4 Mose 23:1-30
23 Kɛkɛ nɛ Balaam de Balak ke: “Moo ma afɔle sami la tɛ kpaago ngɛ hiɛ ɔ, nɛ́ o dla na ku kpaago kɛ agbosu kpaago ha mi.”
2 Oya nɔuu nɛ Balak pee kaa bɔ nɛ Balaam de lɛ ɔ. Nɛ Balak kɛ Balaam ngɔ na ku kake kɛ agbosu kake kɛ sã afɔle ngɛ afɔle sami la tɛ ɔmɛ eko fɛɛ eko nɔ.
3 Kɛkɛ nɛ Balaam de Balak ke: “Moo hi hiɛ ɔ ngɛ o sami afɔle ɔ he, konɛ ma ya. Eko ɔ, Yehowa kɛ mi ma ba kpe, nɛ nɔ́ fɛɛ nɔ́ nɛ e ma je ngɔ tsɔɔ mi ɔ, ma ba de mo.” Lɔ ɔ he ɔ, e ho yoku kpataa ko nɔ ya.
4 Kɛkɛ nɛ Mawu kɛ Balaam ya kpe, nɛ Balaam de lɛ ke: “I ma afɔle sami la tɛ kpaago ɔmɛ, nɛ i kɛ na ku kake kɛ agbosu kake sã afɔle ngɛ afɔle sami la tɛ ɔmɛ eko fɛɛ eko nɔ.”
5 Munyu nɛ Yehowa kɛ wo Balaam nya ji nɛ ɔ nɛ: “Kpale kɛ ya Balak ngɔ, nɛ nɔ́ nɛ o ma ya de lɛ ji nɛ ɔ nɛ.”
6 Lɔ ɔ he ɔ, e kpale kɛ ho nɛ e ya na kaa Balak kɛ Moab ma nikɔtɔma amɛ tsuo daa si ngɛ e sami afɔle ɔ he.
7 Kɛkɛ nɛ e tu munyu ngɛ abɛ mi ke:
“Balak, nɛ ji Moab matsɛ ɔ ngɔ mi kɛ je Aram kɛ ba,Kɛ je yoku ɔmɛ nɛ a ngɛ puje he ɔ a nɔ. E de ke:
‘Ba nɛ o ba gbiɛ Yakob ha mi.
Ee, ba nɛ o ba tu munyu kɛ si Israel.’
8 Mɛni he je nɛ ma gbiɛ nihi nɛ Mawu gbíɛ mɛ ɔ?
Nɛ mɛni he je nɛ ma tu munyu kɛ si nihi nɛ Yehowa tui munyu kɛ si mɛ ɔ?
9 I na mɛ kɛ je tɛ sa amɛ a nɔ,Nɛ i na mɛ kɛ je kpongu ɔmɛ a nɔ.
Mɛ pɛ ji nihi nɛ a ngɛ lejɛ ɔ;A kɛ a he bɔɛ je ma amɛ a he.
10 Mɛnɔ ma nyɛ maa kane Yakob tabo zu ɔ,Aloo e ma nyɛ maa kane Israel mi dlami eywiɛ mi kake ɔ?
Ha nɛ ma* gbo dalɔ gbenɔ,Nɛ́ ye nyagbe nɛ pee kaa a nyagbe.”
11 Kɛkɛ nɛ Balak de Balaam ke: “Mɛni o pee mi nɛ ɔ? I ngɔ mo kɛ ba kaa o ba gbiɛ ye he nyɛli, se hyɛ, jɔɔmi mohu nɛ o ba jɔɔ mɛ.”
12 E he nɔ ke: “Munyu fɛɛ munyu nɛ Yehowa kɛ maa wo ye nya a, anɛ pi lɔ ɔ nɛ e sa kaa ma de lo?”
13 Balak de lɛ ke: “I kpa mo pɛɛ, ba nɛ waa ya he kpa, he nɛ o ma nyɛ maa na mɛ ngɛ. O be mɛ tsuo nae, o maa na a kpɛti nihi bɔɔ pɛ. Moo gbiɛ mɛ ha mi ngɛ lejɛ ɔ.”
14 Lɔ ɔ he ɔ, e ngɔ lɛ kɛ ho Zofim nga a nɔ ya ngɛ Pisga yi mi, nɛ e ya ma afɔle sami la tɛ kpaago ngɛ lejɛ ɔ, nɛ e ngɔ na ku kake kɛ agbosu kake kɛ sã afɔle ngɛ afɔle sami la tɛ ɔmɛ eko fɛɛ eko nɔ.
15 Lɔ ɔ he ɔ, Balaam de Balak ke: “Moo hi hiɛ ɔ ngɛ o sami afɔle ɔ he nɛ́ i kɛ Mawu nɛ ya kpe ngɛ lejɛ ɔ.”
16 Nɛ Yehowa kɛ Balaam ya kpe, nɛ e kɛ munyu nɛ ɔ wo e nya: “Kpale kɛ ho Balak ngɔ ya, nɛ nɔ́ nɛ o ya de lɛ ji nɛ ɔ nɛ.”
17 Lɔ ɔ he ɔ, e kpale kɛ ba e ngɔ, nɛ e ba na kaa e ngɛ mlɛe ngɛ e sami afɔle ɔ he, nɛ Moab ma nikɔtɔma amɛ piɛɛ e he. Balak bi lɛ ke: “Mɛni Yehowa de?”
18 Kɛkɛ nɛ e tu munyu ngɛ abɛ mi ke:
“Balak, tee si, nɛ o bu tue.
Oo Zipor binyumu, moo bu mi tue.
19 Mawu ɔ, pi nɔmlɔ adesa ji lɛ nɛ e yeɔ lakpa,Nɛ pi nɔmlɔ bi ji lɛ nɛ e tsakeɔ e juɛmi.*
Anɛ ke e de nɔ́ ko ɔ, e be pee lo?
Ke e tu munyu ɔ, anɛ e be hae nɛ e ba mi lo?
20 Hyɛ! Jɔɔmi he je nɛ i ba ngɛ;Amlɔ nɛ ɔ, Mawu jɔɔ mɛ momo, nɛ i be nyɛe ma kpale se.
21 E ngmɛ́ blɔ nɛ a ngɔ kunya he wami ko kɛ pee nɔ́ ko kɛ si Yakob,Nɛ e ngmɛ́ blɔ nɛ haomi ko nɛ ba Israel nɔ.
Yehowa e Mawu ɔ kɛ mɛ ngɛ,Nɛ a jeɔ e yi wawɛɛ kaa matsɛ ngɛ a kpɛti.
22 Mawu ngɔ mɛ kɛ je Egipt kɛ ma.
E ngɛ kaa nga mi na ku kolihi kɛ ha mɛ.
23 Ejakaa okadi ko be nɛ tsɔɔ kaa nɔ́ yayami ko maa ba Yakob nɔ,Nɛ a kɛ klaami ko be nyɛe maa pee nɔ́ ko kɛ si Israel.
Amlɔ nɛ ɔ, a ma nyɛ ma de ngɛ Yakob, nɛ ji Israel he ke:
‘Nyɛɛ hyɛ nɔ́ nɛ Mawu pee!’
24 Ma nɛ maa te si kaa jata ji nɛ ɔ nɛ,E ma wo e he nɔ kaa jata.
E be si bue, ja e ye lohwehi nɛ e nine su a nɔNɛ e nu lohwehi nɛ e gbe ɔ a muɔ lolo.”
25 Kɛkɛ nɛ Balak de Balaam ke: “Ke o be nyɛe maa gbiɛ lɛ ɔ, lɛɛ koo jɔɔ lɛ mɔ.”
26 Balaam ha Balak heto ke: “I de we mo ke, ‘Ma pee nɔ́ fɛɛ nɔ́ nɛ Yehowa ma de’ ɔ lo?”
27 Balak de Balaam ke: “I kpa mo pɛɛ, ba nɛ ma ngɔ mo kɛ ya he kpa. Eko ɔ, anɔkuale Mawu ɔ maa kplɛɛ nɛ o gbiɛ mɛ ha mi ngɛ lejɛ ɔ.”
28 Enɛ ɔ he ɔ, Balak ngɔ Balaam kɛ ho Peor nɛ e hɛ mi tsɔɔ Yeshimon ɔ* yi mi ya.
29 Kɛkɛ nɛ Balaam de Balak ke: “Moo ma afɔle sami la tɛ kpaago ngɛ hiɛ ɔ, nɛ́ o dla na ku kpaago kɛ agbosu kpaago ha mi.”
30 Lɔ ɔ he ɔ, Balak pee nɔ́ nɛ Balaam de lɛ ɔ pɛpɛɛpɛ, nɛ e ngɔ na ku kake kɛ agbosu kake kɛ sã afɔle ngɛ afɔle sami la tɛ ɔmɛ eko fɛɛ eko nɔ.
Sisi Ningmahi
^ Aloo “ye klaa nɛ.”
^ Aloo “nɛ e piaa e he.”
^ Baiblo komɛ de ke “nga a nɔ ɔ; nga kplanaa a nɔ ɔ.”
