4 Mose 4:1-49
4 Jehanɛ ɔ, Yehowa kɛ Mose kɛ Aaron tu munyu, nɛ e de mɛ ke:
2 “Nyɛɛ kane Kohat binyumu ɔmɛ nɛ a ngɛ Levi binyumu ɔmɛ a kpɛti ɔ ngɛ a wekuhi a nya, kɛ a tsɛmɛ a we ɔmɛ a nya.
3 Nyɛɛ kane ni nɛmɛ nɛ a ye kɛ je jeha 30 kɛ ya si jeha 50 nɛ a piɛɛ kuu nɛ a tsuɔ ní ngɛ kpe he bo tsu ɔ mi ɔ he ɔ.
4 “Ní tsumi nɛ Kohat binyumu ɔmɛ ma tsu ngɛ kpe he bo tsu ɔ mi ji nɛ ɔ nɛ. E ji ní tsumi nɛ ngɛ klɔuklɔu pe kulaa.
5 Ke ma a maa hia kɛ je he nɛ a ngɛ ɔ kɛ ya he kpa a, Aaron kɛ e binyumu ɔmɛ maa ba kpe he bo tsu ɔ mi, nɛ a ma ba je tsu mi pomi bo ɔ kɛ ha Odase daka a nɔ.
6 A maa ngɔ nɔ́ nɔ hami nɔ́ nɛ a kɛ pa mi gbe he womi pee kɛ ha daka a nɔ, nɛ a maa ngɔ bo bluu kɛ ha nɔ, nɛ a maa ngɔ tsohi nɛ a kɛ hɛɛɔ daka a kɛ hɔɔ ga amɛ a mi.
7 “Jehanɛ se hu ɔ, a maa ngɔ bo bluu kɛ ha okplɔɔ nɛ a kɛ hɛ mi mami abolo ɔ pueɔ nɔ ɔ nɔ, nɛ a maa ngɔ kã amɛ, kɛ kplu wawi ɔmɛ, kɛ tsesi ɔmɛ, kɛ kplu nguahi nɛ a kɛ sãã dã afɔle ɔ kɛ ma nɔ; hɛ mi mami abolo ɔ nɛ hi nɔ.
8 A maa ngɔ bo tsutsu kɛ ha nɔ, nɛ a maa ngɔ nɔ́ nɔ hami nɔ́ nɛ a kɛ pa mi gbe he womi pee kɛ ha nɔ, nɛ a maa ngɔ tsohi nɛ a kɛ hɛɛɔ ɔ kɛ hɔɔ ga amɛ a mi.
9 Jehanɛ ɔ, a maa ngɔ bo bluu kɛ ha kane tso ɔ, kɛ e kane ɔmɛ, kɛ abɛɛle ɔmɛ, kɛ e la jemi ní ɔmɛ, kɛ e nu tɔ ɔmɛ nɛ a kɛ kane ɔ mi nu woɔ a mi ɔ a he.
10 A maa ngɔ nɔ́ nɔ hami nɔ́ nɛ a kɛ pa mi gbe he womi pee kɛ ha kane tso ɔ kɛ e he ní ɔmɛ tsuo a he, nɛ a kɛ maa ma tso nɛ a kɛ maa hɛɛ ɔ nɔ.
11 A maa ngɔ bo bluu kɛ ha sika tsu afɔle sami la tɛ ɔ nɔ, nɛ a maa ngɔ nɔ́ nɔ hami nɔ́ nɛ a kɛ pa mi gbe he womi pee kɛ ha nɔ, nɛ a maa ngɔ tsohi nɛ a kɛ maa hɛɛ ɔ kɛ hɔɔ ga amɛ a mi.
12 Lɔ ɔ se ɔ, a maa ngɔ níhi tsuo nɛ a kɛ sɔmɔɔ daa ngɛ he klɔuklɔu ɔ kɛ wo bo bluu mi, nɛ a maa ngɔ nɔ́ nɔ hami nɔ́ nɛ a kɛ pa mi gbe he womi pee kɛ ha he, nɛ a kɛ maa ma tso nɛ a kɛ maa hɛɛ ɔ nɔ.
13 “Á muɔɔ la zu* ɔ ngɛ afɔle sami la tɛ ɔ mi, nɛ́ a ngɔ bo nɛ hɛɛ alamua tu su nɛ a kɛ lohwe he womi pee kɛ ha nɔ.
14 A maa ngɔ níhi tsuo nɛ a kɛ tsuɔ ní ngɛ afɔle sami la tɛ ɔ he ɔ kɛ ma afɔle sami la tɛ ɔ nɔ: la jemi ní ɔmɛ, fɔɔki ɔmɛ, sofi ɔmɛ, kɛ tsesi ɔmɛ, nɛ ji níhi tsuo nɛ a kɛ tsuɔ ní ngɛ afɔle sami la tɛ ɔ he ɔ. A maa ngɔ nɔ́ nɔ hami nɔ́ nɛ a kɛ pa mi gbe he womi pee kɛ ha nɔ, nɛ a maa ngɔ tsohi nɛ a kɛ hɛɛɔ ɔ kɛ hɔɔ ga amɛ a mi.
15 “Ke ma a ngɛ hiae kɛ yaa he kpa a, Aaron kɛ e binyumu ɔmɛ nɛ a ngɔ nɔ́ kɛ ha ní klɔuklɔu ɔmɛ kɛ níhi tsuo nɛ a ngɛ he klɔuklɔu ɔ he. Ke a gbe nya a, Kohat binyumu ɔmɛ nɛ a ba nɛ a ba tloo, se a ko ta ní klɔuklɔu ɔmɛ a he, ke pi jã a, a ma gbo. Ní tsumi nɛ Kohat binyumu ɔmɛ ma tsu* ngɛ kpe he bo tsu ɔ he ji nɛ ɔ nɛ.
16 “Osɔfo Aaron binyumu Eleazar ji nɔ nɛ maa hyɛ nu nɛ a kɛ woɔ kane ɔmɛ a mi ɔ, tsopa kɛ e he via a, ngma afɔle nɛ a sãã daa a, kɛ nɔ pɔmi nu ɔ nɔ. Lɛ nɛ e maa hyɛ bo tsu ɔ tsuo, kɛ níhi tsuo nɛ ngɛ mi ɔ, kɛ he klɔuklɔu ɔ, kɛ níhi nɛ ngɛ lejɛ ɔ a nɔ.”
17 Yehowa ya nɔ nɛ e kɛ Mose kɛ Aaron tu munyu, nɛ e de mɛ ke:
18 “Nyɛ ko ha nɛ Kohat bi ɔmɛ a weku ɔmɛ a sisi nɛ gu ngɛ Levi bi ɔmɛ a kpɛti.
19 Nyɛɛ pee nɔ́ nɛ ɔ ha mɛ konɛ a yi nɛ ná wami, nɛ a ko ba gbo akɛnɛ a hɛ kɛ su níhi nɛ a ngɛ klɔuklɔu pe kulaa a he ɔ he je. Aaron kɛ e binyumu ɔmɛ nɛ a ya bo tsu ɔ mi nɛ a ya tsɔɔ a ti nɔ fɛɛ nɔ ní tsumi nɛ e ma tsu, kɛ nɔ́ nɛ e maa tloo.
20 Á ko ba bo tsu ɔ mi nɛ a ba na ní klɔuklɔu ɔmɛ hɛngmɛfia po, ke pi jã a, a ma gbo.”
21 Jehanɛ ɔ, Yehowa kɛ Mose tu munyu, nɛ e de lɛ ke:
22 “Moo kane Gershon binyumu ɔmɛ ngɛ a tsɛmɛ a we ɔmɛ a nya, kɛ a wekuhi a nya.
23 Moo ngma nihi tsuo nɛ a ye kɛ je jeha 30 kɛ ya si jeha 50 nɛ a piɛɛ kuu nɛ a ngɔ ní tsumi kɛ wo a dɛ ngɛ kpe he bo tsu ɔ mi ɔ he ɔ a biɛ.
24 Ní tsumi nɛ a kɛ wo Gershon bi ɔmɛ a weku ɔmɛ a dɛ, kɛ níhi nɛ a maa tloo ji nɛ ɔmɛ nɛ:
25 A maa tloo bo tsu ɔ he bo ɔmɛ, kpe he bo tsu ɔ, e nɔ hami nɔ́ ɔ, kɛ nɔ́ nɔ hami nɔ́ nɛ a kɛ pa mi gbe he womi pee nɛ ngɛ nɔ ɔ, kɛ kpe he bo tsu ɔ nya patesia a,*
26 bo nɛ a wo kɛ po yale ɔ, yale ɔ nɛ bɔle bo tsu ɔ kɛ afɔle sami la tɛ ɔ nya patesia a, kɛ a kpa amɛ, kɛ e he ní ɔmɛ tsuo, kɛ nɔ́ fɛɛ nɔ́ nɛ a kɛ sɔmɔɔ ngɛ lejɛ ɔ. A ní tsumi ji nɛ ɔ nɛ.
27 Aaron kɛ e binyumu ɔmɛ ji nihi nɛ a maa hyɛ ní tsumihi tsuo nɛ Gershon bi ɔmɛ ma tsu, kɛ tlomihi nɛ a maa tloo ɔ nɔ; nyɛɛ ngɔ ní nɛ ɔmɛ tsuo kɛ ha mɛ nɛ a tloo. Enɛ ɔ maa pee a ní tsumi.
28 Ní tsumi nɛ Gershon bi ɔmɛ a weku ɔmɛ ma tsu ngɛ kpe he bo tsu ɔ mi ji nɛ ɔ nɛ, nɛ nɔ nɛ maa hyɛ a nɔ ji osɔfo Aaron binyumu Itamar.
29 “Merari binyumu ɔmɛ lɛɛ, moo ngma a biɛ ngɛ a weku ɔ kɛ a tsɛmɛ a we ɔ nya.
30 Moo ngma nihi tsuo nɛ a ye kɛ je jeha 30 kɛ ya si jeha 50 nɛ a piɛɛ kuu nɛ a ngɔ ní tsumi kɛ wo a dɛ ngɛ kpe he bo tsu ɔ mi ɔ he ɔ a biɛ.
31 Ke a ngɛ sɔmɔe ngɛ kpe he bo tsu ɔ he ɔ, níhi nɛ a maa tloo ji nɛ ɔmɛ nɛ: bo tsu ɔ sima tso ɔmɛ, e tso tlalatlala amɛ, e titima amɛ, e nɔ dami ní ɔmɛ;
32 titima amɛ nɛ a kɛ po yale ɔ, a nɔ dami ní ɔmɛ, a he plɛɛko ɔmɛ, kɛ a he kpa amɛ, kɛ a he ní ɔmɛ tsuo, kɛ níhi tsuo nɛ a kɛ tsuɔ ní nɛ ɔmɛ a he ní ɔ. Nyɛ tsɛ a ti nɔ fɛɛ nɔ biɛ nɛ nyɛɛ tsɔɔ lɛ nɔ́ nɛ e maa tloo.
33 Bɔ nɛ Merari binyumu ɔmɛ a weku ɔmɛ ma plɛ kɛ tsu ní ngɛ kpe he bo tsu ɔ mi ji nɛ ɔ nɛ. Osɔfo Aaron binyumu Itamar lɛ maa hyɛ a nɔ.”
34 Lɔ ɔ he ɔ, Mose kɛ Aaron kɛ ganɔhi nɛ a ngɛ asafo ɔ mi ɔ ngma Kohat bi ɔmɛ a binyumu ɔmɛ a biɛ ngɛ a wekuhi kɛ a tsɛmɛ a we ɔ nya.
35 A ngma nihi tsuo nɛ a ye kɛ je jeha 30 kɛ ya si jeha 50 nɛ a piɛɛ kuu nɛ a ngɔ ní tsumi kɛ wo a dɛ ngɛ kpe he bo tsu ɔ mi ɔ he ɔ a biɛ.
36 Ni nɛmɛ nɛ a ngma a biɛ ngɛ a wekuhi a nya a tsuo a yibɔ ji 2,750.
37 Ni nɛ ɔmɛ ji nihi nɛ a ngma a biɛ ngɛ Kohat bi ɔmɛ a weku ɔmɛ a mi ɔ nɛ, nɛ ji nihi tsuo nɛ sɔmɔɔ ngɛ kpe he bo tsu ɔ mi ɔ. Mose kɛ Aaron ngma a biɛ kaa bɔ nɛ Yehowa fã Mose ɔ.
38 A ngma Gershon binyumu ɔmɛ a biɛ ngɛ a wekuhi kɛ a tsɛmɛ a we ɔ nya.
39 A ngma nihi tsuo nɛ a ye kɛ je jeha 30 kɛ ya si jeha 50 nɛ a piɛɛ kuu nɛ a ngɔ ní tsumi kɛ wo a dɛ ngɛ kpe he bo tsu ɔ mi ɔ he ɔ a biɛ.
40 Ni nɛmɛ nɛ a ngma a biɛ ngɛ a wekuhi a nya kɛ a tsɛmɛ a we ɔ nya a tsuo a yibɔ ji 2,630.
41 Nihi nɛ a ngma a biɛ ngɛ Gershon binyumu ɔmɛ a weku ɔmɛ a mi ji nɛ ɔ nɛ, nɛ ji nihi tsuo nɛ a sɔmɔɔ ngɛ kpe he bo tsu ɔ mi ɔ. Mose kɛ Aaron ngma a biɛ kaa bɔ nɛ Yehowa fã a.
42 A ngma Merari binyumu ɔmɛ a biɛ ngɛ a wekuhi kɛ a tsɛmɛ a we ɔ nya.
43 A ngma nihi tsuo nɛ a ye kɛ je jeha 30 kɛ ya si jeha 50 nɛ a piɛɛ kuu nɛ a ngɔ ní tsumi kɛ wo a dɛ ngɛ kpe he bo tsu ɔ mi ɔ he ɔ a biɛ.
44 Ni nɛmɛ nɛ a ngma a biɛ ngɛ a wekuhi a nya a, a yibɔ ji 3,200.
45 Nihi nɛ Mose kɛ Aaron ngma a biɛ ngɛ Merari binyumu ɔmɛ a weku ɔmɛ a mi kaa bɔ nɛ Yehowa fã Mose ɔ ji nɛ ɔ nɛ.
46 Mose kɛ Aaron kɛ Israel ganɔ ɔmɛ ngma Levi bi nɛ ɔmɛ tsuo a biɛ ngɛ a wekuhi kɛ a tsɛmɛ a we ɔmɛ a nya;
47 a ye kɛ je jeha 30 kɛ ya si jeha 50, nɛ a ha mɛ tsuo ní tsumi kaa a sɔmɔ, nɛ́ a tloo kpe he bo tsu ɔ kɛ e he ní ɔmɛ.
48 Nihi nɛ a ngma a biɛ ɔ tsuo a yibɔ ji 8,580.
49 A ngma a biɛ kaa bɔ nɛ Yehowa fã Mose ɔ, nɔ fɛɛ nɔ kɛ ní tsumi nɛ a ha lɛ kɛ tlomi nɛ e maa tloo; a ngma a biɛ kaa bɔ nɛ Yehowa fã Mose ɔ pɛpɛɛpɛ.
Sisi Ningmahi
^ Aloo “la zu nɛ zɔ pɔ lɛ,” nɛ ji la zu nɛ lohwehi nɛ a kɛ sãã afɔle ɔ a zɔ pɔ lɛ.
^ Aloo “Tlomi nɛ Kohat binyumu ɔmɛ maa tloo.”
^ Aloo “nya bo ɔ.”
