4 Mose 12:1-16
12 Jehanɛ ɔ, Miriam kɛ Aaron tu munyu kɛ si Mose ngɛ Kush yo nɛ e ngɔ ɔ he je, ejakaa Mose yo ɔ, Kush no ji lɛ.
2 A bi ke: “Anɛ Mose pɛ nɔ nɛ Yehowa guɔ kɛ tuɔ munyu lo? Anɛ e tui munyu kɛ gui wɔ hu wa nɔ lo?” Nɛ Yehowa ngɛ nɔ́ nɛ a ngɛ dee ɔ nue.
3 Mose ji nɔ ko nɛ e he jɔ pe adesahi tsuo nɛ a ngɛ zugba a nɔ ɔ.*
4 Si kake too ɔ, Yehowa de Mose kɛ Aaron kɛ Miriam ke: “Nyɛ ni etɛ ɔmɛ nyɛɛ je kpo kɛ ho kpe he bo tsu ɔ he ya.” Lɔ ɔ he ɔ, mɛ ni etɛ ɔmɛ a je kpo kɛ ho.
5 Kɛkɛ nɛ Yehowa kple si kɛ ba ngɛ bɔku titima a mi, nɛ e ba da si ngɛ bo tsu ɔ nya, nɛ e tsɛ Aaron kɛ Miriam. Nɛ mɛ ni enyɔ ɔmɛ tsuo a hɛ mɛ kɛ ya a hɛ mi.
6 Kɛkɛ nɛ e de mɛ ke: “I kpa nyɛ pɛɛ, nyɛɛ bu mi tue. Ke Yehowa gbalɔ ko ngɛ nyɛ kpɛti ɔ, jinɛ i ko je ye he kpo kɛ tsɔɔ lɛ ngɛ nina mi, nɛ i kɛ lɛ ko tu munyu ngɛ nlami mi.
7 Se pi jã nɛ e ji ngɛ ye sɔmɔlɔ Mose blɔ fa mi! I ngɔ ye we ɔ tsuo kɛ wo e dɛ.*
8 I kɛ lɛ tuɔ munyu hɛ mi kɛ hɛ mi.* Nɔ́ fɛɛ nɔ́ nɛ i suɔ nɛ ma de lɛ ɔ, i deɔ lɛ heii, se pi ngɛ abɛ gbi mi; nɛ e naa bɔ nɛ Yehowa ngɛ ha. Mɛni he je mɔ nɛ nyɛ yi gbeye kaa nyɛ maa tu munyu kɛ si ye sɔmɔlɔ Mose ɔ?”
9 Lɔ ɔ he ɔ, Yehowa mi mi fu mɛ wawɛɛ, nɛ e je a he.
10 Kɛkɛ nɛ bɔku ɔ je bo tsu ɔ nɔ, nɛ hyɛ! kpiti pue Miriam, nɛ e hiɛ futaa kaa snoo. Aaron plɛ e he nɛ e hyɛ Miriam, nɛ e na kaa kpiti pue lɛ.
11 Amlɔ nɔuu ɔ, Aaron de Mose ke: “Ye nyɔmtsɛ, i kpa mo pɛɛ! I kpa mo pɛɛ, o kɛ wɔ nɛ ko ye ngɛ wa yayami ɔ he je! Nɔ́ nɛ wa pee nɛ ɔ lɛɛ, wa je kuasia.
12 I kpa mo pɛɛ, ko ha nɛ e ya nɔ nɛ e pee kaa nɔ nɛ e gbo, nɛ́ e nɔmlɔ tso ɔ fã sa loko a fɔ lɛ!”
13 Kɛkɛ nɛ Mose kpa ngmlaa kɛ tsɛ Yehowa, nɛ e de lɛ ke: “Ao Mawu, i kpa mo pɛɛ nɛ o tsa lɛ! I kpa mo pɛɛ!”
14 Yehowa de Mose ke: “Ke e tsɛ su lada kɛ pue e hɛ mi ɔ, anɛ e hɛ mi be si puee ligbi kpaago lo? Ha nɛ a tsi e nya ligbi kpaago ngɛ sito he ɔ se, lɔ ɔ se ɔ, a ma nyɛ maa ngɔ lɛ kɛ ba sito he ɔ ekohu.”
15 Lɔ ɔ he ɔ, a ya tsi Miriam nya ngɛ sito he ɔ se ligbi kpaago, nɛ ni ɔmɛ hiɛ kɛ ji sito he ɔ kɛ ya si be nɛ a kpale Miriam kɛ ba sito he ɔ.
16 Lɔ ɔ se ɔ, ni ɔmɛ hia kɛ je Hazerot, nɛ a ya to si ngɛ Paran nga a nɔ.
Sisi Ningmahi
^ Aloo “nɔ ko nɛ e baa e he si pe nɔ fɛɛ nɔ.”
^ Ngɛ Hebri gbi mi ɔ, “Ngɛ ye we ɔ mi tsuo ɔ, e peeɔ níhi nɛ tsɔɔ kaa e yeɔ anɔkuale.”
^ Ngɛ Hebri gbi mi ɔ, “nya kɛ nya.”
