5 Mose 1:1-46
1 Níhi nɛ Mose de Israel ma a tsuo ngɛ Yordan kpokpa a nɔ ngɛ nga a nɔ, nɛ́ ji nga kplanaa a ngɛ Suf hɛ mi ɔ, nɛ ngɛ Paran, Tofel, Laban, Hazerot, kɛ Dizahab a kpɛti ɔ ji nɛ ɔ nɛ.
2 Kɛ je Horeb kɛ yaa Kadesh Barnea a, ke o gu blɔ nɛ be ngɛ Seir Yoku ɔmɛ a he ɔ, e ma he mo ligbi 11.
3 Ngɛ jeha nyingmi eywiɛne ɔ mi ngɛ nyɔhiɔ nyɔngma kɛ kake ɔ we kekleekle ligbi ɔ nɔ ɔ, Mose de Israel bi ɔmɛ* níhi tsuo nɛ Yehowa fã lɛ ke e de mɛ ɔ.
4 Nɔ́ nɛ ɔ ya nɔ benɛ e ye Amor bi ɔmɛ a matsɛ Sihon nɛ e hi Heshbon ɔ, kɛ Bashan Matsɛ Og nɛ e hi Ashtarot ngɛ Edrei ɔ a nɔ kunimi ɔ se.
5 Mose bɔni Mlaa nɛ ɔ mi tsɔɔmi ngɛ Yordan kpokpa a nɔ ngɛ Moab zugba a nɔ, nɛ e de ke:
6 “Yehowa wa Mawu ɔ de wɔ ngɛ Horeb ke, ‘Nyɛ se kɛ ngɛ yoku nɛ ɔmɛ a nɔ.
7 Nyɛɛ dɔ nyɛ yi nɛ nyɛɛ ya Amor bi ɔmɛ a yoku ɔmɛ a nɔ, kɛ ya a kpɔ mi bi ɔmɛ tsuo a ngɔ ngɛ Araba a, ngɛ yoku ɔmɛ a nɔ, Shefela a, Negeb ɔ, kɛ wo ɔ nya, nɛ ji Kanaan bi ɔmɛ a zugba a nɔ, kɛ Lebanon* kɛ kuɔ kɛ ya pa ngua a, nɛ ji Yufrate pa a he.
8 Hyɛ, i ngɔ zugba a kɛ ngɛ nyɛ hae. Nyɛɛ ya nɛ nyɛ ya ngɔ zugba nɛ Yehowa kã nyɛ tsɛmɛ Abraham, Isak, kɛ Yakob kita kaa e kɛ ma ha a kɛ a nina* nɛ maa ba ngɛ a se ɔ.’
9 “Nɛ i de nyɛ jamɛ a be ɔ mi ke, ‘Imi nɔ kake too i be nyɛe ma hyɛ nyɛ nɔ.
10 Yehowa nyɛ Mawu ɔ ha nɛ nyɛ he hiɛ, nɛ mwɔnɛ ɔ, nyɛ he hiɛ babauu kaa hiɔwe dodoehi.
11 Yehowa nyɛ nɛmɛ a Mawu ɔ nɛ́ ha nɛ nyɛ he nɛ hiɛ pe bɔ nɛ nyɛ ngɛ ɔ kɛ bɔ he si akpe, nɛ e jɔɔ nyɛ kaa bɔ nɛ e wo nyɛ si ɔ.
12 Kɛ imi nɔ kake ma plɛ kɛ tloo nyɛ tlomi ɔmɛ kɛ nyɛ haomi ɔmɛ, nɛ́ ma da nyɛ pɛ ɔmɛ a nya ha kɛɛ?
13 Nyɛɛ hla nyumuhi nɛ a ngɛ juɛmi, nɛ a le ní, nɛ a ngɛ níhi a si kpami kɛ je nyɛ wɛtso ɔmɛ a mi, nɛ́ ma pee mɛ nyɛ nyatsɛmɛ.’
14 Nyɛ ha mi heto ke, ‘Nɔ́ nɛ o de wɔ ke waa pee ɔ da.’
15 Lɔ ɔ he ɔ, i ngɔ nyɛ wɛtso ɔmɛ a nya dali ɔmɛ, nyumuhi nɛ́ a ngɛ juɛmi kɛ níhi a si kpami ɔ, nɛ i pee mɛ nikɔtɔmahi ngɛ nyɛ nya, nimli akpehi a nya dali, nimli lafahi a nya dali, nimli nyingmi enuɔɔnuɔ a nya dali, nimli nyɔngmahi a nya dali, kɛ nikɔtɔmahi ngɛ nyɛ wɛtso ɔmɛ a nya.
16 “Jamɛ a be ɔ mi ɔ, i kɛ blɔ tsɔɔmi ha nyɛ kojoli ɔmɛ ke, ‘Ke nyɛ ngɛ nyɛ nyɛmimɛ ɔmɛ a kpɛti sane kojoe ɔ, nyɛɛ kojo a kpɛti ngɛ dami nya, nɔ ko kɛ e nyɛmi jio, e kɛ ma se no jio.
17 Nyɛ ko hyɛ nɔ hɛ mi ngɛ kojomi mi. Nyɛɛ bu nɔ nyafii tue kaa bɔ nɛ nyɛ maa bu nɔ ngua tue ɔ. Nyɛ ko ye adesa hɛ mi gbeye, ejakaa kojomi ɔ, Mawu nɔ́; nɛ ke sane ko he wa tsɔ ha nyɛ ɔ, nyɛ kɛ ba fɔ ye hɛ mi, nɛ ma ye sane ɔ.’
18 Jamɛ a be ɔ mi ɔ, i ngɔ blɔ tsɔɔmi kɛ ha nyɛ ngɛ níhi tsuo nɛ e sa kaa nyɛɛ pee ɔ he.
19 “Kɛkɛ nɛ wa je Horeb, nɛ wa nyɛɛ kɛ gu nga kplanaa nɛ nɔ ngɛ gbeye nɛ́ nyɛ na a nɔ, nɛ wa gu blɔ nɛ yaa Amor bi ɔmɛ a yoku ɔmɛ a nɔ ɔ kaa bɔ nɛ Yehowa wa Mawu ɔ fã wɔ ɔ, nɛ nyagbenyagbe ɔ, wa ba su Kadesh Barnea.
20 Kɛkɛ nɛ i de nyɛ ke, ‘Nyɛ ba su Amor bi ɔmɛ a yoku ɔmɛ nɛ́ Yehowa wa Mawu ɔ kɛ ngɛ wɔ hae ɔmɛ a nɔ.
21 Hyɛ, Yehowa nyɛ Mawu ɔ ngɔ zugba a kɛ ha nyɛ. Nyɛɛ kuɔ kɛ ya nɛ nyɛ ya ngɔ zugba a kaa bɔ nɛ Yehowa nyɛ nɛmɛ a Mawu ɔ de nyɛ ɔ. Nyɛ ko ye gbeye, nɛ nyɛ tsui ko po hulɔ.’
22 “Se nyɛ tsuo nyɛ ba ye ngɔ nɛ nyɛ ba de ke, ‘Nyɛ ha nɛ waa tsɔ nyumuhi kɛ sɛ wa hlami nɛ a ya hyɛ bɔ nɛ zugba a ngɛ ha ha wɔ, nɛ́ a ba bɔ wɔ amaniɛ konɛ waa na he nɛ e sa kaa waa gu, kɛ mahi nɛ wa ma ya pã si ngɛ a nɔ.’
23 Ga womi ɔ da ngɛ ye hɛ mi, lɔ ɔ he ɔ, i hla nihi 12 ngɛ nyɛ nyumu ɔmɛ a kpɛti, i hla nɔ kake ngɛ wɛtso fɛɛ wɛtso mi.
24 A je nɛ a kuɔ kɛ ho yoku ɔmɛ a nɔ ya, nɛ a ya su Eshkol Dɔgba a* mi, nɛ a ya kpá lejɛ ɔ si.
25 A ngɔ zugba a nɔ tso yiblii ɔ eko kɛ ba ha wɔ, nɛ a ba bɔ wɔ amaniɛ ke, ‘Zugba nɛ Yehowa wa Mawu ɔ kɛ ngɛ wɔ hae ɔ hi.’
26 Se nyɛ kua kaa nyɛ maa kuɔ kɛ ya, nɛ nyɛ tsɔ atuã kɛ si Yehowa nyɛ Mawu ɔ fami ɔ.
27 Nyɛ ya nɔ nɛ nyɛ tu munyu huitihuiti ngɛ nyɛ bo tsu ɔmɛ a mi, nɛ nyɛ de ke, ‘Akɛnɛ Yehowa sume wɔ he je nɛ e je wɔ kɛ je Egipt zugba a nɔ kɛ ba konɛ e kɛ wɔ nɛ ba ha Amor bi ɔmɛ nɛ a kpata wa hɛ mi ɔ nɛ.
28 Wa sume nɛ wa maa ya lejɛ ɔ. Wa nyɛmimɛ ɔmɛ ha nɛ wa tsui po* be mi nɛ a de ke, “A ji nihi nɛ a ti nɛ a ka pe wɔ, nɛ a ma amɛ hu kle nɛ a fia gbogbo nɛ ya hiɔwe ploplooplo kɛ wo a he, nɛ wa na Anak bi ɔmɛ hu ngɛ lejɛ ɔ.”’
29 “Lɔ ɔ he ɔ, i de nyɛ ke, ‘Nyɛ ko nu sawale, nɛ nyɛ ko ye mɛ gbeye.
30 Yehowa nyɛ Mawu ɔ maa sɛ nyɛ hlami, nɛ e maa hwu ha nyɛ kaa bɔ nɛ e pee ngɛ Egipt nɛ nyɛ nitsɛmɛ nyɛ na a.
31 Nɛ nyɛ na bɔ nɛ Yehowa nyɛ Mawu ɔ wo nyɛ ngɛ nga a nɔ kaa bɔ nɛ nyumu woɔ e bi, nɛ́ e kɛ nyɛ ya he fɛɛ he nɛ nyɛ ya a, kɛ ba si be nɛ nyɛ ba su hiɛmɛ nɛ ɔ.’
32 Se ngɛ enɛ ɔmɛ tsuo a se ɔ, nyɛ ná we hemi kɛ yemi ngɛ Yehowa nyɛ Mawu ɔ mi,
33 se lɛ nɛ e nyɛɛ nyɛ hɛ mi ngɛ blɔ ɔ nɔ kɛ hla hehi nɛ nyɛ maa to si ngɛ ha nyɛ. Nyɔ mi ɔ, e je e he kpo kaa la, nɛ piani ɔ, e je e he kpo kaa bɔku kɛ tsɔɔ nyɛ blɔ nɛ nyɛɛ gu nɔ.
34 “Jamɛ a be ɔ mi tsuo ɔ, Yehowa ngɛ níhi nɛ nyɛ ngɛ dee ɔ nue, nɛ e mi mi fu wawɛɛ, nɛ e kã kita ke,
35 ‘Yi nɔ yaya nɛ ɔ mi nyumu ɔmɛ a ti nɔ kake po be zugba kpakpa a nɛ i kã kita kaa ma ngɔ kɛ ha nyɛ tsɛmɛ ɔmɛ ɔ nae,
36 ja Yefune binyumu Kaleb pɛ. Lɛɛ lɛɛ e hɛngmɛ maa na zugba a, nɛ ma ngɔ zugba nɛ e ya nyɛɛ nɔ ɔ kɛ ha e kɛ e sisi bimɛ, ejakaa e kɛ e tsui tsuo nyɛɛ Yehowa se.
37 (Yehowa mi mi fu mi po ngɛ nyɛ he je, nɛ e de ke, “Mo hu o be lejɛ ɔ yae.
38 Nun binyumu Yoshua nɛ e daa si ngɛ o hɛ mi ɔ ji nɔ nɛ e maa ya zugba a nɔ. Wo lɛ he wami,* ejakaa lɛ nɛ e ma ha nɛ Israel nine maa su zugba a nɔ.”)
39 Jehanɛ hu ɔ, nyɛ bimɛ ɔmɛ nɛ nyɛ de ke a maa nuu mɛ ɔ, kɛ nyɛ binyumu ɔmɛ nɛ mwɔnɛ ɔ, a li kpakpa kɛ yayami ɔ, mɛ lɛ a maa ya zugba a nɔ, nɛ ma ngɔ kɛ ha mɛ konɛ a hi nɔ.
40 Se nyɛɛ lɛɛ, nyɛɛ kpale nyɛ se nɛ nyɛɛ gu Wo Tsu ɔ he blɔ ɔ nɔ kɛ ya nga a nɔ.’
41 “Kɛkɛ nɛ nyɛ de mi ke, ‘Wa pee yayami kɛ si Yehowa. Amlɔ nɛ ɔ, wa maa kuɔ kɛ ya nɛ wa ma ya hwu ta kaa bɔ nɛ Yehowa wa Mawu ɔ fã wɔ ɔ!’ Lɔ ɔ he ɔ, nyɛ ti nɔ fɛɛ nɔ wo e ta hwumi níhi, nɛ nyɛ susu kaa yoku ɔ kuɔmi maa pee gbɔjɔɔ.
42 Se Yehowa de mi ke, ‘De mɛ ke: “Nyɛ ko kuɔ kɛ ya nɛ nyɛ ya hwu ta, ejakaa i be nyɛ he piɛɛe. Ke nyɛ ya a, nyɛ he nyɛli ɔmɛ ma ya ye nyɛ nɔ kunimi.”’
43 Lɔ ɔ he ɔ, i kɛ nyɛ tu munyu, se nyɛ bui tue. Mohu ɔ, nyɛ tsɔ atuã kɛ si Yehowa fami ɔ, nɛ nyɛɛ kɛ he nɔ womi bɔ mɔde kaa nyɛ maa kuɔ kɛ ya yoku ɔ nɔ.
44 Kɛkɛ nɛ Amor bi ɔmɛ nɛ a ngɛ jamɛ a yoku ɔ nɔ ɔ je kpo nɛ a kɛ nyɛ ba kpe, nɛ a fiee nyɛ kaa bɔ nɛ hwohi fieeɔ nɔ ɔ, nɛ a gbɛ nyɛ kɛ fĩa kɛ je Seir kɛ ya si Horma tɔɔ.
45 Lɔ ɔ he ɔ, nyɛ kpale kɛ ba, nɛ nyɛ ba fo ya ngɛ Yehowa hɛ mi, se Yehowa bui nyɛ tue, nɛ e hyɛ we nyɛ hulɔ.
46 Lɔ ɔ he je nɛ nyɛ ya nɔ nɛ nyɛ hi Kadesh be babauu ɔ nɛ.
Sisi Ningmahi
^ Ngɛ Hebri gbi mi ɔ, “Israel binyumu ɔmɛ.”
^ E ngɛ heii kaa Lebanon yokuhi nɛ a tsa a sibi a nɔ ɔ.
^ Ngɛ Hebri gbi mi ɔ, “ngmɛdu.” Hyɛ Munyu Komɛ A Sisi Tsɔɔmi.
^ Aloo “Dɔ ɔ.”
^ Ngɛ Hebri gbi mi ɔ, “ha nɛ wa tsui sile.”
^ Baiblo komɛ de ke “Mawu wo lɛ he wami.”
