4 Mose 21:1-35
21 Benɛ Arad matsɛ ɔ nɛ e hi Negeb nɛ e ji Kanaan no ɔ nu kaa Israel gu Atarim blɔ ɔ nɔ kɛ ma a, e ya tua Israel, nɛ e nuu a ti ni komɛ nyɔguɛ kɛ ho.
2 Lɔ ɔ he ɔ, Israel kã Yehowa kita ke: “Ke o ngɔ nimli nɛ ɔmɛ kɛ wo ye dɛ ɔ, bɔ fɛɛ bɔ nɛ ji ɔ, ma kpata a ma amɛ a hɛ mi.”
3 Enɛ ɔ he ɔ, Yehowa bu Israel gbi tue, nɛ e ngɔ Kanaan bi ɔmɛ kɛ wo a dɛ, nɛ a kpata a kɛ a ma amɛ a hɛ mi. Lɔ ɔ he ɔ, a wo lejɛ ɔ biɛ ke Horma.*
4 Benɛ a tsa a blɔ hiami ɔ nɔ kɛ je Hor Yoku ɔ he nɛ́ a gu Wo Tsu ɔ nya blɔ ɔ nɔ konɛ a ya lɔgɔ Edom zugba a kɛ ho ɔ, blɔ hiami ɔ ha nɛ pɔ tɔ ni ɔmɛ a he.*
5 Ni ɔmɛ tu munyu kɛ si Mawu kɛ Mose si abɔ, nɛ a de ke: “Mɛni he je nɛ nyɛ ngɔ wɔ kɛ je Egipt kɛ ba konɛ wa ba gbo ngɛ nga nɛ ɔ nɔ ɔ? Niye ní be, nɛ nyu hu be. Niye ní nɛ ngɛ tai nɛ ɔ lɛɛ, wa sume hu.”*
6 Lɔ ɔ he ɔ, Yehowa ha nɛ sinɔ duɔtsɛmɛ* ba sɛ ni ɔmɛ a kpɛti, nɛ a kɔɔ mɛ, nɛ Israel bi ɔmɛ a kpɛti nihi fuu gbo.
7 Lɔ ɔ he ɔ, ni ɔmɛ ba Mose ngɔ, nɛ a ba de lɛ ke: “Wa pee yayami kaa wa tu munyu kɛ si Yehowa, nɛ wa tu munyu kɛ si mo hulɔ. Mo kpa Yehowa pɛɛ ha wɔ konɛ e je sinɔ ɔmɛ kɛ je wa kpɛti.” Lɔ ɔ he ɔ, Mose kpa pɛɛ ha ni ɔmɛ.
8 Kɛkɛ nɛ Yehowa de Mose ke: “Moo pee sinɔ duɔtsɛ* henɔ ko, nɛ́ o kɛ kpla tso he, konɛ ke sinɔ kɔ̃ nɔ ko ɔ, nɔ ɔ nɛ hyɛ sinɔ duɔtsɛ henɔ nɛ o pee ɔ, konɛ e yi nɛ ná wami.”
9 Oya nɔuu nɛ Mose pee akɔblee sinɔ nɛ e kɛ kpla tso he, nɛ be fɛɛ be nɛ sinɔ maa kɔ̃ nɔ ko nɛ nɔ ɔ maa hyɛ akɔblee sinɔ ɔ, e yi náa wami.
10 Lɔ ɔ se ɔ, Israel bi ɔmɛ tsa a blɔ hiami ɔ nɔ, nɛ a ya to si ngɛ Obot.
11 Nɛ a hia kɛ je Obot, nɛ a ya to si ngɛ Iye Abarim, ngɛ nga a nɛ e hɛ mi tsɔɔ Moab ɔ nɔ kɛ yaa puje he blɔ.
12 Nɛ́ a hia kɛ je lejɛ ɔ, a ya to si ngɛ Zered Dɔgba a* he.
13 A je lejɛ ɔ nɛ a ya to si ngɛ Arnon kpokpa a nɛ ngɛ nga a nɛ je Amor bi ɔmɛ a huzu ɔ nya a nɔ, ejakaa Arnon ji Moab huzu nɛ ngɛ Moab bi ɔmɛ kɛ Amor bi ɔmɛ a kpɛti.
14 Enɛ ɔ he je nɛ Yehowa Tahi womi ɔ tu “Waheb nɛ ngɛ Sufa, kɛ Arnon dɔgba amɛ,*
15 kɛ dɔgbahi* nɛ a be kɛ ya su* Ar ma a he, kɛ ya su he nɛ Moab huzu ɔ” ngɛ ɔ he munyu ɔ nɛ.
16 Lɔ ɔ se ɔ, a tsa nɔ kɛ ho Beer ya. Lejɛ ɔ nɛ Yehowa tu munyu kɛ tsɔɔ Mose ngɛ vu ko he ke: “Bua ni ɔmɛ a nya, nɛ́ ma ha mɛ nyu” ɔ nɛ.
17 Jamɛ a be ɔ, Israel la la nɛ ɔ:
“Oo vu, nyu nɛ je o mi kɛ ba!—Nyɛ he nɔ!*
18 Vu nɛ ganɔhi tsua, nɛ́ ni ɔmɛ a we odehe ɔmɛ tsua,A ngɔ hɛ mi nyɛɛlɔ tso kɛ mɛ nitsɛmɛ a dɛma tsohi kɛ tsua.”
Lɔ ɔ se ɔ, a je nga a nɔ kɛ ho Matana ya.
19 Nɛ́ a je Matana a, a tsa nɔ kɛ ho Nahaliel ya; nɛ́ a je Nahaliel ɔ, a tsa nɔ kɛ ho Bamot ya.
20 Nɛ́ a je Bamot ɔ, a tsa nɔ kɛ ho dɔgba a nɛ ngɛ Moab zugba a nɔ* ɔ he ya, ngɛ Pisga yo ɔ yi mi, he nɛ e hɛ mi tsɔɔ Yeshimon ɔ.*
21 Jehanɛ ɔ, Israel tsɔ nihi kɛ ya Sihon, nɛ ji Amor bi ɔmɛ a matsɛ ɔ ngɔ, nɛ a ya de lɛ ke:
22 “Ha nɛ waa gu o zugba a nɔ kɛ be. Wa be ngmɔ ko loo wai ngmɔ ko mi gbae. Wa be vu ko mi nyu nue. Wa maa nyɛɛ Matsɛ ɔ Gbɛjegbɛ ɔ nɔ tɛ̃ɛ kɛ ya si be nɛ wa maa gu o zugba a nɔ kɛ be.”
23 Se Sihon kplɛɛ we nɛ Israel nɛ gu e zugba a nɔ kɛ be. Mohu ɔ, Sihon bua e we bi ɔmɛ tsuo a nya, nɛ e je kpo konɛ e kɛ Israel nɛ ya hwu ta ngɛ nga a nɔ, nɛ e ba Yahaz, nɛ e kɛ Israel ba bɔni ta hwumi ngɛ lejɛ ɔ.
24 Se Israel kɛ klaate ye e nɔ kunimi, nɛ e ngɔ e zugba a kɛ je Arnon kɛ ya si Yabok nɛ ngɛ Ammon bi ɔmɛ a kasa nya a, ejakaa Yazer ji Ammon bi ɔmɛ a huzu.
25 Lɔ ɔ he ɔ, Israel ngɔ ma nɛ ɔmɛ tsuo, nɛ a hi Amor bi ɔmɛ a ma amɛ tsuo a mi, a hi Heshbon kɛ mahi tsuo nɛ bɔle lɛ ɔ* a mi.
26 Ejakaa Heshbon ji Sihon, nɛ ji Amor bi ɔmɛ a matsɛ ɔ ma. Lɛ nɛ e kɛ Moab matsɛ ɔ hwu ta nɛ e ngɔ e zugba a tsuo ngɛ e dɛ hluu kɛ ya si Arnon ɔ nɛ.
27 Lɔ ɔ he nɛ a bu he fɛu yemi abɛ nɛ ɔ nɛ:
“Ba Heshbon.
Ha nɛ a po Sihon ma a, nɛ a fia lɛ kɛ ma si kpɛii.
28 Ejakaa la ko je Heshbon, nɛ la lilɛ ko je Sihon ma a mi.
E sã Ar nɛ ngɛ Moab ɔ, e sã nyɔmtsɛmɛ nɛ a ngɛ hehi nɛ a ya hiɔwe* ngɛ Arnon ɔ.
29 Moab, musu tloo mo! Nɛ nyɛ nihi nɛ nyɛ ngɛ Kemosh, nyɛ hɛ mi ma kpata pɛ!
E ha nɛ e binyumu ɔmɛ pee lalaalo woli, nɛ e biyi ɔmɛ pee Sihon, nɛ ji Amor bi ɔmɛ a matsɛ ɔ nyɔguɛhi.
30 Nyɛ ha nɛ waa fiaa mɛ ní;A ma kpata Heshbon hɛ mi kɛ ya si Dibon tɔɔ;Nyɛ ha waa pee lɛ ma doku kɛ ya si Nofa tɔɔ;La maa sã kɛ ya si Medeba tɔɔ.”
31 Enɛ ɔ he ɔ, Israel hi Amor bi ɔmɛ a zugba a nɔ.
32 Jehanɛ ɔ, Mose tsɔ nyumu komɛ konɛ a ya kpá Yazer ma a si. A ngɔ mahi nɛ bɔle lɛ ɔ,* nɛ a fiee Amor bi ɔmɛ nɛ a ngɛ lejɛ ɔ.
33 Lɔ ɔ se ɔ, a dɔ a yi nɛ a kuɔ kɛ gu Bashan blɔ ɔ nɔ kɛ ho. Kɛkɛ nɛ Og, nɛ ji Bashan matsɛ ɔ kɛ e we bi ɔmɛ tsuo je kpo konɛ a kɛ mɛ nɛ ba hwu ta ngɛ Edrei.
34 Yehowa de Mose ke: “Koo ye lɛ gbeye, ejakaa ma ngɔ e kɛ e we bi ɔmɛ tsuo kɛ e zugba a kɛ wo o dɛ, nɛ o maa pee lɛ kaa bɔ nɛ o pee Sihon, nɛ ji Amor bi ɔmɛ a matsɛ ɔ nɛ e hi Heshbon ɔ.”
35 Lɔ ɔ he ɔ, a ya nɔ nɛ a fiaa e kɛ e binyumu ɔmɛ kɛ e we bi ɔmɛ tsuo ní kɛ ya si be nɛ a kpata e we bi ɔmɛ tsuo a hɛ mi, nɛ a ngɔ e zugba a.
Sisi Ningmahi
^ E sisi ji, “Hɛ Mi Kpatami.”
^ Aloo “pɔ tɔ ni ɔmɛ a klaa he.”
^ Aloo “wa klaa hiɔ.”
^ Aloo “sinɔhi nɛ ke a kɔ mo ɔ, e sãã nɔ kaa la.”
^ Aloo “sinɔhi nɛ ke a kɔ mo ɔ, e sãã nɔ kaa la.”
^ Aloo “Dɔ ɔ.”
^ Aloo “dɔ ɔmɛ.”
^ Aloo “dɔ ɔmɛ.”
^ Aloo “a si kplemi he ɔ.”
^ Aloo “Nyɛ hu nyɛ la.”
^ Ngɛ Hebri gbi mi ɔ, “Moab nga a nɔ.”
^ Baiblo komɛ de ke “tsɔɔ nga kplanaa a nɔ ɔ.”
^ Aloo “mahi tsuo nɛ ngɛ e sisi ɔ.”
^ Aloo “A ngɔ mahi nɛ ngɛ e sisi ɔ.”
