3 Mose 19:1-37
-
Klɔuklɔu peemi he mlaa slɔɔtohi (1-37)
-
Blɔ kpakpa nɛ a maa gu nɔ kɛ kpa ní (9, 10)
-
E sa kaa a susu tuekpokutsɛmɛ kɛ hɛ yuyuili a he (14)
-
Nɔ he guɛ gbemi (16)
-
Koo ngɔ nɔ ko he abofu kɛ wo o mi (18)
-
Nyɛ ko tsu kunya, nɛ nyɛɛ kɛ mumi yayami ko tsu ní hulɔ (26, 31)
-
Nyɛ ko ngma ní ngɛ nyɛ he womi nɔ (28)
-
Moo bu nihi nɛ a wa (32)
-
Bɔ nɛ e sa nɛ a kɛ nihi nɛ a je ma se nɛ hi si ha (33, 34)
-
19 Yehowa ya nɔ nɛ e kɛ Mose tu munyu nɛ e de lɛ ke:
2 “O kɛ Israel asafo ɔ tsuo nɛ tu munyu nɛ o de mɛ ke, ‘Nyɛɛ pee nyɛ he klɔuklɔu, ejakaa imi Yehowa nyɛ Mawu ɔ, i ngɛ klɔuklɔu.
3 “‘Nyɛ ti nɔ fɛɛ nɔ nɛ bu e tsɛ kɛ e nyɛ,* nɛ nyɛɛ ye ye hejɔɔmi ligbi ɔmɛ. Imi ji Yehowa nyɛ Mawu ɔ nɛ.
4 Nyɛ ko je ye se nɛ nyɛ ya nyɛɛ mawuhi nɛ se nami ko be a he ɔmɛ a se, nɛ nyɛ ko pee dade amagahi hulɔ. Imi ji Yehowa nyɛ Mawu ɔ nɛ.
5 “‘Jehanɛ se hu ɔ, ke nyɛ maa sã tue mi jɔmi afɔle ha Yehowa a, nyɛɛ sã afɔle ɔ bɔ nɛ Mawu bua maa jɔ nyɛ he.
6 Ligbi nɛ nyɛ maa sã afɔle ɔ, nyɛɛ ye ngɛ jamɛ a ligbi ɔ nɔ kɛ e nɔ jena, se ke eko piɛ kɛ ya si ligbi etɛne ɔ, nyɛɛ sã ngɛ la mi.
7 Se ke nɔ ko ye eko ngɛ ligbi etɛne ɔ nɔ ɔ, e ji tɔmi, nɛ Mawu bua be he jɔe.
8 Nɔ nɛ maa ye eko ɔ maa tloo nɔ́ nɛ maa je mi kɛ ba a, ejakaa e gbe Yehowa nɔ́ klɔuklɔu he guɛ. Á gbe jamɛ a nɔ ɔ.*
9 “‘Ke nyɛ kpa nyɛ ngmɔ ní ngɛ nyɛ zugba a nɔ ɔ, nyɛ ko kpa nɔ́ nɛ ngɛ ngmɔ ɔ tue ɔ tsuo, nɛ nyɛ ko muɔɔ nɔ́ nɛ maa piɛ ngɛ ní kpami ɔ se ɔ* hulɔ.
10 Jehanɛ hu ɔ, nyɛ ko muɔɔ nyɛ wai ngmɔ ɔmɛ a nɔ́ ní nɛ maa piɛ ɔ, nɛ nyɛ ko muɔɔ wai yiblii nɛ maa gbɛ fia a hulɔ. Nyɛɛ je he kɛ ha ohiatsɛmɛ* kɛ nibwɔhi nɛ a ngɛ nyɛ kpɛti ɔ. Imi ji Yehowa nyɛ Mawu ɔ nɛ.
11 “Nyɛ ko ju, nyɛ ko sisi nɔ, nɛ nyɛɛ kɛ nyɛ sibi ko ye ngɛ blɔ nɛ dɛ nɔ.
12 Nyɛ ko ngɔ ye biɛ kɛ kã lakpa kita nɛ́ nyɛ ko ba gbe nyɛ Mawu ɔ biɛ ɔ he guɛ. Imi ji Yehowa.
13 Nyɛ ko fia nyɛ nyɛmimɛ ojo, nɛ nyɛ ko ju hulɔ. Nyɛ ko ha nɛ apaatsɛ hiɔwo nɛ tlɔ nyɛ dɛ kɛ ya si je nanɛɛ.
14 “‘Koo gbiɛ tuekpokutsɛ, nɛ koo ngɔ nɔ́ ko kɛ fɔ hɛ yuyuilɔ blɔ mi hulɔ. Moo ye o Mawu ɔ gbeye. Imi ji Yehowa.
15 Nyɛɛ ye dami sane ngɛ nyɛ kojomi mi. Nyɛ ko hyɛ ohiatsɛ hɛ mi, nɛ nyɛ ko na sikatsɛ kaa e he hia pe ni kpahi. Ke nyɛ ngɛ nyɛ nyɛmimɛ kojoe ɔ, nyɛɛ ye dami sane.
16 “‘Koo pee o he nɔ he guɛ gbelɔ kɛ hi yae kɛ hi bae ngɛ o ma mi bi ɔmɛ a kpɛti. Koo ngɔ o nyɛmi wami* kɛ wo oslaa mi.* Imi ji Yehowa.
17 “‘Koo nyɛ o nyɛmi ngɛ o tsui mi. Bɔ fɛɛ bɔ nɛ ji ɔ, kã o nyɛmi ɔ hɛ mi bɔ nɛ pee nɛ o kɛ lɛ tsuo nɛ ko tɔ̃ tɔmi kake ɔ nɔuu.
18 “‘Koo ye lue ha mo nitsɛ o he, nɛ koo ngɔ o ma mi bi ɔmɛ a he abofu kɛ wo o mi. Suɔ o nyɛmi nɔmlɔ kaa bɔ nɛ o suɔ mo nitsɛ o he ɔ. Imi ji Yehowa.
19 “‘Nyɛɛ ye ye mlaa amɛ a nɔ: Nyɛ ko ha nɛ nyɛ we mi lohwehi nɛ a kuɔ lohwe kpahi nɛ pi a henɔ nɛ a kɛ mɛ nɛ fɔ. Nyɛ ko du wu munomuno enyɔ kɛ futu ngɛ ngmɔ kake mi, nɛ nyɛ ko wo tade nɛ a kɛ kpa slɔɔto enyɔ lo kɛ futu.
20 Jehanɛ hu ɔ, ke nyumu ko kɛ yo ko ná bɔmi, nɛ yo ɔ ji mawayo nɛ a bi e si ha nɔ ko, se a kpɔ̃ we lɛ aloo e yi e he lolo ɔ, á gbla a tue, se a ko gbe mɛ nɛ a gbo, ejakaa mawayo ɔ yi e he lolo.
21 Nyumu ɔ nɛ ngɔ agbosu nɛ a kɛ maa sã fɔ yemi afɔle ba ha Yehowa ngɛ kpe he bo tsu ɔ nya.
22 Osɔfo ɔ nɛ ngɔ agbosu ɔ kɛ sã fɔ yemi afɔle ngɛ Yehowa hɛ mi konɛ e kɛ kpata ha lɛ ngɛ e yayami ɔ he je, nɛ a maa ngɔ yayami nɛ e pee ɔ kɛ ke lɛ.
23 “‘Ke nyɛ ba su zugba a nɔ nɛ nyɛ du tso nɛ woɔ yiblii ɔ, nyɛɛ bu e yiblii ɔ kaa nɔ́ ko nɛ he tsɔ we, nɛ nyɛɛ yu nyɛ he ngɛ he.* Nyɛɛ yu nyɛ he ngɛ tso ɔ he jeha etɛ. Nyɛ ko ye e yiblii.
24 Se ngɛ jeha eywiɛne ɔ mi ɔ, e yiblii ɔmɛ tsuo maa pee klɔuklɔu, nɛ e maa pee bua jɔmi be ha nyɛ ngɛ Yehowa hɛ mi.
25 Kɛkɛ ɔ, ngɛ jeha enuɔne ɔ mi ɔ, nyɛ ma nyɛ maa ngɔ e yiblii ɔ kɛ piɛɛ nyɛ ngmɔ ní nɛ nyɛ ma kpa a he nɛ nyɛɛ ye. Imi ji Yehowa nyɛ Mawu ɔ nɛ.
26 “‘Nyɛ ko ye lo ko lo ko nɛ muɔ ngɛ mi.
“‘Nyɛ ko klaa, nɛ nyɛ ko tsu kunya hulɔ.
27 “‘Nyɛ ko sɛ* nyɛ tue si bwɔmi, nɛ nyɛ ko poo nyɛ kpɛni bwɔmi nya nɛ́ nyɛ kɛ puɛ lɛ.
28 “‘Nyɛ ko poopoo nyɛ he ha kɛ ha nɔ* ko nɛ e gbo, nɛ nyɛ ko ngma ní ngɛ nyɛ he womi nɔ hulɔ. Imi ji Yehowa.
29 “‘Koo ha nɛ o biyo nɛ pee tuutuu polɔ nɛ o kɛ pue e hɛ mi si, ke pi jã a, a kɛ tuutuu pomi maa wo zugba a nɔ mu, nɛ yakayaka ní peepee ma hyi zugba a nɔ.
30 “‘Nyɛɛ ye ye hejɔɔmi ligbi ɔmɛ, nɛ nyɛɛ ngɔ bu kɛ ha ye jami he ɔ.* Imi ji Yehowa.
31 “‘Nyɛ ko ya hla yemi kɛ buami ngɛ ní peeli a ngɔ, nɛ nyɛ ko ya klaali a ngɔ hulɔ, ke pi jã a, a maa wo nyɛ he mu. Imi ji Yehowa nyɛ Mawu ɔ nɛ.
32 “‘Moo bu nɔ nɛ e yi mi puɛ mua, nɛ́ o wo nɔ nɛ bwɔ hɛ mi nyami, nɛ o ye o Mawu ɔ gbeye. Imi ji Yehowa.
33 “‘Ke ma se no kɛ mo ba ngɛ o zugba a nɔ ɔ, koo pee lɛ basabasa.
34 Ma se no nɛ e kɛ mo ngɛ o zugba a nɔ ɔ, o kɛ lɛ nɛ hi si kaa o ma mi no; ó suɔ lɛ kaa bɔ nɛ o suɔ mo nitsɛ o he ɔ, ejakaa mo hu o ya to nubwɔ ngɛ Egipt zugba a nɔ hyɛ. Imi ji Yehowa o Mawu ɔ nɛ.
35 “‘Ke nyɛ ngɛ nɔ́ ko kami loo nɔ́ ko jiɔmi, aloo nyu nɔ́ ko susue ɔ, nyɛ ko ngɔ susumi nɔ́ nɛ dɛ kɛ tsu ní.
36 Nyɛɛ ngɔ sɛnihi nɛ a da, sɛni tɛhi nɛ a da, níhi nɛ a gbli a susumi níhi nɛ a da,* kɛ níhi nɛ a kɛ susuɔ nyu níhi nɛ a da* kɛ tsu ní. Imi ji Yehowa nyɛ Mawu ɔ nɛ e je nyɛ kɛ je Egipt zugba a nɔ ɔ nɛ.
37 Lɔ ɔ he ɔ, nyɛɛ ye ye mlaa amɛ tsuo a nɔ, nɛ nyɛɛ ngɔ ye fami ɔmɛ kɛ tsu ní, nɛ nyɛɛ nyɛɛ ngɛ a nya. Imi ji Yehowa.’”
Sisi Ningmahi
^ Ngɛ Hebri gbi mi ɔ, “nɛ e ye e tsɛ kɛ e nyɛ gbeye.”
^ Ngɛ Hebri gbi mi ɔ, “á po jamɛ a klaa a kɛ je e ma mi bi ɔmɛ a kpɛti.”
^ Aloo “muɔɔ nɔ́ nɛ piɛ ɔ.”
^ Aloo “ni nɛmɛ nɛ e fĩ mɛ.”
^ Ngɛ Hebri gbi mi ɔ, “muɔ.”
^ Baiblo komɛ de ke “Ke o nyɛmi wami ya je oslaa mi ɔ, ko ma o hɛ kɛ fɔ nɔ.”
^ Ngɛ Hebri gbi mi ɔ, “nyɛɛ bu e yiblii ɔ kaa mɔmlɔtɔ.”
^ Aloo “po.”
^ Aloo “klaa.” Hebri munyungu nɛ ji ne′phesh nɛ a kɛ tsu ní ngɛ hyɛ ɔ daa si ha nɔ ko nɛ e gbo.
^ Ngɛ Hebri gbi mi ɔ, “nyɛɛ ye ye jami he ɔ gbeye.”
^ Ngɛ Hebri gbi mi ɔ, “efa nɛ da.” Hyɛ Mi Tsɔɔmi Munyu B14.
^ Ngɛ Hebri gbi mi ɔ, “hin nɛ da.” Hyɛ Mi Tsɔɔmi Munyu B14.
