Womi Enyɔne Kɛ Ya Ha Timoteo 3:1-17
3 Se ná nɛ o le enɛ ɔ, kaa ngɛ nyagbe ligbi ɔmɛ a mi ɔ, behi nɛ a mi wa nɛ a nya dami maa ye maa ba.
2 Ejakaa adesahi maa pee nihi nɛ a suɔ mɛ nitsɛmɛ a he, sika suɔli, fĩali, he nɔ woli, musu bɔli, nihi nɛ a bui a fɔli, nihi nɛ a li sina, nihi nɛ a jeɔ nɔ se,
3 nihi nɛ a nui nɔ́ he hí nɔ, nihi nɛ a hí kɛ somi ko somi, nɔ he guɛ gbeli, nihi nɛ a be he nɔ yemi, nihi nɛ a hɛ mi jɔɛ, nihi nɛ a sume nɔ́ kpakpa,
4 nɔ se blɔ tsɔɔli, nihi nɛ a peeɔ a tsui nya ní, pupuupu peeli, nihi nɛ a suɔ níhi nɛ haa nɔ bua jɔmi pe bɔ nɛ a suɔ Mawu,
5 a naa mɛ kaa Mawu jali, se a kua e mi he wami ɔ; nɛ ni nɛ ɔmɛ ɔ, je o he kɛ je a he.
6 Nimli nɛ ɔmɛ a kpɛti nɛ nyumuhi nɛ a guɔ blɔ nigii nɔ kɛ sɛɔ wehi a mi nɛ a ya sisiɔ yihi nɛ a gbɔjɔ, nɛ́ yayamihi pee tlomi ngɛ a nɔ nɛ e ngɛ mɛ gbee, nɛ́ akɔnɔ slɔɔtohi ngɛ mɛ kudɔe ɔ teɔ si ngɛ,
7 be fɛɛ be ɔ, a ngɛ ní kasee, se kɛ̃ ɔ, a nyɛ we nɛ a ná anɔkuale ɔ he nile nitsɛnitsɛ.
8 Jehanɛ ɔ, kaa bɔ nɛ Yane kɛ Yambre te si kɛ wo Mose ɔ, jã nɔuu kɛ̃ nɛ ni nɛ ɔmɛ hu yaa nɔ nɛ a teɔ si kɛ woɔ anɔkuale ɔ. Kikɛmɛ a nimli nɛ ɔmɛ a juɛmi puɛ kulaa, nɛ se nami ko be a he ngɛ hemi kɛ yemi ɔ blɔ fa mi.
9 Se kɛ̃ ɔ, a be a hɛ mi yae hu, ejakaa nihi tsuo maa na a biɛɛmi* ɔ heii, kaa bɔ nɛ e ba ngɛ jamɛ a nyumu enyɔ ɔmɛ a blɔ fa mi ɔ.
10 Se moo lɛɛ o nyɛɛ ní nɛ ɔmɛ a se haa: ye tsɔɔmi ɔ, ye je mi bami ɔ, ye yi mi tomi ɔ, ye hemi kɛ yemi ɔ, ye tsui si tomi ɔ, ye suɔmi ɔ, ye si fimi ɔ,
11 yi mi nɛ a wa mi kɛ amanehluhi nɛ i na a, kaa ní nɛmɛ nɛ i na ngɛ Antiokia, ngɛ Ikoniom, ngɛ Listra a. I fĩ si ngɛ yi mi wami nɛ ɔmɛ a mi, nɛ Nyɔmtsɛ ɔ je mi kɛ je mɛ tsuo a mi.
12 Ngɛ anɔkuale mi ɔ, nihi tsuo nɛ a suɔ wawɛɛ kaa a maa hi si ngɛ Mawu gbeye yemi nya ngɛ Kristo Yesu mi ɔ, mɛ hu a maa wa mɛ yi mi.
13 Se nimli yayamihi kɛ nɔ sisili maa hi a hɛ mi yae ngɛ yayami peemi mi wawɛɛ, nɛ a maa hi nihi sisie nɛ nihi hu maa hi mɛ sisie.
14 Se moo lɛɛ, níhi nɛ o kase nɛ a plɛ o yi mi nɛ o he ye ɔ, yaa nɔ ngɛ a mi, ejakaa o le nihi nɛ o kase jamɛ a ní ɔmɛ ngɛ a ngɔ ɔ,
15 nɛ kɛ je o bimwɔyo mi tɔɔ nɛ o le ngmami klɔuklɔu ɔmɛ, níhi nɛ ma nyɛ ma ha nɛ o pee juɛmitsɛ konɛ a he o yi wami kɛ gu hemi kɛ yemi ngɛ Kristo Yesu mi ɔ nɔ ɔ.
16 Ngmami ɔ tsuo je Mawu mumi mi nɛ se nami ngɛ he kɛ ha ní tsɔɔmi, kɛ ha hɛ mi kami, kɛ ha níhi a dlami tlɔmɔɔ, kɛ ha tsɔsemi ngɛ dami mi,
17 bɔ nɛ pee nɛ Mawu nɔmlɔ ɔ he nɛ su saminya, nɛ a dla lɛ kɛ pi si kɛ ha ní tsumi kpakpa fɛɛ ní tsumi kpakpa.
Sisi Ningmahi
^ Aloo “kuasia jemi.”
