4 Mose 16:1-50
16 Kɛkɛ nɛ Kora, nɛ ji Izhar binyumu ɔ kɛ Eliab binyumuhi nɛ ji Datan kɛ Abiram, kɛ On, nɛ ji Pelet binyumu ɔ te si. Izhar tsɛ ji Kohat, nɛ Kohat tsɛ ji Levi. Datan, kɛ Abiram, kɛ On ji Reuben ninahi.
2 A kɛ Israel nyumuhi 250 te si kɛ wo Mose. Nyumu nɛ ɔmɛ ji ganɔhi nɛ a hla ngɛ ma a mi, nɛ́ a le mɛ saminya.
3 A kpe kɛ wo Mose kɛ Aaron he, nɛ a de mɛ ke: “Nyɛ ngɛ nɔ́ ko pee tsɔ! Ma nɛ ɔ tsuo ngɛ klɔuklɔu, ni ɔmɛ tsuo ngɛ klɔuklɔu, nɛ Yehowa ngɛ a kpɛti. Mɛni he je mɔ nɛ e sa nɛ nyɛ wo nyɛ he nɔ ngɛ Yehowa asafo ɔ nɔ ɔ?”
4 Benɛ Mose nu nɔ́ nɛ ɔ, amlɔ nɔuu nɛ e ngɔ e hɛ mi kɛ bu si.
5 Kɛkɛ nɛ e de Kora kɛ nihi tsuo nɛ a fĩ e se ɔ ke: “Hwɔɔ mɔtu ɔ, Yehowa ma ha nɛ wa maa na nɔ nɛ ji e nɔ́, kɛ nɔ nɛ ngɛ klɔuklɔu, kɛ nɔ nɛ e sa kaa e hɛ lɛ kɛ su e he. Nɔ nɛ e maa hla a, jamɛ a nɔ ɔ lɛ maa hɛ kɛ su e he.
6 Nɔ́ nɛ nyɛɛ pee ji nɛ ɔ nɛ: mo Kora, o kɛ nihi nɛ a fĩ o se ɔ tsuo nyɛɛ ngɔ la jemi níhi,
7 nɛ nyɛɛ je la kɛ wo a mi, nɛ nyɛɛ ngɔ tsopa kɛ e he via kɛ pue nɔ ngɛ Yehowa hɛ mi hwɔɔ, nɛ nɔ nɛ Yehowa maa hla a, lɛ ji nɔ klɔuklɔu. Nyɛ Levi binyumuhi, nyɛ ní peepee ba po blɔ mi!”
8 Lɔ ɔ se ɔ, Mose de Kora ke: “Nyɛ Levi binyumuhi, i kpa nyɛ pɛɛ, nyɛɛ bu tue.
9 Anɛ e pi ha nyɛ kaa Israel Mawu ɔ hla nyɛ kɛ je Israel bi ɔmɛ a kpɛti, nɛ e ngmɛ nyɛ blɔ kaa nyɛɛ hɛ nyɛ kɛ su e he konɛ nyɛ sɔmɔ ngɛ Yehowa bo tsu ɔ mi, nɛ́ nyɛɛ da ma a hɛ mi nɛ nyɛ sɔmɔ mɛ lo?
10 Anɛ e pi ha mo kaa e ha nɛ o kɛ o nyɛminyumu ɔmɛ tsuo, nɛ ji Levi binyumu ɔmɛ nyɛ hɛ kɛ su e he haa lo? Anɛ osɔfo yemi ɔ hu nyɛ ngɛ hlae ma kpɔ̃ lo?
11 Enɛ ɔ he ɔ, o kɛ nihi tsuo nɛ a fĩ o se nɛ nyɛ ngɛ nyɛ he nya buae ɔ ngɛ si tee kɛ ngɛ Yehowa woe. Aaron lɛɛ mɛni e pee nɛ́ e sa kaa nyɛɛ tu munyu huitihuiti kɛ si lɛ?”
12 Pee se ɔ, Mose tsɔ konɛ a ya tsɛ Datan kɛ Abiram, nɛ ji Eliab binyumu ɔmɛ kɛ ba, se a de ke: “Wa be bae!
13 Anɛ e pi ha mo kaa o ngɔ wɔ kɛ je zugba nɛ nyɔ nyu kɛ hwo ngɛ bee ngɛ nɔ ɔ nɔ kɛ ba nga nɛ ɔ nɔ konɛ o ba gbe wɔ lo? Amlɔ nɛ ɔ, o pa ngɛ hlae nɛ mo pɛ o pee o he nɔ yelɔ ngɛ wa nɔ lo?*
14 O kɛ wɔ bɛ zugba nɛ nyɔ nyu kɛ hwo ngɛ bee ngɛ nɔ ɔ nɔ, nɛ o ha we wɔ zugba kɛ wai ngmɔ kaa weto ní hulɔ. Anɛ o ngɛ hlae nɛ nyumu nɛ ɔmɛ nɛ a nyɛɛ o se kaa hɛ yuyuili lo?* Wa be bae!”
15 Enɛ ɔ he ɔ, Mose mi mi fu wawɛɛ nɛ e de Yehowa ke: “Ko plɛ nɛ o hyɛ a ngma afɔle ɔ. I ngɔɛ a teji kake po, nɛ i yi a ti nɔ ko nɔ ko awi hulɔ.”
16 Kɛkɛ nɛ Mose de Kora ke: “Hwɔɔ ɔ, o kɛ nihi tsuo nɛ a fĩ o se ɔ nyɛɛ ba Yehowa hɛ mi; o kɛ mɛ kɛ Aaron tsuo.
17 Nɔ fɛɛ nɔ nɛ́ e wo e la jemi nɔ́, nɛ́ e ngɔ tsopa kɛ e he via kɛ pue nɔ, nɛ́ nɔ fɛɛ nɔ nɛ e ngɔ e la jemi nɔ́ ɔ kɛ ba Yehowa hɛ mi, la jemi níhi 250. O kɛ Aaron hu nyɛ ti nɔ fɛɛ nɔ nɛ ngɔ e la jemi nɔ́ kɛ ba.”
18 Lɔ ɔ he ɔ, a ti nɔ fɛɛ nɔ wo e la jemi nɔ́, nɛ a ngɔ la kɛ tsopa kɛ e he via kɛ pue nɔ, nɛ a ya da si ngɛ kpe he bo tsu ɔ nya, a kɛ Mose kɛ Aaron tsuo.
19 Benɛ Kora bua nihi nɛ a fĩ e se ɔ a nya kɛ wo Mose kɛ Aaron a he ngɛ kpe he bo tsu ɔ nya a, Yehowa hɛ mi nyami ɔ je kpo kɛ tsɔɔ ma a tsuo.
20 Jehanɛ ɔ, Yehowa de Mose kɛ Aaron ke:
21 “Nyɛɛ yu nyɛ he ngɛ kuu nɛ ɔ he, nɛ́ ma kpata a hɛ mi hɛngmɛfia.”
22 Kɛkɛ nɛ a ngɔ a hɛ mi kɛ bu zugba nɛ a de ke: “Oo Mawu, mo nɛ o ha adesahi tsuo mumi,* anɛ yayami nɛ nɔ kake pee ɔ ma ha nɛ o ná ma a tsuo he abofu lo?”
23 Kɛkɛ nɛ Yehowa de Mose ke:
24 O kɛ ma a nɛ tu munyu nɛ o de mɛ ke, ‘Nyɛɛ hɛ nyɛ kɛ je Kora, kɛ Datan, kɛ Abiram a bo tsu ɔmɛ a he!’”
25 Kɛkɛ nɛ Mose te si nɛ e ho Datan kɛ Abiram a ngɔ ya, nɛ Israel ma nikɔtɔma amɛ piɛɛ e he kɛ ho.
26 E de ma a ke: “I kpa nyɛ pɛɛ, nyɛɛ hɛ nyɛ kɛ je yiwutsotsɛmɛ nɛ ɔmɛ a bo tsu ɔmɛ a he, nɛ́ nyɛ ko ta a nɔ́ ko nɔ́ ko he, konɛ a ko kpata nyɛ hɛ mi ngɛ a yayami ɔmɛ a he je.”
27 Amlɔ nɔuu nɛ a hɛ mɛ kɛ je Kora, kɛ Datan, kɛ Abiram a bo tsu ɔmɛ a he. Kɛkɛ nɛ Datan kɛ Abiram je kpo nɛ a kɛ a yi ɔmɛ, kɛ a binyumu ɔmɛ, kɛ a bimɛ tsɔwi ɔmɛ ba da si ngɛ a bo tsu ɔmɛ a nya.
28 Kɛkɛ nɛ Mose de ke: “Enɛ ɔ ma ha nɛ nyɛ maa na kaa Yehowa lɛ tsɔ mi kaa ma pee ní nɛ ɔmɛ tsuo, se pi imi nitsɛ ye yi mi tomi:*
29 Ke nimli nɛ ɔmɛ gbo gbenɔ nɛ adesahi tsuo gboɔ ɔ, ke a gbla a tue kaa bɔ nɛ a gblaa adesahi tsuo a tue ɔ, lɛɛ tsa pi Yehowa nɛ e tsɔ mi.
30 Se ke Yehowa ha nɛ nɔ́ ko nɛ bɛ hyɛ ba a nɔ, nɛ zugba a bli e nya mi nɛ e mii mɛ kɛ nɔ́ fɛɛ nɔ́ nɛ a ngɛ ɔ kɛ ho Yɔkɔ* mi ya hɛ ngmengmle ɔ, nyɛ maa na kaa nimli nɛ ɔmɛ bui Yehowa niinɛ.”
31 Benɛ Mose tu munyu nɛ ɔmɛ ta pɛ ɔ, zugba a mi gba.
32 Kɛkɛ nɛ zugba a bli e nya mi nɛ e mii mɛ kɛ a we mi bimɛ, kɛ nɔ fɛɛ nɔ nɛ fĩ Kora se ɔ, kɛ a níhi tsuo.
33 Lɔ ɔ he ɔ, a kɛ nihi nɛ a piɛɛ a he ɔ tsuo kple kɛ ho Yɔkɔ* mi ya hɛ ngmengmle, nɛ zugba a ha a nɔ, nɛ a hɛ mi kpata ngɛ asafo ɔ kpɛti.
34 Benɛ a ngɛ ngmlaa kpae ɔ, Israel bi tsuo nɛ a bɔle mɛ ɔ ye gbeye nɛ a tu fo, nɛ a de ke: “Wa ngɛ gbeye yee kaa zugba a maa mii wɔ!”
35 Kɛkɛ nɛ la je Yehowa ngɔ nɛ e ba sã nyumuhi 250 nɛ a ngɛ tsopa kɛ e he via a sãe ɔ.
36 Jehanɛ ɔ, Yehowa de Mose ke:
37 “De Eleazar, osɔfo Aaron binyumu ɔ nɛ e je la jemi ní ɔmɛ ngɛ la a mi, ejakaa a ngɛ klɔuklɔu. Jehanɛ hu ɔ, de lɛ nɛ e gbɛ la a kɛ ya se lokoo.
38 Á ngɔ nyumuhi nɛ a pee yayami nɛ a wami je a dɛ ɔ* a la jemi ní ɔmɛ kɛ pee dade tɛtlɛɛhi nɛ́ a kɛ ha afɔle sami la tɛ ɔ he, ejakaa a kɛ la jemi ní ɔmɛ ba Yehowa hɛ mi, nɛ a pee klɔuklɔu. Dade tɛtlɛɛ nɛ ɔmɛ nɛ a pee okadi kɛ ha Israel bi ɔmɛ.”
39 Enɛ ɔ he ɔ, osɔfo Eleazar ngɔ akɔblee la jemi ní ɔmɛ nɛ nihi nɛ la a sã mɛ ɔ kɛ ba a, nɛ e fiaa a nɔ nɛ a pee tɛtlɛɛ konɛ e kɛ ha afɔle sami la tɛ ɔ he,
40 kaa bɔ nɛ Yehowa de lɛ kɛ gu Mose nɔ ke e pee ɔ. E ji kaimi nɔ́ ko kɛ ha Israel bi ɔmɛ kaa, nɔ ko* nɛ e be he blɔ, nɛ e pi Aaron nina nɛ ko su afɔle sami la tɛ ɔ he nɛ e sã tsopa kɛ e he via ngɛ Yehowa hɛ mi, nɛ nɔ ko hu nɛ ko pee e ní kaa Kora kɛ nihi nɛ a fĩ e se ɔ.
41 E nɔ jena pɛ ɔ, Israel ma a tsuo bɔni munyu huitihuiti tumi kɛ si Mose kɛ Aaron, nɛ a ngɛ dee ke: “Nyɛ ni enyɔ nɛ ɔmɛ nyɛ gbe Yehowa we bi ɔmɛ.”
42 Benɛ ma a kpe kɛ wo Mose kɛ Aaron a he ɔ, a plɛ a hɛ mi kɛ tsɔɔ kpe he bo tsu ɔ, nɛ hyɛ! bɔku ɔ ha kpe he bo tsu ɔ nɔ, kɛkɛ nɛ Yehowa hɛ mi nyami ɔ bɔni e he kpo jemi.
43 Mose kɛ Aaron ho kpe he bo tsu ɔ hɛ mi ya,
44 nɛ Yehowa de Mose ke:
45 “Nyɛ je nyɛ he kɛ je ma nɛ ɔ he konɛ ma kpata a hɛ mi hɛngmɛfia.” Kɛkɛ nɛ a ngɔ a hɛ mi kɛ bu zugba.
46 Lɔ ɔ se ɔ, Mose de Aaron ke: “Ngɔɔ la jemi nɔ́ ɔ, nɛ́ o je la ngɛ afɔle sami la tɛ ɔ mi kɛ wo mi, nɛ o ngɔ tsopa kɛ e he via kɛ pue nɔ, nɛ o ya ma bi ɔmɛ a ngɔ esɔesɔ, nɛ o ya kpa a yayami ɔ he pɛɛ ha mɛ, ejakaa Yehowa mi mi fu wawɛɛ. Haomi ɔ je sisi momo!”
47 Amlɔ nɔuu nɛ Aaron wo la jemi nɔ́ ɔ kaa bɔ nɛ Mose de lɛ ɔ, nɛ e tu fo kɛ sɛ ni ɔmɛ a kpɛti, nɛ hyɛ! haomi ɔ je sisi ngɛ ni ɔmɛ a kpɛti momo. Enɛ ɔ he ɔ, e ngɔ tsopa kɛ e he via a kɛ pue la jemi nɔ́ ɔ nɔ, nɛ e bɔni ni ɔmɛ a yayami ɔ he pɛɛ kpami ha mɛ.
48 E ya nɔ nɛ e da si ngɛ nihi nɛ a gbo ɔ kɛ nihi nɛ a gbo we ɔ a kpɛti, nɛ nyagbenyagbe ɔ, haomi ɔ se po.
49 Nihi nɛ haomi ɔ gbe mɛ ɔ a yibɔ ji 14,700, slo ni nɛmɛ nɛ gbo ngɛ Kora sane ɔ mi ɔ.
50 Nyagbenyagbe ɔ, benɛ haomi ɔ se po ɔ, Aaron kpale kɛ ba Mose ngɔ ngɛ kpe he bo tsu ɔ nya.
Sisi Ningmahi
^ Aloo “o pa ngɛ hlae nɛ o ye nyɔmtsɛ ngɛ wa nɔ lo?”
^ Ngɛ Hebri gbi mi ɔ, “Anɛ o ma ta nyumu nɛ ɔmɛ a hɛngmɛ lo?”
^ Ngɛ Hebri gbi mi ɔ, “he lohi tsuo a mumi.”
^ Aloo “se pi imi nitsɛ ye tsui nya ní.”
^ Ngɛ Hebri gbi mi ɔ, “Sheol,” Hyɛ Munyu Komɛ A Sisi Tsɔɔmi.
^ Ngɛ Hebri gbi mi ɔ, “Sheol.” Hyɛ Munyu Komɛ A Sisi Tsɔɔmi.
^ Aloo “nɛ a pee yayami kɛ si mɛ nitsɛmɛ a klaa.”
^ Ngɛ Hebri gbi mi ɔ, “nubwɔ ko.”