5 Mose 4:1-49
4 “Jehanɛ ɔ, nyɛ Israel bi, nyɛɛ bu blɔ tsɔɔmihi kɛ kojomihi nɛ i ngɛ nyɛ tsɔɔe kaa nyɛɛ ye a nɔ ɔ tue, bɔ nɛ pee nɛ nyɛ yi nɛ ná wami nɛ nyɛɛ ya nɛ nyɛ ya ngɔ zugba nɛ Yehowa nyɛ nɛmɛ a Mawu ɔ kɛ ngɛ nyɛ hae ɔ.
2 Nyɛ ko ngɔ nɔ́ ko kɛ piɛɛ fami nɛ i ngɛ nyɛ fãe ɔ he, nɛ nyɛ ko je nɔ́ ko ngɛ mi hulɔ, bɔ nɛ pee nɛ nyɛɛ ye Yehowa nyɛ Mawu ɔ famihi nɛ i ngɛ nyɛ fãe ɔ nɔ.
3 “Nyɛ nitsɛmɛ nyɛ na nɔ́ nɛ Yehowa pee benɛ ni komɛ ya ja Baal nɛ ngɛ Peor kɛ nyɛ hɛngmɛ; Yehowa nyɛ Mawu ɔ kpata nɔ fɛɛ nɔ nɛ e ya nyɛɛ Baal nɛ ngɛ Peor ɔ se ɔ hɛ mi ngɛ nyɛ kpɛti.
4 Se nyɛ ni nɛmɛ nɛ nyɛ mɛtɛ Yehowa nyɛ Mawu ɔ he ɔ lɛɛ, nyɛ tsuo nyɛ ngɛ wami mi mwɔnɛ ɔ.
5 Hyɛ, i tsɔɔ nyɛ blɔ tsɔɔmihi kɛ kojomihi kaa bɔ nɛ Yehowa ye Mawu ɔ fã mi ɔ, bɔ nɛ pee nɛ nyɛɛ ye a nɔ ngɛ zugba nɛ nyɛ yaa ngɔ ɔ nɔ.
6 Nyɛɛ ye a nɔ pɛpɛɛpɛ, ejakaa lɔ ɔ maa tsɔɔ kaa nyɛ ngɛ juɛmi kɛ nɔ́ sisi numi ngɛ nihi nɛ a maa nu blɔ tsɔɔmi nɛ ɔmɛ ɔ tsuo a hɛ mi, nɛ a ma de ke, ‘Nɔ́ jemi ko be he kaa ma kpetekpleenyɛ nɛ ɔ ji nihi nɛ a ngɛ juɛmi kɛ nɔ́ sisi numi.’
7 Ejakaa ma kpetekpleenyɛ te nɛɛ nɛ e mawuhi ngɛ e kasa nya kaa bɔ nɛ Yehowa wa Mawu ɔ ngɛ wa kasa nya be fɛɛ be nɛ wa ma tsɛ lɛ ɔ?
8 Nɛ ma kpetekpleenyɛ te nɛɛ nɛ e ngɛ blɔ tsɔɔmihi kɛ kojomihi nɛ a da kaa Mlaa nɛ ɔmɛ tsuo nɛ i kɛ ngɛ nyɛ hae mwɔnɛ ɔ?
9 “Moo hyɛ nɛ hi, nɛ o hɛ nɛ hi o he nɔ saminya,* bɔ nɛ pee nɛ o hɛ nɛ ko je níhi nɛ o hɛngmɛ na a nɔ, konɛ a ko je o tsui mi o wami ligbi ɔmɛ tsuo. Jehanɛ se hu ɔ, mo ha nɛ o bimɛ ɔmɛ kɛ o bibimɛ ɔmɛ nɛ a le.
10 Ligbi nɛ o da si ngɛ Yehowa o Mawu ɔ hɛ mi ngɛ Horeb ɔ, Yehowa de mi ke, ‘Bua ni ɔmɛ a nya ha mi nɛ́ ma ha nɛ a nu ye munyu ɔmɛ, bɔ nɛ pee nɛ a kase bɔ nɛ a maa ye mi gbeye a wami ligbi ɔmɛ tsuo ngɛ zugba a nɔ ɔ, konɛ a tsɔɔ a bimɛ ɔmɛ.’
11 “Lɔ ɔ he ɔ, nyɛ hɛ nyɛ kɛ ba nɛ nyɛ ba da si ngɛ yoku ɔ sisi, nɛ yoku ɔ ngɛ tsoe kɛ la, nɛ la a ya hiɔwe ploplooplo;* nɛ diblii kɛ bɔku kpii wo nɛ kɔɔhiɔ mi pee kusuu.
12 Kɛkɛ nɛ Yehowa kɛ nyɛ bɔni munyu tumi kɛ je la a mi. Nyɛ nu kaa nɔ ko ngɛ munyu tue, se nyɛ nɛ́ nɔ ko nɔ ko. Gbi kɛkɛ nɛ nyɛ nu.
13 Nɛ e jaje e somi nɛ e fã nyɛ kaa nyɛɛ ye nɔ ɔ kɛ tsɔɔ nyɛ—Kita Nyɔngma Amɛ.* Lɔ ɔ se ɔ, e ngma mɛ ngɛ tɛ tɛtlɛɛ enyɔ nɔ.
14 Jamɛ a be ɔ mi ɔ, Yehowa fã mi kaa ma tsɔɔ nyɛ blɔ tsɔɔmihi kɛ kojomihi nɛ́ nyɛ maa ye nɔ ngɛ zugba nɛ nyɛ yaa ngɔ ɔ nɔ.
15 “Lɔ ɔ he ɔ, nyɛɛ hyɛ nyɛ he* nɔ saminya—akɛnɛ nyɛ nɛ nɔ ko ligbi nɛ Yehowa kɛ nyɛ tu munyu ngɛ Horeb kɛ je la a mi ɔ—
16 bɔ nɛ pee nɛ nyɛ ko ba pee yayami nɛ nyɛɛ pee amaga nɛ hɛɛ nɔ́ ko su, aloo nyumu loo yo henɔ,
17 aloo lohwe ko nɛ ngɛ zugba a nɔ henɔ, aloo lohwe pɛlitsɛ ko nɛ teɔ ngɛ hiɔwe henɔ,
18 aloo nɔ́ saisaa nɛ sãã si ngɛ zugba a henɔ, aloo pa mi lo saisaa nɛ ngɛ nyu ɔmɛ a mi ngɛ zugba a sisi henɔ.
19 Nɛ ke nyɛ wo nyɛ yi nɔ nɛ nyɛ hyɛ hiɔwe, nɛ nyɛ na pu ɔ kɛ nyɔhiɔ ɔ kɛ dodoe ɔmɛ, nɛ ji hiɔwe tabo ɔ tsuo ɔ, nyɛ ko ha nɛ lɔ ɔ nɛ gbla nyɛ nɛ nyɛ ya kplã si ha mɛ, nɛ́ nyɛ sɔmɔ mɛ. Yehowa nyɛ Mawu ɔ ngɔ mɛ kɛ ha nihi tsuo nɛ a ngɛ hiɔwe sisi ɔ.
20 Se nyɛ ji nihi nɛ Yehowa ngɔ nyɛ, nɛ e je nyɛ kɛ je dade silemi flɔɔnɔɔ mi, kɛ je Egipt, konɛ nyɛ ba pee lɛ nitsɛ e weto ní,* kaa bɔ nɛ nyɛ ngɛ mwɔnɛ ɔ.
21 “Yehowa mi mi fu mi ngɛ nyɛ he je, nɛ e kã kita ke ma ko po Yordan Pa a, nɛ ma ko ya zugba kpakpa nɛ Yehowa o Mawu ɔ kɛ ngɛ mo hae kaa weto ní ɔ nɔ hulɔ.
22 Ejakaa imi lɛɛ ma gbo ngɛ zugba nɛ ɔ nɔ; i be Yordan Pa a poe, se nyɛɛ lɛɛ nyɛ maa po mi kɛ ya nɛ nyɛ ma ya ngɔ zugba kpakpa nɛ ɔ.
23 Nyɛɛ hyɛ nɛ hi nɛ nyɛ hɛ nɛ ko je Yehowa nyɛ Mawu ɔ somi ɔ nɛ e kɛ nyɛ so ɔ nɔ, nɛ nyɛ ko pee amaga ko, nɛ ji nɔ́ fɛɛ nɔ́ nɛ Yehowa nyɛ Mawu ɔ de nyɛ ke nyɛ ko pee ɔ henɔ ko ha nyɛ he.
24 Ejakaa Yehowa nyɛ Mawu ɔ ngɛ kaa la nɛ sãã nɔ́, Mawu nɛ e suɔ nɛ a ja lɛ pɛ.
25 “Ke o fɔ bimɛ kɛ bibimɛ, nɛ nyɛ se kɛ ngɛ zugba a nɔ, nɛ o pee ní yayamihi, nɛ o pee amaga saisaa ko, nɛ o pee yayami ngɛ Yehowa o Mawu ɔ hɛ mi kɛ wo e mi mi la a,
26 i ngɛ hiɔwe kɛ zugba odase tsɛe kɛ ngɛ nyɛ sie mwɔnɛ ɔ kaa bɔ fɛɛ bɔ nɛ ji ɔ, nyɛ hɛ mi ma kpata oya nɔuu ngɛ zugba nɛ nyɛ ma Yordan Pa a pomi kɛ ya ngɔ ɔ nɔ. Nyɛ se be kɛe ngɛ nɔ, mohu ɔ, a ma kpata nyɛ hɛ mi pɛsɛpɛsɛ.
27 Yehowa maa gbɛ nyɛ kɛ fia ma amɛ a mi, nɛ nyɛ kpɛti nihi bɔɔ pɛ nɛ a yi ma ná wami ngɛ mahi nɛ Yehowa maa fiee nyɛ kɛ ya a mi ɔ a mi.
28 Nyɛ ma ya sɔmɔ tso kɛ tɛ mawuhi nɛ nimli ngɔ a nine kɛ pee ngɛ lejɛ ɔ, mawuhi nɛ a hyɛ we nɔ́, nɛ́ a nui nɔ́, nɛ́ a yi ní, nɛ́ a nui nɔ́ he fu hulɔ.
29 “Ke nyɛ hla Yehowa nyɛ Mawu ɔ se blɔ ngɛ lejɛ ɔ kɛ nyɛ tsui tsuo kɛ nyɛ klaa* tsuo ɔ, bɔ fɛɛ bɔ nɛ ji ɔ, nyɛ maa na lɛ.
30 Ke pee se nɛ ní nɛ ɔmɛ tsuo ba o nɔ nɛ o hao wawɛɛ ɔ, kɛkɛ o maa kpale kɛ ba Yehowa o Mawu ɔ ngɔ nɛ o ma ba bu e gbi tue.
31 Ejakaa Yehowa o Mawu ɔ ji Mawu mɔbɔ nalɔ. E be mo kuae, nɛ e be o hɛ mi kpatae, nɛ somi nɛ e kã o nɛmɛ ɔmɛ kita ngɛ he ɔ hu, e hɛ be nɔ jee.
32 “Jehanɛ ɔ, mo kai blema lokoo benɛ a ná we nɛ a fɔ mo lolo ɔ, kɛ je ligbi nɛ Mawu bɔ adesa ngɛ zugba a nɔ ɔ; mo bi si kɛ je hiɔwe nyagbe he kake kɛ ya si hiɔwe nyagbe he kpa. Anɛ nɔ́ ngua ko kaa jã ba hyɛ, aloo a nu nɔ́ ko kaa jã hyɛ lo?
33 Anɛ ma kpa ko nu Mawu gbi nɛ ngɛ munyu tue ngɛ la mi kaa bɔ nɛ nyɛ nu ɔ, nɛ loloolo ɔ, a ngɛ wami mi lo?
34 Aloo anɛ Mawu ka kaa e kɛ kojomihi,* kɛ okadihi, kɛ nyakpɛ níhi, kɛ ta, kɛ kɔni si wami, kɛ he wami kpetekpleenyɛ,* kɛ gbeye níhi ma je ma ko kɛ je ma kpa ko mi kɛ ha e he hyɛ kaa bɔ nɛ Yehowa nyɛ Mawu ɔ pee ha nyɛ ngɛ Egipt ngɛ nyɛ nitsɛmɛ nyɛ hɛ mi ɔ lo?
35 A ha nɛ mo nitsɛ o na ní nɛ ɔmɛ bɔ nɛ pee nɛ o le kaa Yehowa ji anɔkuale Mawu ɔ nɛ; e se ɔ, Mawu kpa ko be.
36 E ha nɛ o nu e gbi kɛ je hiɔwe konɛ e kɛ tsɔse mo, nɛ e ha nɛ o na e la kpetekpleenyɛ ɔ ngɛ zugba a nɔ, nɛ o nu e munyuhi kɛ je la a mi.
37 “Akɛnɛ e suɔ nyɛ nɛmɛ ɔmɛ, nɛ e hla a nina a* ngɛ a se ɔ he je ɔ, e piɛɛ nyɛ he be mi nɛ e kɛ e he wami kpetekpleenyɛ ɔ je nyɛ kɛ je Egipt ɔ.
38 E fiee je mahi nɛ a kle nɛ a he wa pe nyɛ ngɛ nyɛ hɛ mi, bɔ nɛ pee nɛ e ngɔ nyɛ kɛ ba, nɛ́ e ngɔ a zugba a kɛ ha nyɛ kaa nyɛ weto ní kaa bɔ nɛ e ji mwɔnɛ ɔ.
39 Lɔ ɔ he ɔ, mwɔnɛ ligbi nɛ ɔ, mo ná nɛ o le, nɛ o ha nɛ e hi o tsui mi kaa Yehowa ji anɔkuale Mawu ngɛ hiɔwe kɛ zugba a nɔ. Nɔ kpa ko be hu.
40 Moo ye e blɔ tsɔɔmi ɔmɛ kɛ e fami ɔmɛ nɛ i ngɛ mo fãe mwɔnɛ ɔ nɔ, bɔ nɛ pee nɛ e hi ha mo, kɛ o bimɛ nɛ a maa ba ngɛ o se ɔ, konɛ o se nɛ kɛ ngɛ zugba nɛ Yehowa o Mawu ɔ kɛ ngɛ mo hae ɔ nɔ.”
41 Jamɛ a be ɔ mi ɔ, Mose hla ma etɛ ngɔ to ngɛ Yordan Pa a puje he je.
42 Ke nɔ ko nine kpa ngɛ e nyɛmi nɔmlɔ nɔ be mi nɛ e li e he be, nɛ́ pi nɛ e ngɛ lɛ nyɛe momo ɔ, e tu fo kɛ ho ma nɛ ɔmɛ eko mi ya nɛ e yi nɛ ná wami.
43 Ma amɛ ji nɛ ɔmɛ nɛ: E hla Bezer nɛ ngɛ nga a nɔ ngɛ yoku nɛ e yi mi fɔɔ si tɛtlɛɛ ɔ nɔ ɔ kɛ ha Reuben bi ɔmɛ, Ramot nɛ ngɛ Gilead ɔ kɛ ha Gad bi ɔmɛ, kɛ Golan nɛ ngɛ Bashan ɔ kɛ ha Manase bi ɔmɛ.
44 Jehanɛ ɔ, Mlaa nɛ Mose kɛ ha Israel bi ɔmɛ ji nɛ ɔ nɛ.
45 Enɛ ɔmɛ ji kaimihi, kɛ blɔ tsɔɔmihi, kɛ kojomihi nɛ Mose kɛ ha Israel bi ɔmɛ benɛ a je Egipt ɔ se,
46 ngɛ Yordan kpokpa a nɔ, ngɛ dɔgba nɛ hɛ mi tsɔɔ Bet Peor ɔ mi, ngɛ Amor bi ɔmɛ a Matsɛ Sihon nɛ e hi Heshbon ɔ zugba a nɔ, nɔ nɛ Mose kɛ Israel bi ɔmɛ ye e nɔ kunimi benɛ a je Egipt se ɔ.
47 Nɛ a ngɔ e zugba a, kɛ Bashan Matsɛ Og zugba a, Amor bi ɔmɛ a matsɛmɛ enyɔ ɔmɛ nɛ a hi Yordan kpokpa a puje he je ɔ,
48 kɛ je Aroer, nɛ ngɛ Arnon Dɔgba a* nya a, kɛ ya si Sion Yoku ɔ, nɛ ji Hermon ɔ he,
49 kɛ Araba a tsuo nɛ ngɛ Yordan kpokpa a puje he je ɔ, hluu kɛ ya si Araba Wo* ɔ nɛ ngɛ Pisga yoku ɔ sisi ɔ.
Sisi Ningmahi
^ Aloo “nɛ o hyɛ o klaa nɔ saminya.”
^ Ngɛ Hebri gbi mi ɔ, “nɛ la a ya su hiɔwe tsui mi.”
^ Ngɛ Hebri gbi mi ɔ, “Munyu Nyɔngma Amɛ.” A kpale tsɛɛ lɛ ke Dekalog.
^ Aloo “nyɛ klaa.”
^ Aloo “nyɛ ba pee e gbosi ní.”
^ Aloo “kahi.”
^ Ngɛ Hebri gbi mi ɔ, “kɛ nine nɛ e kpã mi.”
^ Ngɛ Hebri gbi mi ɔ, “ngmɛdu ɔ.”
^ Aloo “Arnon Dɔ ɔ.”
^ Nɛ ji, Ngo Wo ɔ, aloo Wo Gbogboe ɔ.
