Yohane Womi Enyɔne ɔ 1:1-13
1 Nyumu nɔkɔtɔma* a kɛ ya ha alua nɛ a hla lɛ ɔ kɛ e bimɛ ɔmɛ, nihi nɛ i suɔ mɛ nitsɛnitsɛ, nɛ pi imi pɛ, mohu ɔ, nihi tsuo nɛ a ba le anɔkuale ɔ,
2 ejakaa anɔkuale ɔ ngɛ wa mi nɛ e kɛ wɔ maa hi si kɛ maa ya neneene.
3 Dloomi, mɔbɔ nami, kɛ tue mi jɔmi nɛ je Mawu nɛ ji Tsɛ ɔ ngɔ, kɛ Yesu Kristo nɛ ji Tsɛ ɔ Bi ɔ ngɔ ɔ kɛ wɔ nɛ hi si ngɛ anɔkuale kɛ suɔmi mi.
4 Ye bua jɔ wawɛɛ nitsɛ, ejakaa i na o bimɛ ɔmɛ a ti ni komɛ nɛ a ngɛ nyɛɛe ngɛ anɔkuale ɔ nya kaa bɔ nɛ Tsɛ ɔ wo wɔ kita a.
5 Enɛ ɔ he ɔ, amlɔ nɛ ɔ, alua, i ngɛ mo pɛɛ kpae kaa waa suɔ wa sibi. (Pi kita ehe ko nɛ i ngɛ mo ngmae, mohu ɔ, nɔ́ nɛ wa ná kɛ je sisije ɔ.)
6 Nɛ enɛ ɔ ji suɔmi ɔ nɛ, kaa wa maa ya nɔ maa nyɛɛ ngɛ e kita amɛ a nya. Kita a ji, kaa bɔ nɛ nyɛ nu kɛ je sisije ɔ, e sa nɛ nyɛɛ ya nɔ nɛ nyɛɛ nyɛɛ ngɛ nya.
7 Ejakaa nɔ sisili fuu ba je ɔ mi, nihi nɛ a jaje we kaa Yesu Kristo ba ngɛ he lo mi ɔ. Nɔ nɛ ɔ ji nɔ sisilɔ kɛ antikristo ɔ nɛ.
8 Nyɛɛ hyɛ nyɛ nitsɛmɛ nyɛ he nɔ saminya, konɛ nɔ́ nɛ wa gbo dengme kɛ ná a nɛ ko bɔ nyɛ, mohu ɔ, nyɛ nine nɛ su hiɔwo ɔ tsuo nɔ.
9 Nɔ fɛɛ nɔ nɛ e jeɔ Kristo tsɔɔmi ɔ se nɛ e hí si ngɛ mi ɔ be Mawu. Nɔ fɛɛ nɔ nɛ e hiɔ tsɔɔmi nɛ ɔ mi ɔ ngɛ Tsɛ ɔ kɛ Bi ɔ tsuo.
10 Ke nɔ ko ba nyɛ ngɔ nɛ pi tsɔɔmi nɛ ɔ nɛ e kɛ ba a, nyɛ ko ngɔ lɛ kɛ ya nyɛ we mi, nɛ nyɛ ko fɔ lɛ hulɔ.
11 Ejakaa nɔ nɛ e ma fɔ lɛ ɔ, e kɛ lɛ pee kake ngɛ e ní tsumi yayami ɔmɛ a mi.
12 E ngɛ mi kaa i ngɛ níhi fuu nɛ ma ngma nyɛ mohu lɛɛ, se i sume nɛ ma ngɔ womi kɛ ní ngmami nyu kɛ pee jã, mohu ɔ, i ngɛ blɔ hyɛe kaa ma ba nyɛ ngɔ konɛ i kɛ nyɛ nɛ ba tu munyu hɛ mi kɛ hɛ mi, bɔ nɛ pee nɛ nyɛ bua jɔmi ɔ nɛ pi si.
13 O nyɛmiyo ɔ nɛ a hla lɛ ɔ bimɛ ɔmɛ ke a biɔ mo.
Sisi Ningmahi
^ Aloo “Nɔkɔtɔma a.”
