Abɛ 18:1-24
18 Nɔ fɛɛ nɔ nɛ e tsɔɔ e he banee ɔ diɔ níhi nɛ lɛ nitsɛ e suɔ ɔ se;E kuaa níhi tsuo nɛ juɛmi ngɛ mi.*
2 Kuasia sume nɛ e kase nɔ́ ko nɔ́ ko;Mohu ɔ, e jeɔ e tsui mi níhi kpo.
3 Ke nɔ ko peeɔ yi wu tso ní ɔ, e hɛ mi ma puemi si,Nɛ hɛ mi si puemi kɛ zo lɛ nyɛɛɔ.
4 Adesa nya mi munyu ngɛ kaa nyuhi nɛ a mi kuɔ.
He nɛ juɛmi je ɔ ngɛ kaa pa nɛ ngɛ bee.
5 E dɛ kaa a kɛ hɛ mi hyɛmi maa ye sane kɛ ha yiwutsotsɛ,Nɛ e dɛ hu kaa a be dami sane yee ha dalɔ.
6 Kuasia nya mi munyu woɔ pɛ,Nɛ e nya haa nɛ a kongoɔ lɛ.
7 Kuasia nya mi munyu ji nɔ́ nɛ kpataa e hɛ mi,Nɛ e nya ji klama kɛ ha e wami.*
8 Nɔ he guɛ gbelɔ munyuhi ngɛ kaa niye ní ngɔngɔɛ;*A miɔ mɛ kɛ yaa mi mi tɔɔ.
9 Nɔ fɛɛ nɔ nɛ peeɔ hejɔ ngɛ e ní tsumi mi ɔ,E nyɛmi ji nɔ nɛ kpataa níhi* a hɛ mi.
10 Yehowa biɛ ɔ ji mɔ nɛ he wa.
E mi nɛ dalɔ tuu fo kɛ ya sɛɛ, nɛ e náa he piɛ pomi.*
11 Niatsɛ ní babauu ɔ ji e ma nɛ e fia gbogbo wo he;Ngɛ e susumi nya a, e ngɛ kaa he piɛ pomi gbogbo kɛ ha lɛ.
12 Ke adesa tsui wo e he nɔ ɔ, si gbeemi nyɛɛɔ se,Nɛ he si bami ngɔɔ hɛ mi nyami kɛ baa.
13 Ke nɔ ko ha sane heto loko e nu anɔkualehi nɛ ngɛ mi ɔ,E ji kuasia jemi kɛ hɛ mi si puemi.
14 Nɔ ko nɛ e kɔni mi jɔ̃ we ma nyɛ maa da hiɔ nya,Se mɛnɔ ma nyɛ maa da kɔni mi jɔ̃mi nya?
15 Nɔ nɛ nuɔ nɔ́ sisi ɔ, e tsui náa nile,Nɛ juɛmitsɛ tue hlaa nile se blɔ.
16 Adesa nike ní bliɔ blɔ ha lɛ;E haa nɛ e suu nimli nguahi a he.
17 Kekleekle nɔ nɛ e jajeɔ e sane ɔ, e peeɔ kaa nɔ́ nɛ e sane daKɛ ya si be nɛ nɔ nɛ kɛ lɛ ná sane ɔ baa nɛ e ba biɔ lɛ sanehi* konɛ a kɛ na anɔkuale ɔ.
18 Sɔ fɔmi poɔ pɛ seNɛ e buaa sane he kɛ haa he wali enyɔ nɛ a ngɛ nɔ́ he huae.*
19 Nyɛmi nɛ a tɔ̃ e nɔ ɔ kpatami yee pe ma nɛ a fia gbogbo wo he ngɔmi,Nɛ pɛ komɛ ngɛ nɛ a ngɛ kaa gbogbo nɛ he wa nya agbo se lami dadehi.
20 Munyu nɛ jeɔ adesa nya a ngɛ kaa niye ní nɛ ma ha nɛ e mi mi nɛ hyi tɔ;Yiblii nɛ e nya woɔ ɔ ma ha nɛ e tɔ.
21 Gbenɔ kɛ wami ngɛ lilɛ dɛ;Nihi nɛ a suɔ kaa a kɛ a lilɛ ma tsu ní ɔ, e sa nɛ a pɛtɛ nɔ́ nɛ maa je mi kɛ ba a he.
22 Nɔ nɛ ná yo kpakpa a, e ná nɔ́ kpakpa,Nɛ Yehowa dlooɔ lɛ.*
23 Ke ohiatsɛ ngɛ munyu tue ɔ, e kpaa pɛɛ,Se niatsɛ lɛɛ e haa sane heto basabasa.
24 Huɛmɛ komɛ ngɛ nɛ a pee klaalo kaa a maa ye a sibi awi,Se huɛ ko ngɛ nɛ e mɛtɛɛ nɔ he kpɛii pe nyɛmi.
Sisi Ningmahi
^ Aloo “E gbeɔ juɛmi tsuo he guɛ.”
^ Aloo “e klaa.”
^ Aloo “ngɛ kaa níhi nɛ a kɛ hɛ tsumi miɔ.”
^ Aloo “nihi.”
^ Ngɛ Hebri gbi mi ɔ, “nɛ a woɔ e nɔ kɛ yaa hiɔwe,” nɛ tsɔɔ kaa konɛ nine nɛ ko su e nɔ, nɛ́ e hi si slɔkee.
^ Aloo “baa nɛ e ba kpaa e mi.”
^ Ngɛ Hebri gbi mi ɔ, “Nɛ e gbaa nihi nɛ a ngɛ nɔ́ he huae ɔ a kpɛti.”
^ Aloo “Nɛ e hɛ mi baa nyami ngɛ Yehowa hɛ mi.”
