4 Mose 22:1-41
22 Lɔ ɔ se ɔ, Israel bi ɔmɛ pue nɔ nɛ a ya to si ngɛ Moab nga kplanaa a nɔ, ngɛ Yordan Pa a se, ngɛ Yeriko hanɔ.
2 Jehanɛ ɔ, Zipor binyumu Balak na níhi tsuo nɛ Israel pee Amor bi ɔmɛ ɔ,
3 nɛ Moab ye gbeye wawɛɛ ngɛ Israel bi ɔmɛ a he je, ejakaa a he hiɛ babauu nitsɛ; ngɛ anɔkuale mi ɔ, Israel bi ɔmɛ a he sawale nu Moab.
4 Lɔ ɔ he ɔ, Moab de Midian nikɔtɔma amɛ ke: “Nimli asafo nɛ ɔ ma kpata níhi tsuo nɛ bɔle wɔ ɔ hɛ mi kaa bɔ nɛ na ku kpeɔ nga ngɛ nga nɔ ɔ.”
Jamɛ a be ɔ mi ɔ, Zipor binyumu Balak ji Moab matsɛ.
5 E tsɔ nihi kɛ ya Beor binyumu Balaam ngɔ ngɛ Petor nɛ ngɛ Pa* a kasa nya, ngɛ lɛ nitsɛ e ma mi bi ɔmɛ a zugba a nɔ. E tsɔ nɛ a ya de lɛ ke: “Hyɛ! Ni komɛ je Egipt kɛ ba. Hyɛ! A ha zugba a nɔ,* nɛ a ngɛ ye hɛ mi haa.
6 I kpa mo pɛɛ nɛ o ba gbiɛ nimli nɛ ɔmɛ ha mi, ejakaa a he wa pe mi. Eko ɔ, ma nyɛ ma ye a nɔ kunimi, nɛ ma fiee mɛ kɛ je zugba a nɔ, ejakaa i le saminya kaa ke o jɔɔ nɔ ko ɔ, kɛkɛ a jɔɔ lɛ, nɛ ke o gbiɛ nɔ ko ɔ, kɛkɛ a gbiɛ lɛ.”
7 Enɛ ɔ he ɔ, Moab ma nikɔtɔma amɛ kɛ Midian ma nikɔtɔma amɛ pue nɔ kɛ ho Balaam ngɔ ya kɛ a dɛ mi sika nɛ́ a kɛ maa wo klaami ɔ he hiɔ, nɛ a ngɔ Balak sɛ gbi ɔ kɛ ya ha lɛ.
8 Kɛkɛ nɛ e de mɛ ke: “Nyɛɛ hwɔ hiɛ ɔ nyɔ nɛ ɔ mi, nɛ nɔ́ fɛɛ nɔ́ nɛ Yehowa ma de mi ɔ, ma ha nɛ nyɛɛ le.” Lɔ ɔ he ɔ, Moab ma nikɔtɔma amɛ hwɔ Balaam ngɔ.
9 Kɛkɛ nɛ Mawu ba Balaam ngɔ, nɛ e ba bi lɛ ke: “Nyumu nɛ ɔmɛ nɛ a ngɛ o ngɔ ɔ, mɛnɔmɛ ji mɛ?”
10 Balaam de anɔkuale Mawu ɔ ke: “Moab Matsɛ Balak, Zipor binyumu ɔ tsɔ kɛ ba de mi ke,
11 ‘Hyɛ! Ni ɔmɛ nɛ a je Egipt kɛ ma a ha zugba a tsuo nɔ.* Amlɔ nɛ ɔ, ba nɛ o ba gbiɛ mɛ ha mi. Eko ɔ, ma nyɛ ma ye a nɔ kunimi, nɛ ma fiee mɛ kɛ ho.’”
12 Se Mawu de Balaam ke: “O kɛ mɛ nɛ ko ya. Koo gbiɛ ni ɔmɛ, ejakaa a jɔɔ mɛ.”
13 Mɔtu ɔ, Balaam te si nɛ e ya de Balak ma nikɔtɔma amɛ ke: “Nyɛɛ ho nyɛ zugba a nɔ ya, ejakaa Yehowa kplɛɛ we kaa i kɛ nyɛ nɛ ya.”
14 Enɛ ɔ he ɔ, Moab ma nikɔtɔma amɛ kpale kɛ ho Balak ngɔ ya, nɛ a ya de lɛ ke: “Balaam kplɛɛ we kaa e kɛ wɔ maa ba.”
15 Se Balak kpale tsɔ ma nikɔtɔma kpahi nɛ́ a he hiɛ, nɛ́ a hɛ mi hu ngɛ nyami pe kekle ni ɔmɛ.
16 A ba Balaam ngɔ nɛ a ba de lɛ ke: “Nɔ́ nɛ Zipor binyumu Balak de ji nɛ ɔ nɛ, ‘I kpa mo pɛɛ, ko ha nɛ nɔ́ ko nɛ tsi o nya kaa o maa ba ye ngɔ,
17 ejakaa ma wo o hɛ mi nyami babauu, nɛ nɔ́ fɛɛ nɔ́ nɛ o ma de mi ke ma pee ɔ, ma pee. Enɛ ɔ he ɔ, i kpa mo pɛɛ, ba nɛ o ba gbiɛ nimli nɛ ɔmɛ ha mi.’”
18 Se Balaam ha Balak sɔmɔli ɔmɛ heto ke: “Ke Balak ha mi lɛ nitsɛ e we ɔ nɛ́ sika hiɔ kɛ sika tsu hyi lɛ tɔ po, i be nyɛe ma pee nɔ́ ko nɛ Yehowa ye Mawu ɔ fã we mi kaa ma pee, nɔ́ nyafii jio, nɔ́ ngua jio.
19 Se i kpa nyɛ pɛɛ, nyɛ hu nyɛɛ hwɔ hiɛ ɔ nyɔ nɛ ɔ mi, konɛ ma hyɛ nɔ́ nɛ Yehowa ma de mi ekohu.”
20 Nyɔ ɔ mi ɔ, Mawu ba Balaam ngɔ nɛ e ba de lɛ ke: “Ke nimli nɛ ɔmɛ ba tsɛ mo ɔ, lɛɛ o kɛ mɛ nɛ ya. Se mohu nɔ́ nɛ ma de mo ke o de ɔ, lɔ ɔ pɛ nɛ o de.”
21 Enɛ ɔ he ɔ, mɔtu ɔ, Balaam te si nɛ e wo e teji* ɔ nɔ ní, nɛ e kɛ Moab ma nikɔtɔma amɛ ho.
22 Se Mawu mi mi wo la kaa e yaa, nɛ Yehowa bɔfo ba da si ngɛ blɔ ɔ mi konɛ e tsi lɛ blɔ. Jamɛ a be ɔ mi ɔ, Balaam hi e teji ɔ nɔ kɛ yaa, nɛ e tsɔli enyɔ piɛɛ e he.
23 Benɛ teji ɔ na Yehowa bɔfo ɔ nɛ daa si ngɛ blɔ ɔ mi kɛ e dɛ mi klaate ɔ, e bɔ mɔde kaa e ma gba kɛ je blɔ ɔ nɔ kɛ sɛ nga a mi. Se Balaam bɔni teji ɔ kongomi konɛ e kpale kɛ ba blɔ ɔ nɔ.
24 Kɛkɛ nɛ Yehowa bɔfo ɔ ya da si ngɛ blɔ tokofii ko nɔ ngɛ wai ngmɔ enyɔ komɛ nɛ tɛ gbogbo ngɛ hiɛ kɛ hiɛ ɔ kpɛti;
25 Benɛ teji ɔ na Yehowa bɔfo ɔ, e ya kpasa gbogbo ɔ, nɛ e mia Balaam nane kɛ wo gbogbo ɔ he, kɛkɛ nɛ Balaam bɔni lɛ kongomi ekohu.
26 Jehanɛ ɔ, Yehowa bɔfo ɔ je nɛ e ya po lɛ ngɛ he ko tokofii, he nɛ blɔ ko blɔ ko be nɛ a kɛ plɛɔ he kɛ yaa hiɔ nɔ, loo muɔ nɔ.
27 Benɛ teji ɔ na Yehowa bɔfo ɔ, e bu si. Lɔ ɔ he ɔ, Balaam mi mi fu wawɛɛ, nɛ e ngɔ e dɛma tso ɔ kɛ kongo teji ɔ hluu.
28 Nyagbenyagbe ɔ, Yehowa ha nɛ teji ɔ tu munyu* nɛ e bi Balaam ke: “Mɛni i pee mo loko o kongo mi si etɛ sɔuu nɛ ɔ?”
29 Balaam ha teji ɔ heto ke: “Ejakaa o pee mi kuasia. Ke i hɛɛ klaate ngɛ ye dɛ ɔ, jinɛ i ko gbe mo!”
30 Kɛkɛ nɛ teji ɔ bi Balaam ke: “Anɛ pi imi ji o teji nɛ́ o hi nɔ o wami be tsuo kɛ ba si mwɔnɛ ɔ lo? Anɛ i pee mo nɔ́ ko kaa kikɛ hyɛ lo?” E ha heto ke: “Dɛbi!”
31 Kɛkɛ nɛ Yehowa bli Balaam hɛngmɛ, nɛ e na Yehowa bɔfo ɔ nɛ e daa si ngɛ blɔ ɔ mi, nɛ́ e hɛɛ klaate ngɛ e dɛ. Amlɔ nɔuu nɛ e kplã si, nɛ e kɛ e hɛ mi bu si.
32 Kɛkɛ nɛ Yehowa bɔfo ɔ bi lɛ ke: “Mɛni he je nɛ o kongo o teji ɔ si etɛ sɔuu ɔ? Hyɛ! imi nitsɛ i ba konɛ ma ba tsi mo blɔ, ejakaa blɔ nɛ o hia a, ye bua jɔɛ he.
33 Teji ɔ na mi nɛ e bɔ mɔde kaa e maa yu e he kɛ je ye he si etɛ sɔuu. Ke pi nɛ e yu e he ngɛ ye he ɔ, jinɛ i gbe mo momoomo, nɛ i he teji ɔ yi wami.”
34 Balaam de Yehowa bɔfo ɔ ke: “I pee yayami, ejakaa i li kaa mo lɛ o daa si ngɛ blɔ ɔ mi nɛ o kɛ mi ma kpemi. Amlɔ nɛ ɔ, ke blɔ nɛ i hia a dɛ ngɛ o hɛ mi ɔ, lɛɛ ma kpale ye se mɔ.”
35 Se Yehowa bɔfo ɔ de Balaam ke: “O kɛ nyumu ɔmɛ nɛ ho, se nɔ́ nɛ ma de mo ɔ, lɔ ɔ pɛ nɛ o de.” Lɔ ɔ he ɔ, Balaam kɛ Balak ma nikɔtɔma amɛ tsa blɔ hiami ɔ nɔ.
36 Benɛ Balak nu kaa Balaam ba a, amlɔ nɔuu nɛ e je kpo kɛ ho konɛ e kɛ lɛ nɛ ya kpe ngɛ Moab ma nɛ ngɛ Arnon dɔ ɔ nya a mi, ngɛ Moab zugba a huzu ɔ nya.
37 Balak bi Balaam ke: “Anɛ i tsɔ we ke a ba tsɛ mo kɛ ba lo? Mɛni he je nɛ o bɛ ɔ? Anɛ o susu kaa i be nyɛe nɛ ma wo o hɛ mi nyami babauu lo?”
38 Balaam ha Balak heto ke: “Amlɔ nɛ ɔ lɛɛ i ba. Se a maa ngmɛ mi blɔ nɛ ma de nɔ́ ko lɛɛ? Munyu nɛ Mawu maa ngɔ kɛ wo ye nya a, lɔ ɔ pɛ nɛ ma de.”
39 Enɛ ɔ he ɔ, Balaam kɛ Balak ho, nɛ a ba Kiriat Huzot.
40 Balak ngɔ nahi kɛ jijɔhi kɛ sã afɔle, nɛ e tsɔ nɛ a ngɔ eko ya ha Balaam kɛ ma nikɔtɔmahi nɛ a piɛɛ e he ɔ.
41 E nɔ jena mɔtu ɔ, Balak ngɔ Balaam kɛ kuɔ kɛ ya Bamot Baal bɔ nɛ pee nɛ e nyɛ nɛ e na ni ɔmɛ tsuo.
Sisi Ningmahi
^ E ngɛ heii kaa, Yufrate Pa a.
^ Aloo “zugba a hɛ mi.”
^ Aloo “zugba a hɛ mi.”
^ Ngɛ Hebri gbi mi ɔ, “teji yo.”
^ Ngɛ Hebri gbi mi ɔ, “Yehowa bli teji yo ɔ nya.”
