3 Mose 4:1-35
-
Yayami afɔle ɔ (1-35)
4 Yehowa ya nɔ nɛ e de Mose ke:
2 “De Israel bi ɔmɛ ke, ‘Ke nɔ* ko pee níhi nɛ Yehowa fã ke a ko pee ɔ eko kɛ tɔ̃ e nɔ nɛ pi kaa e je blɔ ɔ, nɔ́ nɛ a pee ji nɛ ɔ nɛ:
3 “‘Ke osɔfo nɛ a pɔ lɛ nu ɔ pee yayami nɛ e ha nɛ ma a ye fɔ ɔ, e ngɔ na ku wayoo nɛ kpa ko be e he kɛ ba ha Yehowa kaa yayami afɔle ngɛ yayami nɛ e pee ɔ he.
4 E ngɔ na ku ɔ kɛ ba kpe he bo tso ɔ nya ngɛ Yehowa hɛ mi, nɛ e ngɔ e nine kɛ fɔ na ku ɔ yi mi nɛ e gbe na ku ɔ ngɛ Yehowa hɛ mi.
5 Jehanɛ ɔ, osɔfo nɛ a pɔ lɛ nu ɔ nɛ ngɔ na ku ɔ muɔ ɔ eko kɛ ba kpe he bo tsu ɔ mi.
6 Osɔfo ɔ nɛ ngɔ e nine nguɛ kɛ sɔ muɔ ɔ mi nɛ e fĩa muɔ ɔ eko kɛ pue si si kpaago ngɛ Yehowa hɛ mi, ngɛ tsu mi pomi bo nɛ ngɛ he klɔuklɔu ɔ hɛ mi.
7 Osɔfo ɔ nɛ e ngɔ muɔ ɔ eko kɛ kpa afɔle sami la tɛ nɛ a kɛ sãã tsopa kɛ e he via nɛ ngɛ Yehowa hɛ mi ngɛ kpe he bo tsu ɔ mi ɔ koli ɔmɛ a he, nɛ́ e plɛ na ku ɔ muɔ ɔ nɛ piɛ ɔ tsuo kɛ pue afɔle sami la tɛ nɛ a kɛ sãã sami afɔle nɛ ngɛ kpe he bo tsu ɔ nya a sisi.
8 “‘Lɔ ɔ se ɔ, é je na ku ɔ nɛ a kɛ maa sã yayami afɔle ɔ zɔ ɔ tsuo, nɛ ji zɔ nɛ ha mi ní ɔmɛ a he ɔ, kɛ zɔ nɛ ngɛ mi ní ɔmɛ a he ɔ,
9 kɛ se tso mi ngmɛ enyɔ ɔmɛ kɛ zɔ nɛ ngɛ a he ɔ. E je ko ɔ he zɔ ɔ kɛ piɛɛ se tso mi ngmɛ enyɔ ɔmɛ a he.
10 É je ní nɛ ɔmɛ kaa bɔ nɛ a peeɔ na ku nɛ a kɛ sãã tue mi jɔmi afɔle ɔ. Osɔfo ɔ nɛ e sã ngɛ afɔle sami la tɛ nɛ a sãã sami afɔle ngɛ nɔ ɔ nɔ nɛ e je la su ku.
11 “‘Se na ku ɔ he womi ɔ, kɛ e lo ɔ tsuo, kɛ e yi ɔ, kɛ e nane ɔmɛ, kɛ e mi ní ɔmɛ, kɛ e fĩ ɔ,
12 nɛ ji na ku ɔ tsuo nɛ piɛ ɔ lɛɛ, é ngɔ kɛ ya sito he ɔ se he ko nɛ tsɔ, he nɛ a plɛɔ la zu* ɔ kɛ pueɔ ɔ, nɛ é kɛ pue lɛ́ nɔ nɛ e sã. Á sã ngɛ he nɛ a kɛ la zu ɔ pueɔ ɔ.
13 “‘Jehanɛ ɔ, ke Israel ma a tsuo pee yayami nɛ pi kaa a je blɔ, se a* li kaa a pee nɔ́ ko nɛ Yehowa fã ke a ko pee nɛ lɔ ɔ ha nɛ a ye fɔ,
14 nɛ lɔ ɔ se ɔ, a ba ná le kaa a pee yayami ɔ, asafo ɔ* nɛ ngɔ na ku wayoo nɛ a kɛ maa sã yayami afɔle kɛ ba kpe he bo tsu ɔ hɛ mi.
15 Nikɔtɔmahi nɛ a ngɛ asafo ɔ mi ɔ nɛ a ngɔ a nine kɛ pue na ku ɔ yi mi ngɛ Yehowa hɛ mi, nɛ́ a gbe na ku ɔ ngɛ Yehowa hɛ mi.
16 “‘Jehanɛ ɔ, osɔfo nɛ a pɔ lɛ nu ɔ nɛ e ngɔ na ku ɔ muɔ ɔ eko kɛ ba kpe he bo tsu ɔ mi.
17 Osɔfo ɔ nɛ ngɔ e nine nguɛ kɛ sɔ muɔ ɔ mi nɛ e fĩa muɔ ɔ eko kɛ pue si si kpaago ngɛ Yehowa hɛ mi, ngɛ tsu mi pomi bo ɔ hɛ mi.
18 Jehanɛ ɔ, é ngɔ muɔ ɔ eko kɛ kpa afɔle sami la tɛ nɛ ngɛ Yehowa hɛ mi ngɛ kpe he bo tsu ɔ mi ɔ koli ɔmɛ a he, nɛ é plɛ muɔ nɛ piɛ ɔ tsuo kɛ pue afɔle sami la tɛ nɛ a kɛ sãã sami afɔle nɛ ngɛ kpe he bo tsu ɔ nya a sisi.
19 É je e zɔ ɔ tsuo nɛ e sã ngɛ afɔle sami la tɛ ɔ nɔ.
20 É pee na ku ɔ kaa bɔ nɛ e pee na ku nɛ a kɛ sã yayami afɔle ɔ. Osɔfo ɔ nɛ pee lɛ jã konɛ e kɛ kpata ha mɛ, kɛkɛ ɔ, a kɛ a he yayami ɔ maa ke mɛ.
21 É ngɔ na ku ɔ kɛ ya sito he ɔ se nɛ e ya sã na ku ɔ kaa bɔ nɛ e sã kekle nɔ́ ɔ. E ji yayami afɔle kɛ ha asafo ɔ.
22 “‘Ke ganɔ ko pee níhi nɛ Yehowa e Mawu ɔ fã ke a ko pee ɔ eko kɛ tɔ̃ e nɔ nɛ pi kaa e je blɔ, nɛ lɔ ɔ ha nɛ e ye fɔ,
23 aloo e ba ná le kaa e tɔ̃ mlaa a, lɛɛ e ngɔ akpakpo wayoo nɛ kpa ko be e he kɛ ba sã afɔle.
24 É ngɔ e nine kɛ fɔ akpakpo wayoo ɔ yi mi nɛ e gbe akpakpo ɔ ngɛ Yehowa hɛ mi ngɛ he nɛ a gbeɔ lohwe nɛ a kɛ sãã sami afɔle ɔ ngɛ ɔ. E ji yayami afɔle.
25 Osɔfo ɔ nɛ ngɔ e nine nguɛ kɛ sɔ lohwe ɔ muɔ ɔ mi nɛ e kɛ kpa afɔle sami la tɛ nɛ a kɛ sãã sami afɔle ɔ koli ɔmɛ a he, nɛ́ e plɛ muɔ nɛ piɛ ɔ kɛ pue afɔle sami la tɛ nɛ a kɛ sãã sami afɔle ɔ sisi.
26 É sã e zɔ ɔ tsuo ngɛ afɔle sami la tɛ ɔ nɔ kaa bɔ nɛ a sãã zɔ nɛ a kɛ sãã tue mi jɔmi afɔle ɔ. Osɔfo ɔ kɛ ma kpata ha lɛ ngɛ e yayami ɔ he, nɛ a kɛ maa ke lɛ.
27 “‘Ke zugba a nɔ bi ɔmɛ a kpɛti nɔ ko* pee níhi nɛ Yehowa fã ke a ko pee ɔ eko kɛ tɔ̃ e nɔ nɛ pi kaa e je blɔ, nɛ lɔ ɔ ha nɛ e ye fɔ,
28 aloo e ba ná le kaa e pee yayami ɔ, lɛɛ e ngɔ apletsi yo wayoo nɛ kpa ko be e he kɛ ba sã afɔle ngɛ yayami nɛ e pee ɔ he.
29 É ngɔ e nine kɛ fɔ lohwe nɛ a kɛ maa sã yayami afɔle ɔ yi mi, nɛ e gbe lohwe ɔ ngɛ he nɛ a gbeɔ lohwe nɛ a kɛ sãã sami afɔle ɔ ngɛ ɔ.
30 Osɔfo ɔ nɛ ngɔ e nine nguɛ kɛ sɔ muɔ ɔ mi nɛ e kɛ kpa afɔle sami la tɛ nɛ a kɛ sãã sami afɔle ɔ koli ɔmɛ a he, nɛ e plɛ muɔ nɛ piɛ ɔ tsuo kɛ pue afɔle sami la tɛ ɔ sisi.
31 É je zɔ ɔ tsuo kaa bɔ nɛ a jeɔ lohwe nɛ a kɛ sãã tue mi jɔmi afɔle ɔ zɔ ɔ, nɛ osɔfo ɔ nɛ sã ngɛ afɔle sami la tɛ ɔ nɔ kaa afɔle nɛ jeɔ via liliili* ha Yehowa. Osɔfo ɔ kɛ ma kpata ha lɛ, nɛ a kɛ e he yayami ɔ maa ke lɛ.
32 “‘Se ke jijɔ bi nɛ e kɛ maa sã yayami afɔle ɔ, lɛɛ e ngɔ jijɔ bi eyo nɛ kpa ko be e he kɛ ba.
33 É ngɔ e nine kɛ fɔ lohwe nɛ a kɛ maa sã yayami afɔle ɔ yi mi, nɛ e gbe lohwe ɔ kaa yayami afɔle ngɛ he nɛ a gbeɔ lohwe nɛ a kɛ sãã sami afɔle ɔ ngɛ ɔ.
34 Osɔfo ɔ nɛ ngɔ e nine nguɛ kɛ sɔ lohwe ɔ muɔ ɔ mi nɛ e kɛ kpa afɔle sami la tɛ nɛ a kɛ sãã sami afɔle ɔ koli ɔmɛ a he, nɛ e plɛ muɔ nɛ piɛ ɔ tsuo kɛ pue afɔle sami la tɛ ɔ sisi.
35 É je e zɔ ɔ tsuo kaa bɔ nɛ a jeɔ agbosu wayoo nɛ a kɛ sãã tue mi jɔmi afɔle ɔ zɔ ɔ, nɛ osɔfo ɔ kɛ pue afɔle nɛ a kɛ la sãã ha Yehowa a nɔ, nɛ e sã ngɛ afɔle sami la tɛ ɔ nɔ. Osɔfo ɔ nɛ e kɛ kpata ha lɛ ngɛ yayami nɛ e pee ɔ he, nɛ a kɛ maa ke lɛ.
Sisi Ningmahi
^ Aloo “klaa.”
^ Aloo “la zu nɛ zɔ pɔ lɛ.” Nɛ ji la zu nɛ lohwehi nɛ a kɛ ba sãã afɔle ɔ a zɔ pɔ lɛ.
^ E ma nyɛ maa pee kaa nikɔtɔmahi nɛ a daa si ngɛ asafo ɔ nya a.
^ E ma nyɛ maa pee kaa nikɔtɔmahi nɛ a daa si ngɛ asafo ɔ nya a.
^ Aloo “Ke klaa ko nɛ ngɛ zugba a nɔ bi ɔmɛ a kpɛti ɔ.”
^ Aloo “afɔle nɛ jɔɔ nɔ tsui he.”