3 Mose 8:1-36
-
A wo Aaron kɛ e binyumu ɔmɛ osɔfo (1-36)
8 Yehowa ya nɔ nɛ e kɛ Mose tu munyu nɛ e de lɛ ke:
2 “Ngɔɔ Aaron kɛ e binyumu ɔmɛ, tade ɔmɛ, nɔ pɔmi nu ɔ, na ku nɛ a kɛ maa sã yayami afɔle ɔ, agbosu enyɔ ɔmɛ, kɛ kɛtɛ* kɛ e mi abolo nɛ masa be mi ɔ,
3 nɛ o ha nɛ ma a tsuo nɛ a bua a he nya ngɛ kpe he bo tsu ɔ nya.”
4 Kɛkɛ nɛ Mose pee kaa bɔ nɛ Yehowa fã lɛ ɔ, nɛ ma a ba bua a he nya ngɛ kpe he bo tsu ɔ nya.
5 Jehanɛ ɔ, Mose de ma a tsuo ke: “Nɔ́ nɛ Yehowa fã ke waa pee ji nɛ ɔ nɛ.”
6 Lɔ ɔ he ɔ, Mose ngɔ Aaron kɛ e binyumu ɔmɛ kɛ ba nɛ e kɛ nyu fɔ a he ha mɛ.
7 Lɔ ɔ se ɔ, e wo tade klɔii ɔ ha Aaron, nɛ e fi mlɛ mi fimi nɔ́* ɔ ha lɛ, nɛ e wo tade klɔii nɛ kɔni be he ɔ ha lɛ, nɛ e wo efɔd ɔ ha lɛ, nɛ e ngɔ efɔd ɔ mlɛ mi fimi nɔ́ ɔ kɛ fi e mlɛ mi nɛ e muɛ* lɛ bɔ nɛ sa.
8 Lɔ ɔ se ɔ, e wo gugue nɔ hami nɔ́ ɔ ha lɛ, nɛ e ngɔ Urim ɔ kɛ Tumim ɔ kɛ wo gugue nɔ hami nɔ́ ɔ mi.
9 Kɛkɛ nɛ Mose ngɔ osɔfo pɛɛ ɔ kɛ bu e yi, nɛ e ngɔ sika tsu nɔ́ pɛtɛpɛtɛ nɛ ngɛ tsɛ̃e, nɛ ji he nɔ jɔɔmi okadi klɔuklɔu* ɔ kɛ wo pɛɛ ɔ hɛ mi kaa bɔ nɛ Yehowa fã lɛ ɔ.
10 Jehanɛ ɔ, Mose ngɔ nɔ pɔmi nu ɔ nɛ e pɔ bo tsu ɔ kɛ níhi tsuo nɛ ngɛ mi ɔ nu, nɛ e pee mɛ klɔuklɔu.
11 Lɔ ɔ se ɔ, e fĩa eko kɛ pue afɔle sami la tɛ ɔ nɔ si kpaago, nɛ e pɔ afɔle sami la tɛ ɔ kɛ e he ní ɔmɛ tsuo, kɛ kã a kɛ nɔ́ nɛ a kɛ kã a maa nɔ ɔ nu kɛ pee mɛ klɔuklɔu.
12 Nyagbe ɔ, e plɛ nɔ pɔmi nu ɔ eko kɛ pue Aaron yi mi, nɛ e pɔ lɛ nu kɛ pee lɛ klɔuklɔu.
13 Jehanɛ ɔ, Mose ngɔ Aaron binyumu ɔmɛ kɛ ba nɛ e wo tade klɔiihi ha mɛ, nɛ e ngɔ mlɛ mi fimi níhi kɛ fi nɔ, nɛ e ngɔ yi fimi níhi kɛ fi a yi kaa bɔ nɛ Yehowa fã lɛ ɔ.
14 Kɛkɛ nɛ e ngɔ na ku nɛ a kɛ maa sã yayami afɔle ɔ kɛ ba, nɛ Aaron kɛ e binyumu ɔmɛ ngɔ a nine kɛ pue na ku ɔ nɛ a kɛ maa sã yayami afɔle ɔ yi mi.
15 Mose gbe na ku ɔ nɛ e ngɔ e nine nguɛ kɛ sɔ muɔ ɔ mi, nɛ e kɛ kpa koli ɔmɛ nɛ a ngɛ afɔle sami la tɛ ɔ kɔ̃ nya eywiɛ ɔmɛ a he, nɛ e tsukɔ afɔle sami la tɛ ɔ he,* se e kpa muɔ ɔ nɛ piɛ ɔ kɛ pue afɔle sami la tɛ ɔ sisi bɔ nɛ pee nɛ e pee lɛ klɔuklɔu konɛ a sã kpatami afɔle ngɛ nɔ.
16 Lɔ ɔ se ɔ, Mose ngɔ zɔ nɛ ngɛ mi ní ɔmɛ a he ɔ tsuo, kɛ zɔ nɛ ngɛ ko ɔ he ɔ, kɛ se tso mi ngmɛ enyɔ ɔmɛ kɛ zɔ nɛ ngɛ a he ɔ, nɛ e sã ngɛ afɔle sami la tɛ ɔ nɔ.
17 Kɛkɛ nɛ Mose ha nɛ a kɛ la sã na ku ɔ nɛ piɛ ɔ, e he womi ɔ, e lo ɔ, kɛ e fĩ ɔ ngɛ sito he ɔ se kaa bɔ nɛ Yehowa fã lɛ ɔ.
18 Jehanɛ ɔ, e ngɔ agbosu nɛ a kɛ maa sã sami afɔle ɔ kɛ ba, nɛ Aaron kɛ e binyumu ɔmɛ ngɔ a nine kɛ pue agbosu ɔ yi mi.
19 Kɛkɛ nɛ Mose gbe agbosu ɔ, nɛ e fĩa e muɔ ɔ kɛ pue afɔle sami la tɛ ɔ he tsuo.
20 Mose poo agbosu ɔ kpɔ nya kpɔ nya, nɛ e sã e yi ɔ, e kpɔ nya amɛ, kɛ e zɔ ɔ.*
21 Mose ngɔ nyu kɛ fɔ mi ní ɔ kɛ nane ɔmɛ a he, nɛ e sã agbosu ɔ tsuo ngɛ afɔle sami la tɛ ɔ nɔ. E ji sami afɔle nɛ jeɔ via liliili.* E ji afɔle nɛ a kɛ la sã ha Yehowa kaa bɔ nɛ Yehowa fã Mose ɔ.
22 Kɛkɛ nɛ e ngɔ agbosu enyɔne ɔ, nɛ ji osɔfo womi agbosu ɔ kɛ ba, nɛ Aaron kɛ e binyumu ɔmɛ ngɔ a nine kɛ pue agbosu ɔ yi mi.
23 Mose gbe agbosu ɔ nɛ e ngɔ e muɔ ɔ eko kɛ kpa Aaron hiɔ nɔ tue ɔ nya, nɛ e ngɔ eko kɛ kpa e hiɔ nine nguɛ gɔleku ɔ he, nɛ e ngɔ eko kɛ kpa e hiɔ nane nguɛ gɔleku ɔ he.
24 Lɔ ɔ se ɔ, Mose ngɔ Aaron binyumu ɔmɛ kɛ ba hɛ mi, nɛ e ngɔ muɔ ɔ eko kɛ kpa a hiɔ nɔ tue ɔmɛ a nya, nɛ e ngɔ eko kɛ kpa a hiɔ nine nguɛ gɔleku ɔmɛ a he, nɛ e ngɔ eko kɛ kpa a hiɔ nane nguɛ gɔleku ɔmɛ hu a he; se muɔ nɛ piɛ ɔ, Mose fĩa kɛ pue afɔle sami la tɛ ɔ he tsuo.
25 Kɛkɛ nɛ e ngɔ zɔ ɔ, kɛ hlemi nɛ wo zɔ ɔ, kɛ zɔ nɛ ngɛ mi ní ɔ he ɔ tsuo, kɛ zɔ nɛ ngɛ ko ɔ he ɔ, kɛ se tso mi ngmɛ enyɔ ɔmɛ kɛ a he zɔ ɔ, kɛ hiɔ nane ɔ.
26 E je abolo nɛ masa be mi nɛ a bɔ lɛ lokotolokoto* kake, abolo nɛ a bɔ lɛ lokotolokoto nɛ a kɛ nu kpa hɛ mi kake, kɛ akpɔɔnɔɔ kake ngɛ kɛtɛ* kɛ e mi abolo nɛ masa be mi nɛ ngɛ Yehowa hɛ mi ɔ mi. Kɛkɛ nɛ e kɛ pue hiɔ nane ɔ kɛ zɔ ɔmɛ a nɔ.
27 Lɔ ɔ se ɔ, e ngɔ lɛ tsuo kɛ wo Aaron kɛ e binyumu ɔmɛ a dɛ mi, nɛ e fɔ̃ kɛ ya kɛ ba kaa fɔ̃mi afɔle ngɛ Yehowa hɛ mi.
28 Kɛkɛ nɛ Mose ngɔ ní ɔmɛ ngɛ a dɛ nɛ e sã ngɛ afɔle sami la tɛ ɔ nɔ ngɛ sami afɔle ɔ nɔ. Ní nɛ ɔmɛ ji osɔfo womi afɔle nɛ jeɔ via liliili.* E ji afɔle nɛ a kɛ la sã ha Yehowa.
29 Kɛkɛ nɛ Mose ngɔ lohwe ɔ gugue ɔ nɛ e fɔ̃ kɛ ya kɛ ba kaa fɔ̃mi afɔle ngɛ Yehowa hɛ mi. Lɔ ɔ ba pee Mose blɔ fã mi nɔ́ nɛ e ná kɛ je osɔfo womi agbosu ɔ mi kaa bɔ nɛ Yehowa fã lɛ ɔ.
30 Nɛ Mose ngɔ nɔ pɔmi nu ɔ eko, kɛ muɔ nɛ ngɛ afɔle sami la tɛ ɔ nɔ ɔ hu eko nɛ e fĩa kɛ pue Aaron kɛ e tade ɔmɛ, kɛ e binyumu ɔmɛ nɛ a piɛɛ e he ɔ, kɛ mɛ hu a tade ɔmɛ a nɔ. Lɔ ɔ he ɔ, e pee Aaron kɛ e tade ɔmɛ kɛ e binyumu ɔmɛ kɛ a tade ɔmɛ klɔuklɔu.
31 Kɛkɛ nɛ Mose de Aaron kɛ e binyumu ɔmɛ ke: “Nyɛɛ hoo lo ɔ ngɛ kpe he bo tsu ɔ nya, nɛ nyɛɛ ye e kɛ abolo nɛ ngɛ osɔfo womi kɛtɛ* ɔ mi ɔ ngɛ lejɛ ɔ kaa bɔ nɛ a fã mi ke ma de nyɛ ɔ, ‘Aaron kɛ e binyumu ɔmɛ nɛ a ye.’
32 Ke lo ɔ kɛ abolo ɔ eko piɛ ɔ, nyɛɛ ngɔ la kɛ sã.
33 Nyɛ ko je kpe he bo tsu ɔ nya ligbi kpaago, kɛ ya si ligbi nɛ osɔfo womi ɔ maa ba nyagbe, ejakaa ligbi kpaago nɛ a kɛ maa wo nyɛ osɔfo ɔ nɛ.*
34 Yehowa lɛ fã ke waa pee nɔ́ nɛ wa pee mwɔnɛ ɔ bɔ nɛ pee nɛ wa kɛ kpata ha nyɛ.
35 Nyɛɛ hi kpe he bo tsu ɔ nya nyɔ kɛ pia ligbi kpaago, nɛ́ nyɛɛ pee níhi nɛ Yehowa fã nyɛ ke nyɛɛ pee ɔ, konɛ nyɛ ko gbo; ejakaa jã nɛ a fã mi ke ma de nyɛ.”
36 Aaron kɛ e binyumu ɔmɛ pee nɔ́ fɛɛ nɔ́ nɛ Yehowa fã kɛ gu Mose nɔ ke a pee ɔ.
Sisi Ningmahi
^ Aloo “kusii.”
^ Aloo “mi mi fimi nɔ́.”
^ Aloo “mu.”
^ Aloo “jlasi klɔuklɔu.”
^ Ngɛ Hebri gbi mi ɔ, “e tsukɔ afɔle sami la tɛ ɔ he kɛ je yayami he.”
^ Aloo “zɔ nɛ ngɛ e se tso mi ngmɛ ɔmɛ a he ɔ.”
^ Aloo “afɔle nɛ jɔɔ nɔ tsui he.”
^ Puɔ ngɛ abolo lokotolokoto nɛ ɔmɛ a kpɛti kaa bɔ nɛ ga ngɛ ɔ.
^ Aloo “kusii.”
^ Aloo “afɔle nɛ jɔɔ nɔ tsui he.”
^ Aloo “kusii.”
^ Ngɛ Hebri gbi mi ɔ, “a kɛ ma ha nɛ nyɛ dɛ mi nɛ hyi.”