4 Mose 24:1-25
24 Benɛ Balaam na kaa e sa Yehowa hɛ mi kaa e jɔɔ Israel ɔ, e yɛ nɛ e ya hla okadihi nɛ tsɔɔ kaa nɔ́ yayami ko maa ba hu, se e plɛ e hɛ mi kɛ tsɔɔ nga a nɔ blɔ.
2 Benɛ Balaam wo e hɛngmɛ nɔ nɛ e na Israel bi ɔmɛ nɛ a to si wɛtso nya wɛtso nya a, Mawu mumi ɔ ba e nɔ.
3 Kɛkɛ nɛ e tu munyu ngɛ abɛ mi ke:
“Balaam, Beor binyumu ɔ munyu ji nɛ ɔ nɛ,Nyumu nɛ a bli e hɛngmɛ ɔ munyu ji nɛ ɔ nɛ,
4 Nɔ nɛ e nuɔ Mawu munyu ɔ,Nɛ́ e na Ope ɔ nina,Nɛ́ e ma e yi si nɛ e hɛngmɛhi fɔɔ si paa a munyu ji nɛ ɔ nɛ:
5 Oo Yakob, hyɛ bɔ nɛ o bo tsu ɔmɛ ngɛ fɛu ha,Oo Israel, hyɛ bɔ nɛ o sihi he ɔmɛ ngɛ fɛu ha!
6 A mi ka gagaaga kaa dɔgbahi,*Kaa abɔɔhi ngɛ pa tue,Kaa aloe nɛ Yehowa du,Kaa seda tsohi ngɛ nyu he.
7 Nyu yaa nɔ nɛ e dungɔɔ* kɛ jeɔ e lohwe he womi goga enyɔ ɔmɛ a mi.Nɛ a du e ngmɛdu* ngɛ nyu babauu he.
E matsɛ ɔ hu nɔ maa kuɔ pe Agag,Nɛ a ma wo e matsɛ yemi ɔ nɔ gojoo.
8 Mawu ngɔ lɛ kɛ je Egipt kɛ ma;E ngɛ kaa nga mi na ku kolihi kɛ ha mɛ.
E ma kpata je ma amɛ, mahi nɛ waa lɛ yi mi ɔ a hɛ mi,Nɛ e ma kpe a wuhi, nɛ e maa ngɔ e kɛ̃ɛ̃ mi bihi kɛ kpata a hɛ mi.
9 E bu si, e hwɔ si kaa jata,E ngɛ kaa jata, nɛ mɛnɔ nɛ e maa ka kaa e maa tsɛ̃ɛ̃ lɛ?
Nihi nɛ a jɔɔ mo ɔ, a jɔɔ mɛ,Nɛ nihi nɛ a gbiɛɔ mo ɔ, a gbiɛ mɛ.”
10 Kɛkɛ nɛ Balak mi mi fu Balaam wawɛɛ. Balak gbɔ vu wo Balaam yi, nɛ e de Balaam ke: “I tsɛ mo kɛ ba kaa o ba gbiɛ ye he nyɛli, se si etɛ sɔuu ji nɛ ɔ nɛ o ngɛ mɛ jɔɔe mohu.
11 Esɔ nɛ o je kɛ ho we mi ya. I to kaa ma wo o hɛ mi nyami babauu, se hyɛ! Yehowa ha nɛ hɛ mi nyami ɔ bɔ mo.”
12 Balaam ha Balak heto ke: “Anɛ i de we nihi nɛ o tsɔ ɔ ke,
13 ‘Ke Balak ha mi e we ɔ nɛ́ sika hiɔ kɛ sika tsu hyi lɛ tɔ po, i be nyɛe ma pee imi nitsɛ ye tsui nya ní nɛ́ ma pee nɔ́ ko nɛ Yehowa fã we mi kaa ma pee, nɔ́ kpakpa jio, nɔ́ yayami jio’ lo? Anɛ i de we ke, ‘Nɔ́ nɛ Yehowa ma de mi ɔ, lɔ ɔ pɛ ma de’ lo?
14 Amlɔ nɛ ɔ, i yaa ye we bi ɔmɛ a ngɔ. Ba nɛ ma de mo nɔ́ nɛ nimli nɛ ɔmɛ maa pee o we bi ɔmɛ hwɔɔ se.”*
15 Kɛkɛ nɛ e tu munyu ngɛ abɛ mi ke:
“Balaam, Beor binyumu ɔ munyu ji nɛ ɔ nɛ,Nyumu nɛ a bli e hɛngmɛ ɔ munyu ji nɛ ɔ nɛ,
16 Nɔ nɛ e nuɔ Mawu munyu ɔ,Kɛ nɔ nɛ e ngɛ Nɔ Nɛ E Nɔ Kuɔ Pe Kulaa a nile ɔ,Nɛ́ e na Ope ɔ he ninaBe mi nɛ e ma e yi si nɛ e hɛngmɛhi fɔɔ si paa a munyu ji nɛ ɔ nɛ:
17 Ma na lɛ, se pi amlɔ nɛ ɔ;Ma na lɛ, se pi piɔ.
Dodoe ko maa je Yakob mi kɛ ba,Nɛ matsɛ tso ko maa te si kɛ je Israel mi.
Nɛ e maa ywia Moab hɛ nya* kokooko,Nɛ e maa ywia basabasa peeli tsuo a yi koklodo.
18 Nɛ e maa ngɔ Edom kɛ pee e nɔ́,Ee, Seir he nyɛli ɔmɛ maa ngɔ Seir kɛ pee a nɔ́,Be mi nɛ Israel ma je kã nɛ e ngɛ ɔ kpo ɔ.
19 Nɔ ko maa je Yakob mi nɛ e maa ye nihi a nɔ kunimi,Nɛ e ma kpata nɔ fɛɛ nɔ nɛ piɛ ngɛ ma a mi ɔ hɛ mi.”
20 Benɛ e na Amalek ɔ, e tsa munyu nɛ e ngɛ tue ngɛ abɛ mi ɔ nɔ ke:
“Amalek ji kekleekle ma ngɛ je ma amɛ a kpɛti,Se nyagbenyagbe ɔ, e hɛ mi ma kpata.”
21 Benɛ e na Ken bi ɔmɛ ɔ, e tsa munyu nɛ e ngɛ tue ngɛ abɛ mi ɔ nɔ ke:
“O hi he ɔ ngɛ slɔkee, nɛ o tsu ɔ maa si ngɛ tɛ sa nɔ.
22 Se nɔ ko maa sã Ken bi ɔmɛ* pɛsɛpɛsɛ.
E piɛ bɔɔ nɛ Asiria ma ba nu mo nyɔguɛ kɛ ho?”
23 Nɛ e tsa munyu nɛ e ngɛ tue ngɛ abɛ mi ɔ nɔ ke:
“Ao! Ke Mawu pee nɔ́ nɛ ɔ, mɛnɔ yi ma ná wami?
24 Melehi maa je Kitim wo ɔ nya kɛ ba,Nɛ a maa wa Asiria yi mi,Nɛ a maa wa Eber yi mi,
Se lɛ hu e hɛ mi ma kpata pɛsɛpɛsɛ.”
25 Kɛkɛ nɛ Balaam te si nɛ e kpale kɛ ho e je he ya. Balak hu wo e blɔ.
Sisi Ningmahi
^ Aloo “dɔhi.”
^ Aloo “e dɛɔ.”
^ Aloo “nina.”
^ Aloo “ngɛ ligbi ɔmɛ a nyagbe.”
^ Aloo “Moab tue si.”
^ Ngɛ Hebri gbi mi ɔ, “Kain.”
