4 Mose 19:1-22
-
Na tsutsu ɔ kɛ he tsumi nyu ɔ (1-22)
19 Yehowa kɛ Mose kɛ Aaron tu munyu ekohu nɛ e de ke:
2 “Mlaa nɛ Yehowa wo ɔ ji nɛ ɔ nɛ, ‘De Israel bi ɔmɛ ke a ngɔ na tsutsu nɛ kpa ko be e he nɛ a kɛ kuɛpã tso wui lɛ hyɛ ba ha mo.
3 Nyɛɛ ngɔ na a kɛ ha osɔfo Eleazar, nɛ e kpaka lɛ kɛ ho sito he ɔ se ya, nɛ́ a ya gbe lɛ ngɛ e hɛ mi.
4 Jehanɛ ɔ, osɔfo Eleazar nɛ ngɔ e nine nguɛ kɛ sɔ na a muɔ ɔ mi, nɛ́ e fĩa muɔ ɔ kɛ ya kpe he bo tsu ɔ hɛ mi tɛɛ si kpaago.
5 Lɔ ɔ se ɔ, á sã na a ngɛ osɔfo Eleazar hɛ mi. Á sã na a he womi ɔ, kɛ e lo ɔ, kɛ e muɔ ɔ, kɛ e fĩ ɔ tsuo.
6 Osɔfo ɔ nɛ ngɔ seda tso, hisopo, kɛ bo tsutsu, nɛ́ e sake kɛ pue la nɛ a ngɛ na a sãe ngɛ mi ɔ mi.
7 Jehanɛ ɔ, osɔfo ɔ nɛ fɔ e tade ɔmɛ a he, nɛ́ e du,* lɔ ɔ se ɔ, e ma nyɛ maa ba sito he ɔ; se osɔfo ɔ he be tsɔe kɛ yaa si gbɔkuɛ.
8 “‘Nɔ nɛ sã na a nɛ fɔ e tade ɔmɛ a he ngɛ nyu mi, nɛ́ e du.* E he be tsɔe kɛ yaa si gbɔkuɛ.
9 “‘Nyumu nɛ e he tsɔ nɛ bua na a la zu ɔ nya, nɛ́ e ngɔ kɛ ya pue he ko nɛ he tsɔ ngɛ sito he ɔ se, nɛ́ Israel ma a nɛ ngɔ kɛ to, konɛ a kɛ futu nyu nɛ a kɛ maa tsu a he ɔ mi. E ji yayami afɔle.
10 Nɔ nɛ ma bua na a la zu ɔ nya a nɛ fɔ e tade ɔmɛ a he. E he be tsɔe kɛ yaa si gbɔkuɛ.
“‘Enɛ ɔ maa pee blɔ tsɔɔmi nɛ fɔɔ si daa ha Israel bi ɔmɛ kɛ nubwɔ nɛ ngɛ a kpɛti ɔ.
11 Nɔ fɛɛ nɔ nɛ maa ta nɔ nɛ gbo* he ɔ, e he be tsɔe ligbi kpaago.
12 Ngɛ ligbi etɛne ɔ nɔ ɔ, jamɛ a nɔ ɔ nɛ ngɔ nyu ɔ* kɛ tsu e he, nɛ e he ma tsɔ ngɛ ligbi kpaagone ɔ nɔ. Se ke e tsu we e he ngɛ ligbi etɛne ɔ nɔ ɔ, e he be tsɔe ngɛ ligbi kpaagone ɔ nɔ.
13 Nɔ fɛɛ nɔ nɛ maa ta nɔ nɛ gbo* he nɛ e be e he tsue ɔ, e wo Yehowa bo tsu ɔ he mu. Á gbe jamɛ a nɔ ɔ ngɛ* Israel. Akɛnɛ a fĩa we he tsumi nyu ɔ kɛ pue we e nɔ he je ɔ, e he tsɔ we. Mu ɔ ngɛ e he.
14 “‘Ke nɔ ko gbo ngɛ bo tsu mi ɔ, mlaa nɛ ngɛ he ji nɛ ɔ nɛ: Nɔ fɛɛ nɔ nɛ maa sɛ bo tsu ɔ mi, kɛ nɔ fɛɛ nɔ nɛ ngɛ bo tsu ɔ mi momo ɔ he be tsɔe ligbi kpaago.
15 Nɔ́ fɛɛ nɔ́ nɛ nya fɔɔ si gu nɛ nya nɔ be nya a, jamɛ a nɔ́ ɔ he tsɔ we.
16 Nɔ fɛɛ nɔ nɛ maa ta nɔ ko nɛ a kɛ klaate gbe lɛ, aloo gbogboe ko, aloo adesa wu ko, aloo gɔ ko he ngɛ nga nɔ ɔ, e he be tsɔe ligbi kpaago.
17 Bɔ nɛ pee nɛ nɔ nɛ e he tsɔ we ɔ he nɛ tsɔ ɔ, e sa nɛ á ngɔ yayami afɔle nɛ a sã a la zu ɔ eko kɛ wo nɔ́ mi, nɛ a yɛ pa mi nyu kɛ pue nɔ.
18 Lɔ ɔ se ɔ, nyumu nɛ he tsɔ nɛ ngɔ hisopo kɛ sɔ nyu ɔ mi, nɛ́ e kɛ fĩa bo tsu ɔ, kɛ ní ɔmɛ tsuo, kɛ nihi* nɛ a ngɛ lejɛ ɔ a nɔ. E kɛ fĩa nɔ nɛ ta wu ɔ, loo nɔ nɛ a gbe lɛ ɔ, loo gbogboe ɔ, loo gɔ ɔ he ɔ nɔ.
19 Nɔ nɛ he tsɔ ɔ nɛ fĩa nyu ɔ kɛ pue nɔ nɛ he tsɔ we ɔ nɔ ngɛ ligbi etɛne ɔ kɛ ligbi kpaagone ɔ nɔ, nɛ ligbi kpaagone ɔ, é tsu e he ngɛ yayami he; lɔ ɔ se ɔ, e fɔ e tade ɔmɛ a he, nɛ́ e du, nɛ gbɔkuɛ ɔ, e he ma tsɔ.
20 “‘Se nɔ nɛ he tsɔ we nɛ e be e he tsue ɔ, a gbe jamɛ a nɔ ɔ,* ejakaa e ble Yehowa jami he ɔ. A fĩa we nyu nɛ a kɛ tsuɔ nɔ he ɔ kɛ pue we e nɔ, lɔ ɔ he ɔ, e he tsɔ we.
21 “‘Enɛ ɔ maa pee blɔ tsɔɔmi nɛ fɔɔ si daa ha mɛ: Nɔ nɛ ma fĩa he tsumi nyu ɔ nɛ́ e fɔ e tade ɔmɛ a he, nɛ nɔ nɛ maa ta he tsumi nyu ɔ he ɔ he be tsɔe kɛ yaa si gbɔkuɛ.
22 Nɔ́ fɛɛ nɔ́ nɛ nɔ nɛ e he tsɔ we ɔ maa ta he ɔ he be tsɔe, nɛ nɔ* nɛ maa ta jamɛ a nɔ́ ɔ he ɔ hu he be tsɔe kɛ yaa si gbɔkuɛ.’”
Sisi Ningmahi
^ Ngɛ Hebri gbi mi ɔ, “nɛ́ e du e he lo ɔ he ngɛ nyu mi.”
^ Ngɛ Hebri gbi mi ɔ, “nɛ́ e du e he lo ɔ he ngɛ nyu mi.”
^ Aloo “nɛ maa ta adesa klaa nɛ gbo ko.” Hyɛ Munyu Komɛ A Sisi Tsɔɔmi.
^ Ngɛ Hebri gbi mi ɔ, “nɛ ngɔ nɔ́ nɛ ɔ.”
^ Aloo “gbogboe, adesa klaa ko nɛ gbo.” Hyɛ Munyu Komɛ A Sisi Tsɔɔmi.
^ Ngɛ Hebri gbi mi ɔ, “á po jamɛ a klaa a kɛ je.”
^ Aloo “klaahi.”
^ Ngɛ Hebri gbi mi ɔ, “a po jamɛ a klaa a kɛ je ma a mi kɛ fɔ he.”
^ Aloo “klaa.”
