5 Mose 14:1-29
14 “Yehowa nyɛ Mawu ɔ bimɛ ji nyɛ. Nyɛ ko poo nyɛ he, nɛ nyɛ ko kpa nyɛ hɛ nya* hulɔ kɛ ha nɔ ko nɛ gbo.
2 Ejakaa o ji ma klɔuklɔu kɛ ha Yehowa o Mawu ɔ, nɛ Yehowa hla mo kɛ je mahi tsuo nɛ a ngɛ zugba a nɔ ɔ a kpɛti kaa o ba pee e ma, e weto ní klɛdɛɛ.*
3 “Koo ye nɔ́ ko nɛ a hiee.
4 Lohwehi nɛ nyɛ ma nyɛ maa ye ji nɛ ɔmɛ nɛ: na, jijɔ, apletsi,
5 afugbɛ, odabɔ, bayelɔ, nga mi apletsi, adowa, nga mi jijɔ, kɛ yoku nɔ jijɔ.
6 Nyɛ ma nyɛ maa ye lohwe fɛɛ lohwe nɛ e nane kokloto mi gba enyɔ, nɛ e gɔleɔ nɔ́ nɛ e yeɔ nɛ e kpale taa ekohu ɔ.
7 Se nyɛ ko ye lohwehi nɛ a gɔleɔ nɔ́ nɛ a yeɔ nɛ a kpale taa ekohu, aloo a nane koklotohi a mi gba nɛ a nyɛɛ se nɛ ɔmɛ: afukpɔngɔ, alɔngɔ, kɛ tɛ sa nɔ kpi, ejakaa a gɔleɔ nɔ́ nɛ a yeɔ nɛ a kpale taa ekohu mohu lɛɛ, se a nane koklotohi a mi gba we. A he tsɔ we ha nyɛ.
8 Jehanɛ hu ɔ, nyɛ ko ye kpotoo, ejakaa e nane kokloto ɔ mi gba mohu lɛɛ, se e gɔle we nɔ́ nɛ e yeɔ nɛ́ e kpale taa ekohu. E he tsɔ we ha nyɛ. Nyɛ ko ye a lo, nɛ nyɛ ko ta a gbogboe he hulɔ.
9 “Níhi tsuo nɛ ngɛ nyu ɔmɛ a mi ɔ, nɔ́ nɛ nyɛ ma nyɛ maa ye ji nɛ ɔmɛ nɛ: Nɔ́ fɛɛ nɔ́ nɛ ngɛ se ngmó kɛ toto ɔ, nyɛ ma nyɛ maa ye.
10 Se nyɛ ko ye nɔ́ ko nɔ́ ko nɛ e be se ngmó kɛ toto. E he tsɔ we ha nyɛ.
11 “Nyɛ ma nyɛ maa ye lohwe pɛlitsɛ fɛɛ lohwe pɛlitsɛ nɛ he tsɔ.
12 Se nyɛ ko ye enɛ ɔmɛ: kɔle, pa nɔ kayo, okpoku yumu,
13 papalotsui tsutsu, papalotsui yumu, kayo slɔɔtohi tsuo,
14 kuakualabite slɔɔtohi tsuo,
15 duguma, klomi, pa nɔ lahuɛ, kayo slɔɔtohi tsuo,
16 klomi wayo, klomi tuegagatsɛ, omiɔhɔɔ,
17 dɔkɔdɔkɔ nyagagatsɛ, okpoku, pa nɔ dɔkɔdɔkɔ,
18 aklawa, abanga slɔɔtohi tsuo, sapɔ, kɛ apani.
19 Lohwe tsɔwi tsuo nɛ a ngɛ pɛli nɛ a nyɛɛɔ kutuu hu a he tsɔ we ha nyɛ. Nyɛ ko ye.
20 Nyɛ ma nyɛ maa ye lohwe fɛɛ lohwe nɛ teɔ nɛ e he tsɔ.
21 “Nyɛ ko ye lohwe gbogboe. O ma nyɛ maa ngɔ kɛ ha nubwɔ nɛ ngɛ o ma amɛ* a mi ɔ, nɛ e ma nyɛ maa ye, aloo o ma nyɛ maa jua ha nubwɔ. Ejakaa o ji ma klɔuklɔu kɛ ha Yehowa o Mawu ɔ.
“Koo ngɔ apletsi nyɛ nyɔ nyu kɛ hoo e bi.
22 “Bɔ fɛɛ bɔ nɛ ji ɔ, moo ngɔ o ngmɔ ní ɔmɛ a mi dlami nyɔngmanyɔngma mi kakaaka kɛ ba daa jeha.
23 Moo ye o ngma, o wai ehe, o nu, kɛ o na amɛ kɛ o to ɔmɛ a kekle bi ɔmɛ a mi dlami nyɔngmanyɔngma mi kakaaka ngɛ Yehowa o Mawu ɔ hɛ mi ngɛ he nɛ e maa hla kaa e biɛ ɔ nɛ hi ɔ, konɛ o kase bɔ nɛ o maa ye Yehowa o Mawu ɔ gbeye ha be fɛɛ be.
24 “Se ke lejɛ ɔ kɛ o he kɛ, nɛ blɔ ɔ kɛ tsɔ ha mo, nɛ o be nyɛe maa ngɔ ní ɔmɛ kɛ ya he nɛ Yehowa o Mawu ɔ maa hla kaa e biɛ ɔ nɛ hi ɔ (ejakaa Yehowa o Mawu ɔ maa jɔɔ mo),
25 lɛɛ o ma nyɛ maa pee lɛ sika, nɛ o hɛɛ sika a ngɛ o dɛ, nɛ o hia blɔ kɛ ya he nɛ Yehowa o Mawu ɔ maa hla a.
26 Kɛkɛ ɔ, o ma nyɛ maa ngɔ sika a kɛ he nɔ́ fɛɛ nɔ́ nɛ ma jlo mo*—nahi, jijɔhi, apletsihi, wai kɛ dã kpahi nɛ a nya wa, kɛ nɔ́ fɛɛ nɔ́ nɛ o suɔ;* nɛ o ye ngɛ lejɛ ɔ ngɛ Yehowa o Mawu ɔ hɛ mi nɛ o nya, o kɛ o we mi bi ɔmɛ.
27 Ko ma o hɛ kɛ fɔ Levi bi nɛ a ngɛ o ma amɛ a mi ɔ nɔ, ejakaa a be blɔ fa mi nɔ́ ko aloo weto ní ko ngɛ nyɛ kpɛti.
28 “Jeha etɛ fɛɛ jeha etɛ nyagbe ɔ, mo je niba ní nɛ o ná ngɛ jamɛ a jeha a mi ɔ mi dlami nyɔngmanyɔngma mi kakaaka a tsuo nɛ o kɛ ba to ngɛ o ma amɛ a mi.
29 Kɛkɛ ɔ, Levi bi nɛ a be blɔ fa mi nɔ́ ko aloo weto ní ngɛ nyɛ kpɛti ɔ, nubwɔ, awusa,* kɛ yalɔyo nɛ ngɛ o ma amɛ a mi ɔ ma ba ye nɛ a maa tɔ, nɛ Yehowa o Mawu ɔ maa jɔɔ mo ngɛ níhi tsuo nɛ o peeɔ ɔ mi.
Sisi Ningmahi
^ Ngɛ Hebri gbi mi ɔ, “nyɛ ko kpa nyɛ hɛngmɛ ɔmɛ a kpɛ.”
^ Aloo “e weto ní nɛ e fiɛ we he.”
^ Ngɛ Hebri gbi mi ɔ, “o we agbo ɔmɛ.”
^ Aloo “jlo o klaa.”
^ Aloo “nɔ́ fɛɛ nɔ́ nɛ o klaa ma bi mo.”
^ Ngɛ Hebri gbi mi ɔ, “bi nɛ e be tsɛ.”
