4 Mose 8:1-26
8 Yehowa kɛ Mose tu munyu, nɛ e de lɛ ke:
2 “O kɛ Aaron nɛ tu munyu nɛ o de lɛ ke, ‘Ke e su kane ɔmɛ ɔ, kane kpaago ɔmɛ a la a nɛ kpɛ kɛ hyɛ kane tso ɔ hɛ mi blɔ.’”
3 Lɔ ɔ he ɔ, nɔ́ nɛ Aaron pee ji nɛ ɔ nɛ: E su kane ɔmɛ ngɛ kane tso ɔ nɔ, konɛ a kpɛ kɛ hyɛ kane tso ɔ hɛ mi blɔ kaa bɔ nɛ Yehowa fã Mose ɔ.
4 Bɔ nɛ a pee kane tso ɔ ha ji nɛ ɔ nɛ: A kó sika tsu kɛ pee. A kó sika tsu kɛ pee e kpɛti tso ɔ kɛ ya si e mɔmɔ ɔmɛ a nɔ. A pee kane tso ɔ kaa bɔ nɛ Yehowa je ngɛ nina mi kɛ tsɔɔ Mose ɔ pɛpɛɛpɛ.
5 Yehowa kɛ Mose tu munyu ekohu, nɛ e de lɛ ke:
6 “Moo hla Levi bi ɔmɛ ngɛ Israel bi ɔmɛ a kpɛti, nɛ o tsu a he.
7 Bɔ nɛ o maa tsu a he ha ji nɛ ɔ nɛ: Mo fĩa nyu nɛ a kɛ fɔɔ yayami ngɛ nɔ he ɔ kɛ pue a nɔ, nɛ́ a ngɔ yi sɛmi ha kɛ kpa a he bwɔmi tsuo, nɛ́ a fɔ a tadehi a he, nɛ́ a tsu a he.
8 Lɔ ɔ se ɔ, á ngɔ na ku wayoo kake kɛ e he ngma afɔle nɛ a kɛ mamu bukɔbukɔ nɛ́ a kɛ nu futu mi pee, nɛ́ mo hu o ngɔ na ku wayoo kpa nɛ a kɛ maa sã yayami afɔle.
9 Nɛ́ o ngɔ Levi bi ɔmɛ kɛ ba kpe he bo tsu ɔ hɛ mi, nɛ o bua Israel bi ɔmɛ a we asafo ɔ tsuo nya.
10 Ke o ngɔ Levi bi ɔmɛ kɛ ba Yehowa hɛ mi ɔ, Israel bi ɔmɛ nɛ a ngɔ a nine kɛ pue Levi bi ɔmɛ a nɔ.
11 Aaron nɛ ngɔ Levi bi ɔmɛ kɛ ha* ngɛ Yehowa hɛ mi kaa afɔle nɛ a fɔ̃ɔ nɛ Israel bi ɔmɛ kɛ ha, konɛ a tsu Yehowa sɔmɔmi ní tsumi ɔ.
12 “Kɛkɛ ɔ, Levi bi ɔmɛ nɛ a ngɔ a nine kɛ pue na ku ɔmɛ a yi mi. Lɔ ɔ se ɔ, ngɔɔ kake kɛ sã yayami afɔle, nɛ o ngɔ kake ɔ hu kɛ sã sami afɔle ha Yehowa kɛ kpata ha Levi bi ɔmɛ.
13 Nɛ́ o ha nɛ Levi bi ɔmɛ nɛ a da si ngɛ Aaron kɛ e binyumu ɔmɛ a hɛ mi, nɛ o ngɔ mɛ kɛ ha* kaa afɔle nɛ a fɔ̃ɔ, nɛ a ngɔ kɛ ha Yehowa.
14 Mo je Levi bi ɔmɛ ngɛ Israel bi ɔmɛ a kpɛti, nɛ Levi bi ɔmɛ maa pee ye níhi.
15 Lɔ ɔ se ɔ, Levi bi ɔmɛ maa ba nɛ a ma ba sɔmɔ ngɛ kpe he bo tsu ɔ mi. Bɔ nɛ o ma plɛ kɛ tsu a he konɛ o ngɔ mɛ kɛ ha* kaa afɔle nɛ a fɔ̃ɔ ji nɛ ɔ nɛ.
16 Ejakaa a ji nihi nɛ a ngɔ mɛ kɛ ha; a je mɛ kɛ je Israel bi ɔmɛ a kpɛti kɛ ha mi. Ma ngɔ mɛ kɛ to Israel bi ɔmɛ a kekleekle bimɛ tsuo* a nane mi kɛ ha imi nitsɛ ye he.
17 Ejakaa ye níhi ji Israel bi ɔmɛ a kekleekle bimɛ tsuo, nimli jio, lohwehi jio. I tsu a he kɛ ha ye he ligbi nɛ i gbe Egipt zugba a nɔ kekleekle bimɛ ɔmɛ tsuo ɔ.
18 Ma ngɔ Levi bi ɔmɛ kɛ to Israel bi ɔmɛ a kekleekle bimɛ tsuo a nane mi.
19 Ma hla Levi bi ɔmɛ kɛ je Israel bi ɔmɛ a kpɛti nɛ ma ngɔ mɛ kɛ ha Aaron kɛ e binyumu ɔmɛ kaa nihi nɛ a ngɔ mɛ kɛ ha, konɛ a sɔmɔ ngɛ Israel bi ɔmɛ a nane mi ngɛ kpe he bo tsu ɔ mi, nɛ a kpata kɛ ha Israel bi ɔmɛ ngɛ a yayami he, konɛ e ko ba kaa Israel bi ɔmɛ maa hɛ mɛ kɛ su he klɔuklɔu ɔ he, nɛ́ haomi nɛ ba a nɔ.”
20 Mose kɛ Aaron kɛ Israel bi ɔmɛ a we asafo ɔ tsuo pee nɔ́ nɛ ɔ ha Levi bi ɔmɛ. Níhi tsuo nɛ Yehowa fã Mose ke e pee ha Levi bi ɔmɛ ɔ, jã nɛ Israel bi ɔmɛ pee ha mɛ.
21 Lɔ ɔ he ɔ, Levi bi ɔmɛ tsu a he nɛ a fɔ a tade ɔmɛ a he, nɛ lɔ ɔ se ɔ, Aaron ngɔ mɛ kɛ ha* kaa afɔle nɛ a fɔ̃ɔ ngɛ Yehowa hɛ mi. Jehanɛ ɔ, Aaron kpata ha mɛ konɛ a he nɛ tsɔ.
22 Lɔ ɔ se ɔ, Levi bi ɔmɛ sɛ kpe he bo tsu ɔ mi konɛ a ya sɔmɔ ngɛ Aaron kɛ e binyumu ɔmɛ a hɛ mi. Bɔ nɛ Yehowa fã Mose kaa e pee Levi bi ɔmɛ ɔ, jã nɛ a pee mɛ.
23 Jehanɛ ɔ, Yehowa kɛ Mose tu munyu, nɛ e de lɛ ke:
24 “Munyu nɛ nyɛɛ se nɛ ɔ kɔɔ Levi bi ɔmɛ a he: Ke nyumu ko ye kɛ je jeha 25 kɛ yaa a, é ya piɛɛ nihi nɛ a sɔmɔɔ ngɛ kpe he bo tsu ɔ mi ɔ a he.
25 Se ke e ye jeha 50 ɔ, é je sɔmɔmi kuu ɔ mi, nɛ́ e ko sɔmɔ hu.
26 E ma nyɛ maa ye bua e nyɛminyumu ɔmɛ nɛ a tsuɔ ní ngɛ kpe he bo tsu ɔ mi ɔ, se lɛ nitsɛ lɛɛ a ko ngɔ ní tsumi pɔtɛɛ ko kɛ wo e dɛ ngɛ lejɛ ɔ. Bɔ nɛ o maa to Levi bi ɔmɛ, kɛ a ní tsumi ɔmɛ a he blɔ nya ha ji nɛ ɔ nɛ.”
Sisi Ningmahi
^ Ngɛ Hebri gbi mi ɔ, “Aaron nɛ fɔ̃ Levi bi ɔmɛ,” nɛ tsɔɔ kaa é ha nɛ a hi a hɛ mi yae, nɛ a hi a se bae.
^ Ngɛ Hebri gbi mi ɔ, “nɛ o fɔ̃ mɛ,” nɛ tsɔɔ kaa é ha nɛ a hi a hɛ mi yae, nɛ a hi a se bae.
^ Ngɛ Hebri gbi mi ɔ, “nɛ o maa fɔ̃ mɛ,” nɛ tsɔɔ kaa é ha nɛ a hi a hɛ mi yae, nɛ a hi a se bae.
^ Aloo “Israel bi ɔmɛ a kekleekle bi fɛɛ kekleekle bi nɛ bli fɔmi kotoku nya a.”
^ Ngɛ Hebri gbi mi ɔ, “Aaron fɔ̃ mɛ,” nɛ tsɔɔ kaa é ha nɛ a hi a hɛ mi yae, nɛ a hi a se bae.