ.
16 Se yi mi tomi tutuutu he je nɛ i ha nɛ o ngɛ wami mi ji: nɛ́ ma je ye he wami kpo kɛ tsɔɔ mo, bɔ nɛ pee nɛ ma ha nɛ a jaje ye biɛ ɔ ngɛ zugba a nɔ tsuo.
17 Anɛ loloolo ɔ, o ngɛ o he nɔ woe ngɛ ye we bi ɔmɛ a nɔ nɛ o ha we nɛ a ho lo?
18 Hwɔɔ maa pee be nɛ ɔ mi ɔ, ma ha nɛ gbiɛ ngo ngu babauu maa nɛ kɛ pue si. Gbiɛ ngo ngu nɛ eko nɛ́ kaa jã hyɛ ngɛ Egipt kɛ je be nɛ a to ma a sisi kɛ ba si amlɔ nɛ ɔ.
19 Enɛ ɔ he je ɔ, moo tsɔ konɛ a ya ngɔ o lohwe ɔmɛ tsuo kɛ nɔ́ fɛɛ nɔ́ nɛ o ngɛ ngɛ nga a nɔ ɔ kɛ ba wo tsu mi. Adesa fɛɛ adesa kɛ lohwe fɛɛ lohwe nɛ e maa tlɔ nga a nɔ nɛ́ a kɛ lɛ be we mi bae ɔ, gbiɛ ngo ngu ɔ maa nɛ kɛ pue e nɔ nɛ e ma gbo.”’”
20 Farao sɔmɔli ɔmɛ a kpɛti ni nɛmɛ nɛ a ye Yehowa munyu ɔ gbeye ɔ ngɔ a sɔmɔli ɔmɛ kɛ a lohwe ɔmɛ kɛ ba a wehi a mi amlɔ nɔuu,
21 se ni nɛmɛ nɛ a kɛ Yehowa munyu ɔ tsu we ní ɔ ngmɛɛ a sɔmɔli ɔmɛ kɛ a lohwe ɔmɛ a he ngɛ nga a nɔ.
22 Jehanɛ ɔ, Yehowa de Mose ke: “Wo o nine nɔ kɛ tsɔɔ hiɔwe, konɛ gbiɛ ngo ngu ɔ nɛ e nɛ kɛ pue Egipt zugba a tsuo nɔ. É nɛ ngɔ pue adesahi kɛ lohwehi kɛ nga nɔ tsohi tsuo nɛ a ngɛ Egipt zugba a nɔ ɔ a nɔ.”
23 Lɔ ɔ he ɔ, Mose wo e tso ɔ nɔ kɛ tsɔɔ hiɔwe, nɛ Yehowa ha nɛ hiɔwe si, nɛ gbiɛ ngo ngu kɛ la* nɛ kɛ pue zugba a nɔ, nɛ Yehowa ha nɛ gbiɛ ngo ngu ɔ ya nɔ nɛ e nɛ kɛ pue Egipt zugba a nɔ.
24 Gbiɛ ngo ngu nɛ, nɛ la kpɛ plamplam ngɛ gbiɛ ngo ngu ɔ mi. E nɛ wawɛɛ nitsɛ; eko nɛ́ kaa jã a hyɛ ngɛ zugba a nɔ kɛ je be nɛ a po Egipt ma a.
25 Gbiɛ ngo ngu ɔ gbe nɔ́ fɛɛ nɔ́ ngɛ nga a nɔ ngɛ Egipt zugba a nɔ he fɛɛ he, kɛ je adesahi a nɔ kɛ ya si lohwehi a nɔ. E kpata huhi tsuo, kɛ nga nɔ tsohi tsuo a hɛ mi.
26 Goshen zugba a nɔ, nɛ ji he nɛ Israel bi ɔmɛ ngɛ ɔ pɛ nɛ gbiɛ ngo ngu ɔ nɛ́ ngɛ.
27 Lɔ ɔ he ɔ, Farao tsɔ nɛ a ya tsɛ Mose kɛ Aaron kɛ ba nɛ e de mɛ ke: “Jehanɛ ɔ lɛɛ, i pee yayami. Dalɔ ji Yehowa, i kɛ ye ma a lɛ wa tɔ̃.
28 Mo kpa Yehowa pɛɛ konɛ hiɔwe simi ɔ kɛ gbiɛ ngo ngu ɔ se nɛ po. Kɛkɛ ɔ, ma ha nɛ nyɛ maa ho, nɛ i be nyɛ nya tsie hu.”
29 Lɔ ɔ he ɔ, Mose de lɛ ke: “Ke i je kpo ngɛ ma a mi nɔuu pɛ ɔ, ma gbɛ ye dɛ mi ngɛ Yehowa hɛ mi. Hiɔwe simi ɔ ma kpa, nɛ gbiɛ ngo ngu ɔ be nɛe hu, konɛ o na kaa Yehowa nɔ́ ji zugba a nɛ.
30 Se o kɛ o sɔmɔli ɔmɛ lɛɛ, i le momo kaa lɔ ɔ se po ɔ, nyɛ be Yehowa Mawu gbeye yee.”
31 Jehanɛ ɔ, flaks* ɔmɛ kɛ barli* ɔmɛ ku kɛ pue si, ejakaa barli ɔmɛ gba, nɛ flaks ɔmɛ hu wo mɔmɔ.
32 Se hwiit ɔmɛ kɛ spɛlt* ɔmɛ lɛɛ a ku we kɛ pue si, ejakaa a kpɛɔ se kɛ duɔ mɛ.*
33 Kɛkɛ nɛ Mose je Farao ngɔ, nɛ e je ma a mi, nɛ e ya gbɛ e dɛ mi ngɛ Yehowa hɛ mi, nɛ hiɔwe simi ɔ kɛ gbiɛ ngo ngu ɔ se po, nɛ hiɔmi ɔ kpa nɛmi ngɛ zugba a nɔ.
34 Benɛ Farao na kaa hiɔmi ɔ, gbiɛ ngo ngu ɔ, kɛ hiɔwe simi ɔ se po ɔ, e pee yayami ekohu nɛ e kɛ e sɔmɔli ɔmɛ a kplii a tsui.
35 Nɛ Farao ya nɔ nɛ e kplii e tsui, nɛ e ha we nɛ Israel bi ɔmɛ nɛ a ho, kaa bɔ nɛ Yehowa de Mose ɔ.
Sisi Ningmahi
^ Aloo “je nyɛ.”
^ E ma nyɛ maa pee oslabai nɛ nya wa.
^ Flaks ji tso ko nɛ a duɔ kɛ je blema nɛ a kɛ e mi kpã peeɔ klala.
^ E ji ngma henɔ ko.
^ E ji hwiit henɔ ko nɛ a duɔ ngɛ blema Egipt.
^ Aloo “be nɛ a kɛ duɔ mɛ ɔ kpɛɛ se.”
