3 Mose 18:1-30
18 Yehowa ya nɔ nɛ e kɛ Mose tu munyu nɛ e de lɛ ke:
2 “O kɛ Israel bi ɔmɛ nɛ tu munyu nɛ o de mɛ ke, ‘Imi ji Yehowa nyɛ Mawu ɔ nɛ.
3 Nyɛ ko pee nyɛ ní kaa bɔ nɛ Egipt bi nɛ nyɛ ya hi a zugba a nɔ ɔ peeɔ a ní ɔ, nɛ nyɛ ko pee nyɛ ní kaa bɔ nɛ Kanaan bi nɛ i kɛ nyɛ yaa a zugba a nɔ ɔ hu peeɔ a ní ɔ, nɛ nyɛ ko kase a kusumi ɔmɛ hulɔ.
4 Nyɛɛ ye ye fami ɔmɛ a nɔ, nɛ nyɛɛ ye ye mlaa amɛ hu a nɔ nɛ nyɛɛ nyɛɛ ngɛ a nya. Imi ji Yehowa nyɛ Mawu ɔ nɛ.
5 Nyɛɛ ye ye mlaa amɛ kɛ ye fami ɔmɛ a nɔ; nɔ fɛɛ nɔ nɛ e maa pee jã a, e yi ma ná wami. Imi ji Yehowa.
6 “‘Nyɛ ti nɔ ko nɔ ko nɛ ko ya e weku no tutuutu he nɛ e kɛ lɛ ya ná bɔmi.* Imi ji Yehowa.
7 O kɛ o tsɛ nɛ kó ná bɔmi, nɛ o kɛ o nyɛ nɛ kó ná bɔmi. O nyɛ ji lɛ, lɔ ɔ he ɔ, o kɛ lɛ nɛ kó ná bɔmi.
8 “‘O kɛ o tsɛ yo nɛ kó ná bɔmi. E ji hɛ mi si puemi ha o tsɛ ɔ.*
9 “‘O kɛ o nyɛmiyo nɛ kó ná bɔmi, o tsɛ biyo jio, o nyɛ biyo jio, a fɔ o kɛ lɛ ngɛ we kake mi jio, a fɔ lɛ ngɛ we kpa mi jio.
10 “‘O kɛ o binyumu biyo aloo o biyo e biyo nɛ kó ná bɔmi, ejakaa e maa pee hɛ mi si puemi kɛ ha mo.
11 “‘O kɛ o tsɛ biyo nɛ e kɛ yo kpa fɔ ɔ nɛ kó ná bɔmi, ejakaa o nyɛmiyo ji lɛ.
12 “‘O kɛ o tsɛ nyɛmiyo nɛ kó ná bɔmi, ejakaa e ji o tsɛ ɔ weku no tutuutu.
13 “‘O kɛ o nyɛ nyɛmiyo nɛ kó ná bɔmi, ejakaa e ji o nyɛ ɔ weku no tutuutu.
14 “‘O kɛ o tsɛ nyɛminyumu e yo nɛ kó ná bɔmi nɛ o kɛ pue o tsɛ nyɛminyumu ɔ hɛ mi si,* ejakaa o tsɛ ɔ nyɛminyumu yo ji lɛ.
15 “‘O kɛ o binyumu e yo nɛ kó ná bɔmi. O binyumu ɔ yo ji lɛ, lɔ ɔ he ɔ, o kɛ lɛ nɛ ko ná bɔmi.
16 “‘O kɛ o nyɛminyumu e yo nɛ kó ná bɔmi, ejakaa e ji hɛ mi si puemi ha o nyɛminyumu ɔ.*
17 “‘O kɛ yo kɛ e biyo nɛ kó ná bɔmi. O kɛ e binyumu biyo kɛ e biyo biyo nɛ kó ná bɔmi. A ji e weku li tutuutu; e ji yakayaka ní peepee.*
18 “‘Koo ngɔ yo nɛ o ngɔ e nyɛmiyo hu kɛ piɛɛ he kaa e hunoyo nɛ́ o kɛ lɛ nɛ ná bɔmi be mi nɛ e nyɛmiyo ɔ ngɛ je mi.
19 “‘Ke yo ko ku nine ɔ, koo ya e he nɛ o kɛ lɛ ya ná bɔmi ejakaa e he tsɔ we.
20 “‘O kɛ nɔ kpa* e yo nɛ kó ná bɔmi, nɛ́ o ko ba wo o he mu.
21 “‘Koo ngmɛ blɔ nɛ a ngɔ o bimɛ ɔmɛ eko kɛ sã afɔle ha Molek. Koo pee jã kɛ gbe o Mawu ɔ biɛ ɔ he guɛ. Imi ji Yehowa.
22 Nyumu kɛ nyumu* nɛ kó ná bɔmi kaa bɔ nɛ nyumu kɛ yo náa bɔmi ɔ. E ji ní hiɔmi ní.
23 “‘Nyumu kɛ lohwe nɛ kó ná bɔmi nɛ e kɛ ba wo e he mu; nɛ yo nɛ ko ngɔ e he kɛ ha lohwe nɛ e kɛ lɛ nɛ ná bɔmi, ejakaa e kɛ adebɔ su kɔ we.
24 “‘Nyɛ ko pee ní nɛ ɔmɛ eko kɛ wo nyɛ he mu, ejakaa níhi nɛ je mahi nɛ i ngɛ mɛ fiee ngɛ nyɛ hɛ mi ɔ pee kɛ wo a he mu ji nɛ ɔmɛ nɛ.
25 Enɛ ɔ he ɔ, zugba a nɔ wo mu, nɛ ma ngɔ tue gblami kɛ ba e nɔ ngɛ e tɔmi ɔ he je, nɛ zugba a maa vie nihi nɛ a ngɛ e nɔ ɔ.
26 Se nyɛɛ lɛɛ, nyɛɛ ye ye mlaa amɛ kɛ ye fami ɔmɛ a nɔ. Nyɛ ti nɔ ko nɛ ko pee ní hiɔmi ní nɛ ɔmɛ eko, Israel fɔfɔɛ jio, ma se no nɛ e ngɛ nyɛ kpɛti jio.
27 Nihi nɛ a hi zugba nɛ nyɛ yaa nɔ ɔ nɔ ɔ pee ní hiɔmi ní nɛ ɔmɛ tsuo, nɛ amlɔ nɛ ɔ, zugba a nɔ wo mu.
28 Kɛkɛ ɔ, akɛnɛ nyɛ wui zugba a nɔ mu he je ɔ, zugba a be nyɛ viee kaa bɔ nɛ e maa vie mahi nɛ a ngɛ e nɔ loko nyɛ yaa a.
29 Ke nɔ ko pee ní hiɔmi ní nɛ ɔmɛ eko ɔ, á gbe jamɛ a nɔ ɔ.*
30 Nyɛɛ ye fami nɛ i fã nyɛ ɔ nɔ. Nyɛ ko kase kusumihi nɛ a hiɔ nɛ ni nɛmɛ nɛ a hi zugba a nɔ kekle ɔ pee ɔ, nɛ́ nyɛ ko ble nyɛ he. Imi ji Yehowa nyɛ Mawu ɔ nɛ.’”
Sisi Ningmahi
^ Ngɛ Hebri gbi mi ɔ, “nɛ e kpa e he bo.” Bɔ nɛ munyu nɛ ɔ tsɔɔ ngɛ hiɛmɛ nɛ ɔ kɛ he kpahi nɛ e maa je kpo ngɛ ji nɛ ɔ nɛ.
^ Ngɛ Hebri gbi mi ɔ, “E ji o tsɛ ɔ hehi nɛ e sɛ nɛ a naa.”
^ Ngɛ Hebri gbi mi ɔ, “nɛ́ o kɛ kpa o tsɛ nyɛminyumu ɔ he bo.”
^ Ngɛ Hebri gbi mi ɔ, “e ji o nyɛminyumu ɔ he bo kpami.”
^ Aloo “hɛ mi si puemi nɔ́; ajuama bɔmi ní peepee.”
^ Aloo “o huɛ; nɔ ko nɛ o kɛ lɛ bɔɔ.”
^ Ngɛ Hebri gbi mi ɔ, “O kɛ nyumu.”
^ Ngɛ Hebri gbi mi ɔ, “á po jamɛ a klaa a kɛ je e ma mi bi ɔmɛ a kpɛti.”
