3 Mose 14:1-57
14 Yehowa ya nɔ nɛ e kɛ Mose tu munyu nɛ e de lɛ ke:
2 “Ke a kɛ kpititsɛ ko maa ba osɔfo ɔ ngɔ ɔ, mlaa nɛ́ osɔfo ɔ kɛ ma tsu ní ngɛ ligbi nɛ a maa tsɔɔ kaa e he tsɔ ɔ nɔ ji nɛ ɔ nɛ.
3 Osɔfo ɔ nɛ ya sito he ɔ se nɛ e ya hyɛ lɛ. Ke kpititsɛ ɔ kpiti ɔ jɔ ɔ,
4 osɔfo ɔ nɛ fã lɛ nɛ e ngɔ lohwe pɛlitsɛmɛ hɛ ngmengmlee enyɔ nɛ a he tsɔ, kɛ seda tso, kɛ bo tsutsu, kɛ hisopo kɛ ba nɛ́ a kɛ tsu e he ha lɛ.
5 Osɔfo ɔ nɛ fã nɛ a gbe lohwe pɛlitsɛ ɔ kake ngɛ zu buɛ nɛ pa mi nyu ngɛ mi ɔ nya.
6 Se é ngɔ lohwe pɛlitsɛ hɛngmengmletsɛ ɔ, kɛ seda tso ɔ, kɛ bo tsutsu ɔ, kɛ hisopo ɔ, nɛ́ e ngɔ mɛ tsuo kɛ wo pa mi nyu nɛ a gbe lohwe pɛlitsɛ ɔ ngɛ nɔ ɔ mi.
7 Jehanɛ ɔ, é fĩa nyu ɔ kɛ pue nɔ nɛ ngɛ e he tsue ngɛ kpiti ɔ he ɔ nɔ si kpaago nɛ́ e ha nɛ a le kaa e he tsɔ, nɛ́ e ngmɛɛ lohwe pɛlitsɛ hɛngmengmletsɛ ɔ he nɛ e te kɛ ho nga mi ya.
8 “Nɔ nɛ ngɛ e he tsue ɔ nɛ e fɔ e tade ɔmɛ a he, nɛ́ e sɛ e he bwɔmi tsuo nɛ e ngɔ nyu kɛ du e he, kɛkɛ ɔ, e he ma tsɔ. Lɔ ɔ se ɔ, e ma nyɛ maa ba sito he ɔ, se e hi e bo tsu ɔ se ligbi kpaago.
9 Ngɛ ligbi kpaagone ɔ nɔ ɔ, é sɛ e yi bwɔmi, kɛ e kpɛni, kɛ e hɛngmɛ se bwɔmi tsuo. Ke e sɛ e he bwɔmi ɔ tsuo ta a, é fɔ e tade ɔmɛ a he, nɛ́ e ngɔ nyu kɛ du e he, kɛkɛ ɔ, e he ma tsɔ.
10 “Ngɛ ligbi kpaanyɔne ɔ nɔ ɔ, é ngɔ agbosu wayoo enyɔ nɛ kpa ko be a he, kɛ jijɔ yo wayoo nɛ kpa ko be e he nɛ e ye jeha kake, kɛ mamu bukɔbukɔ nɛ a kɛ nu futu mi lita ekpa kɛ fa* kɛ ba kaa ngma* afɔle, nɛ́ e ngɔ nu lita mi dlami etɛ mi kake* kɛ piɛɛ he.
11 Osɔfo ɔ nɛ e ha nɛ a le kaa nɔ ɔ he tsɔ ɔ nɛ́ e ngɔ nɔ nɛ ngɛ e he tsue ɔ kɛ níhi nɛ a kɛ maa sã afɔle ɔ kɛ ba Yehowa hɛ mi ngɛ kpe he bo tsu ɔ nya.
12 Osɔfo ɔ nɛ ngɔ agbosu wayoo enyɔ ɔmɛ a kpɛti kake kɛ nu lita mi dlami etɛ mi kake ɔ, nɛ́ e kɛ sã fɔ yemi afɔle, nɛ́ e fɔ̃ kɛ ya kɛ ba kaa fɔ̃mi afɔle ngɛ Yehowa hɛ mi.
13 Jehanɛ ɔ, é gbe agbosu wayoo ɔ ngɛ he nɛ a pɔɔ lohwe nɛ a kɛ sãã yayami afɔle kɛ sami afɔle ɔ gbemi ngɛ ɔ, ngɛ he ko nɛ ngɛ klɔuklɔu, ejakaa fɔ yemi afɔle ɔ peeɔ osɔfo ɔ nɔ́, kaa bɔ nɛ yayami afɔle ɔ hu ji e nɔ́ ɔ. E ji nɔ́ ko nɛ ngɛ klɔuklɔu pe kulaa.
14 “Jehanɛ ɔ, osɔfo ɔ nɛ ngɔ lohwe nɛ a kɛ sã fɔ yemi afɔle ɔ muɔ ɔ eko kɛ kpa nɔ nɛ ngɛ e he tsue ɔ hiɔ nɔ tue ɔ nya, nɛ e ngɔ eko kɛ kpa e hiɔ nine nguɛ gɔleku ɔ he, nɛ́ e ngɔ eko kɛ kpa e hiɔ nane nguɛ gɔleku ɔ hu he.
15 Osɔfo ɔ nɛ ngɔ nu lita mi dlami etɛ mi kake ɔ nɛ e plɛ eko kɛ wo lɛ nitsɛ e muɔ dɛ kɔkɔ mi.
16 Jehanɛ ɔ, osɔfo ɔ nɛ ngɔ e hiɔ nine nguɛ kɛ sɔ nu nɛ ngɛ e muɔ dɛ kɔkɔ mi ɔ mi, nɛ́ e fĩa nu ɔ si kpaago ngɛ Yehowa hɛ mi.
17 Lɔ ɔ se ɔ, osɔfo ɔ nɛ ngɔ nu nɛ piɛ ngɛ e dɛ kɔkɔ mi ɔ eko kɛ kpa nɔ nɛ ngɛ e he tsue ɔ hiɔ nɔ tue ɔ nya, nɛ e ngɔ eko kɛ kpa e hiɔ nine nguɛ gɔleku ɔ he, nɛ e ngɔ eko kɛ kpa e hiɔ nane nguɛ gɔleku ɔ hu he ngɛ hehi nɛ e kɛ fɔ yemi afɔle ɔ muɔ ɔ kpa a nɔuu.
18 Osɔfo ɔ nɛ ngɔ nu nɛ piɛ ngɛ e dɛ kɔkɔ mi ɔ kɛ pue nɔ nɛ ngɛ e he tsue ɔ yi mi, nɛ́ osɔfo ɔ nɛ kpata ha lɛ ngɛ Yehowa hɛ mi.
19 “Osɔfo ɔ nɛ sã yayami afɔle ɔ nɛ́ e kɛ kpata ha nɔ nɛ ngɛ e he tsue ɔ, nɛ lɔ ɔ se ɔ, é gbe lohwe nɛ a kɛ maa sã sami afɔle ɔ.
20 Osɔfo ɔ nɛ sã sami afɔle ɔ kɛ ngma afɔle ɔ ngɛ afɔle sami la tɛ ɔ nɔ nɛ́ e kɛ kpata ha lɛ, kɛkɛ ɔ, e he ma tsɔ.
21 “Se ke ohiatsɛ ji lɛ nɛ e be nɔ́ ko tsɔ ɔ, lɛɛ é ngɔ agbosu wayoo kake kɛ ba kaa fɔ yemi afɔle nɛ́ a fɔ̃ kɛ ya kɛ ba, nɛ a kɛ kpata ha lɛ. É ngɔ mamu bukɔbukɔ lita enyɔ* nɛ a kɛ nu lita mi dlami etɛ mi kake futu mi,
22 kɛ lahuɛ* enyɔ aloo beleku lahuɛ bimɛ enyɔ kɛ ba. E ngɔ nɔ́ nɛ e ma nyɛ ma ha kɛ ba. A kɛ kake maa sã yayami afɔle, nɛ a kɛ kake ɔ hu maa sã sami afɔle.
23 Ngɛ ligbi kpaanyɔne ɔ nɔ ɔ, é ngɔ ní ɔmɛ kɛ ba ha osɔfo ɔ ngɛ kpe he bo tsu ɔ nya ngɛ Yehowa hɛ mi konɛ osɔfo ɔ nɛ ngɔ kɛ tsu e he ha lɛ.
24 “Osɔfo ɔ nɛ ngɔ agbosu wayoo nɛ a kɛ maa sã fɔ yemi afɔle ɔ kɛ nu lita mi dlami etɛ mi kake ɔ, nɛ́ e fɔ̃ kɛ ya kɛ ba kaa fɔ̃mi afɔle ngɛ Yehowa hɛ mi.
25 Jehanɛ ɔ, osɔfo ɔ nɛ e gbe agbosu wayoo nɛ a kɛ maa sã fɔ yemi afɔle ɔ, nɛ́ e ngɔ e muɔ ɔ eko kɛ kpa nɔ nɛ ngɛ e he tsue ɔ hiɔ nɔ tue ɔ nya, nɛ́ e ngɔ eko kɛ kpa e hiɔ nine nguɛ gɔleku ɔ he, nɛ́ e ngɔ eko kɛ kpa e hiɔ nane nguɛ gɔleku ɔ hu he.
26 Osɔfo ɔ nɛ e ngmɛ nu ɔ eko kɛ wo lɛ nitsɛ e muɔ dɛ kɔkɔ mi.
27 Lɔ ɔ se ɔ, e ngɔ e hiɔ nine nguɛ kɛ sɔ nu nɛ ngɛ e muɔ dɛ kɔkɔ mi ɔ mi, nɛ́ e fĩa si kpaago ngɛ Yehowa hɛ mi.
28 Osɔfo ɔ nɛ e ngɔ nu nɛ ngɛ e dɛ mi ɔ eko kɛ kpa nɔ nɛ ngɛ e he tsue ɔ hiɔ nɔ tue ɔ nya, nɛ́ e ngɔ eko kɛ kpa e hiɔ nine nguɛ gɔleku ɔ he, nɛ́ e ngɔ eko kɛ kpa e hiɔ nane nguɛ gɔleku ɔ hu he ngɛ hehi nɛ e kɛ fɔ yemi afɔle ɔ muɔ ɔ kpa a nɔuu.
29 Lɔ ɔ se ɔ, osɔfo ɔ nɛ e ngɔ nu nɛ piɛ ngɛ e dɛ mi ɔ kɛ pue nɔ nɛ ngɛ e he tsue ɔ yi mi, nɛ́ e kɛ kpata ha lɛ ngɛ Yehowa hɛ mi.
30 “É ngɔ lahuɛ* ɔ kake aloo beleku lahuɛ bi kake kɛ ba. É ngɔ nɔ́ nɛ e ma nyɛ ma ha kɛ ba.
31 É ngɔ nɔ́ nɛ e nine maa su nɔ kɛ ba. Á ngɔ kake kɛ sã yayami afɔle nɛ a ngɔ kake ɔ nɛ maa piɛ ɔ kɛ sã sami afɔle kɛ piɛɛ ngma afɔle ɔ he. Osɔfo ɔ nɛ́ kɛ kpata ha nɔ nɛ ngɛ e he tsue ɔ ngɛ Yehowa hɛ mi.
32 “Mlaa nɛ fɔɔ si ha nɔ nɛ kpiti pue lɛ se nɔ́ ko be e dɛ tsɔ nɛ e kɛ maa tsu e he ji nɛ ɔ nɛ.”
33 Kɛkɛ nɛ Yehowa de Mose kɛ Aaron ke:
34 “Ke nyɛ ya su Kanaan zugba nɛ i kɛ ngɛ nyɛ hae kaa nyɛ weto ní ɔ nɔ, nɛ i ngmɛ blɔ nɛ kpiti pue we ko he ngɛ nyɛ zugba a nɔ ɔ,
35 wetsɛ ɔ nɛ ba de osɔfo ɔ ke, ‘Nɔ́ ko fu ja ngɛ ye we ɔ he kaa hiɔ yaya.’
36 Osɔfo ɔ nɛ e fã nɛ a je níhi nɛ a ngɛ we ɔ mi ɔ kpo loko e ba hyɛ nɔ́ ɔ, ke pi jã a, e ma de ke níhi nɛ a ngɛ we ɔ mi ɔ tsuo he tsɔ we. Lɔ ɔ se ɔ, osɔfo ɔ nɛ ba we ɔ mi nɛ e ba hyɛ we ɔ.
37 É hyɛ nɔ́ nɛ fu ja a, nɛ ke we ɔ gbogbo ɔmɛ a he pee kaa kungwɔ zɔ su nɛ́ ba mumu su bɔɔ ngɛ mi, aloo a pee tsutsu nɛ lejɛ ɔ nɔ mi ɔ,
38 osɔfo ɔ nɛ je kpo ngɛ we ɔ mi kɛ ya we ɔ agbo ɔ nya nɛ e nga we ɔ nya ligbi kpaago.
39 “Ligbi kpaagone ɔ nɔ ɔ, osɔfo ɔ nɛ kpale nɛ e ya hyɛ we ɔ. Ke nɔ́ nɛ fu ja a ha si ngɛ gbogbo ɔmɛ a he ɔ,
40 osɔfo ɔ nɛ fã nɛ a kpɔ tɛhi nɛ́ nɔ́ ɔ fu ja ngɛ a he ɔ, nɛ́ a ya sake ngɔ pue ma a se he ko nɛ he tsɔ we.
41 Osɔfo ɔ nɛ ha nɛ a ngmla gbogbo ɔmɛ a he saminya, nɛ́ a ngɔ zu ɔ kɛ ya pue ma a se ngɛ he ko nɛ he tsɔ we.
42 Lɔ ɔ se ɔ, á ngɔ tɛ kpahi kɛ wo he nɛ a je tɛ ɔmɛ ngɛ ɔ, nɛ́ e ha nɛ a ngɔ zu kpa kɛ sá we ɔ he.
43 Ke a je tɛ ɔmɛ ngɛ gbogbo ɔmɛ a mi, nɛ a ngmla zu nɛ a kɛ sá gbogbo ɔmɛ a he, nɛ a kpale sá we ɔ he, se kɛ̃ ɔ, nɔ́ nɛ fu ja a kpale ba ekohu ɔ,
44 lɛɛ osɔfo ɔ nɛ e ya we ɔ mi nɛ e ya hyɛ. Ke nɔ́ nɛ fu ja a ha si ngɛ we ɔ mi ɔ, lɛɛ kpiti nɛ sãã nɔ nɛ sɛ we ɔ mi ɔ nɛ. We ɔ he tsɔ we.
45 É ha nɛ a hule we ɔ kɛ pue si, nɛ á muɔɔ tɛ ɔmɛ, tso ɔmɛ kɛ zu nɛ a kɛ sá we ɔ he ɔ tsuo, nɛ́ a kɛ ho ma a se ya nɛ a kɛ ya pue he ko nɛ he tsɔ we.
46 Nɔ fɛɛ nɔ nɛ e maa sɛ we ɔ mi be mi nɛ a nga we ɔ nya a, e he be tsɔe kɛ yaa si gbɔkuɛ.
47 Nɔ fɛɛ nɔ nɛ e maa hwɔ we ɔ mi ɔ, é fɔ e tade ɔmɛ a he, nɛ nɔ fɛɛ nɔ nɛ e maa ye ní ngɛ we ɔ mi ɔ, é fɔ e tade ɔmɛ a he.
48 “Se ke a sá we ɔ he ekohu nɛ lɔ ɔ se ɔ, osɔfo ɔ ba nɛ e ba na kaa nɔ́ nɛ fu ja a kpale we kɛ bɛ ɔ, osɔfo ɔ nɛ e ha nɛ a le kaa we ɔ he tsɔ, ejakaa nɔ́ nɛ fu ja a je.
49 É ngɔ lohwe pɛlitsɛmɛ enyɔ, seda tso, bo tsutsu, kɛ hisopo kɛ tsu we ɔ he akɛnɛ we ɔ he tsɔ we ɔ he je.*
50 Osɔfo ɔ nɛ gbe lohwe pɛlitsɛ ɔ kake ngɛ zu buɛ nɛ pa mi nyu ngɛ mi ɔ nya.
51 Lɔ ɔ se ɔ, é ngɔ seda tso ɔ, kɛ hisopo ɔ, kɛ bo tsutsu ɔ, kɛ lohwe pɛlitsɛ hɛngmengmletsɛ ɔ tsuo kɛ sɔ lohwe pɛlitsɛ nɛ a gbe ngɛ pa mi nyu ɔ nɔ ɔ muɔ ɔ mi, nɛ́ e kɛ fĩa we ɔ he si kpaago.
52 É ngɔ lohwe pɛlitsɛ ɔ muɔ ɔ, pa mi nyu ɔ, lohwe pɛlitsɛ hɛngmengmletsɛ ɔ, seda tso ɔ, hisopo ɔ, kɛ bo tsutsu ɔ kɛ tsu we ɔ he akɛnɛ we ɔ he tsɔ we ɔ he je.*
53 Jehanɛ ɔ, e ngɔ lohwe pɛlitsɛ hɛngmengmletsɛ ɔ kɛ ya ma a se nɛ e ya ngmɛɛ e he nɛ e sɛ nga, nɛ́ e kɛ kpata ha we ɔ nɛ we ɔ he nɛ tsɔ.
54 “Mlaa nɛ ɔ fɔɔ si ha he womi nɔ hiɔhi tsuo, yi sisi hiɔ aloo kpɛni bwɔmi hiɔ,
55 kpiti nɛ pue ɔ tade loo we he,
56 kɛ nɔfu nɔ́, kɛ nɔ́ ko nɛ ngɛ kaa pa nɛ e hɛ mi gbli, kɛ loholoho ji nɛ ɔ nɛ,
57 bɔ nɛ pee nɛ a le ke ji nɔ́ ko he tsɔ we aloo e he tsɔ. Kpiti he mlaa ji nɛ ɔ nɛ.”
Sisi Ningmahi
^ Ngɛ Hebri gbi mi ɔ, “susumi nɔ́ nɛ ji efa a mi dlami nyɔngma mi etɛ (kwat 6).” Hyɛ Mi Tsɔɔmi Munyu B14.
^ Ngma nɛ a ngɛ tsɔɔe ngɛ hiɛ ɔ ji hwiit, blɛfo kɛ a henɔ ɔmɛ.
^ Ngɛ Hebri gbi mi ɔ, “Log susumi nɔ́ kake (pint 0.66).” Hyɛ Mi Tsɔɔmi Munyu B14.
^ Ngɛ Hebri gbi mi ɔ, “Efa mi dlami nyɔngma mi kake (kwat 2).” Hyɛ Mi Tsɔɔmi Munyu B14.
^ Aloo “agbaa loo laakue.”
^ Aloo “agbaa loo laakue.”
^ Ngɛ Hebri gbi mi ɔ, “kɛ je yayami he.”
^ Ngɛ Hebri gbi mi ɔ, “kɛ je yayami he.”
