Abɛ 26:1-28
26 Kaa bɔ nɛ snoo sɛ́ mawulɛ be, nɛ́ hiɔmi hu sɛ́ ní kpami be ɔ,Jã nɛ hɛ mi nyami sɛ́ kuasia.
2 Kaa bɔ nɛ yi mi tomi ko he je nɛ lohwe pɛlitsɛ tuɔ fo nɛ odangmɔdangmɔ hu teɔ ɔ,Jã kɛ̃ nɛ gbiɛmi ko bɛ nɛ yi mi tomi pɔtɛɛ ko be he.*
3 Kpã ngɛ kɛ ha okpɔngɔ, kudɔmi kpã ngɛ kɛ ha teji,Nɛ tso ngɛ kɛ ha kuasiahi a se mi.
4 Ko ha kuasia heto ngɛ e kuasia jemi ɔ nya,Konɛ o ko ba pee kaa lɛ.*
5 Ha kuasia heto ngɛ e kuasia jemi ɔ nya,Konɛ e ko susu kaa e ji juɛmitsɛ.
6 Bɔ nɛ nɔ nɛ kuɔ lɛ nitsɛ e nanehi nɛ́ e peeɔ libɔɔ kɛ yeɔ e he awi ngɛ ɔ,Jã nɛ nɔ nɛ tuu sanehi kɛ woɔ kuasia dɛ ɔ hu ngɛ.
7 Bɔ nɛ glɔtsɛ nanehi bɛleɔ ngɛ e he kɛkɛ ɔ,*Jã nɛ abɛ ngɛ ngɛ kuasiahi a nya mi.
8 Bɔ nɛ tɛ nɛ a fĩ kɛ wo amlami mi ngɛ ɔ,Jã nɛ kuasia hɛ mi nyami womi ngɛ.
9 Bɔ nɛ mio tso ji ngɛ dã delɔ dɛ mi ɔ,Jã nɛ abɛ ji ngɛ kuasiahi a nya mi.
10 Bɔ nɛ kɛ̃ɛ̃ tsɛ̃lɔ nɛ e plaa nihi kɛkɛ* ngɛ ɔ,Jã nɛ nɔ nɛ ya bɔɔ kuasia aloo nihi nɛ a bee kɛkɛ apaa a hu ngɛ.
11 Bɔ nɛ gbe kpaleɔ kɛ yaa e vie he nɛ e ya yeɔ ɔ,Jã nɛ kuasia kpale ya jeɔ kuasia ekohu.
12 Anɛ o na nɔ ko nɛ e susuɔ kaa juɛmitsɛ ji lɛ lo?
Hɛ kɛ nɔ fɔmi ngɛ kɛ ha kuasia po pe lɛ.
13 Hejɔtsɛ deɔ ke: “Jata wayoo ko ngɛ gbɛjegbɛ ɔ nɔ,Jata nɛ wa ngɛ magbɛ ɔ nɔ!”*
14 Bɔ nɛ sinya yaa nɔ nɛ e plɛɔ ngɛ e plɛmi he ɔmɛ ɔ,*Jã nɛ hejɔtsɛ plɛɔ ngɛ e sa mi.
15 Hejɔtsɛ ngɔɔ e nine kɛ woɔ ní yemi tsesi mi,Se pɔ tɔɔ e he tsɔ kaa e maa kpale e nine ɔ kɛ ya e nya he.
16 Hejɔtsɛ susuɔ kaa e ngɛ juɛmiPe nihi kpaago nɛ a ha munyu heto nɛ juɛmi ngɛ mi.
17 Bɔ nɛ nɔ ko nɛ e nu gbe tuehi ngɛ ɔ,Jã nɛ nɔ ko nɛ e bee nɛ e mi mi fu ngɛ pɛ nɛ kɔ we e he ɔ* hu ngɛ.
18 Bɔ nɛ godotsɛ nɛ e fɔ̃ɔ ta hwumi níhi kɛ a nya la, nɛ e tsɛ̃ɔ kɛ̃ɛ̃ mi bihi nɛ kɛ gbenɔ baa* ngɛ ɔ,
19 Jã nɛ adesa nɛ sisiɔ e nyɛmi nɔmlɔ nɛ e deɔ ke, “Fiɛmi kɛkɛ nɛ i ngɛ fiɛe!” ɔ hu ngɛ.
20 He nɛ lɛ́ be ɔ, la gboɔ,Nɛ he nɛ he guɛ gbelɔ be ɔ, pɛ se poɔ ngɛ lejɛ ɔ.
21 Bɔ nɛ hã haa nɛ la sɛɔ nɛ lɛ́ haa nɛ la tsoɔ ɔ,Jã nɛ pɛ wolɔ haa nɛ pɛ mi waa.
22 Nɔ he guɛ gbelɔ munyuhi ngɛ kaa niye ní ngɔngɔɛ;*A miɔ mɛ kɛ yaa mi mi tɔɔ.
23 Bɔ nɛ zu buɛ nɛ a kɛ sika hiɔ ha he ngɛ ɔ,Jã nɛ munyu ngɔngɔɛhi nɛ jeɔ tsui yaya mi ɔ hu ngɛ.*
24 Nɔ nɛ nyɛɔ ni kpahi ɔ, e kɛ e nya laa e ninyɛ ɔ nɔ,Se ngɛ e tsui mi ɔ, e to kaa e maa sisi nɔ.
25 E ngɛ mi kaa e tuɔ munyu dɔkɔɔ mohu lɛɛ, se ko he lɛ nɛ o ye,Ejakaa ní hiemi* ní kpaago ngɛ e tsui mi.*
26 E ngɛ mi kaa e kɛ sisimi laa e ninyɛ ɔ nɔ mohu lɛɛ,Se e ní yayami ɔ maa je kpo ngɛ asafo ɔ hɛ mi.
27 Nɔ nɛ tsuaa muɔ ɔ, e maa nɔ mi,Nɛ nɔ fɛɛ nɔ nɛ e kpɛneɔ tɛ kɛ jeɔ he nɛ e ngɛ ɔ, tɛ ɔ maa kpale kɛ ba nɔ e nɔ.
28 Lakpa lilɛ nyɛɔ nihi nɛ́ e yeɔ mɛ awi ɔ,Nɛ nya nɛ gbeɔ nɔ yi mi ɔ kpataa nɔ hɛ mi.
Sisi Ningmahi
^ Baiblo komɛ de ke, “Jã nɛ gbiɛmi nɛ sɛ nɔ ko ɔ bɛ mi.”
^ Aloo “Konɛ o kɛ lɛ nɛ ko ba sɔ.”
^ Aloo “nanehi kpla si ngɛ e he yaka gu ɔ.”
^ Aloo “nɛ e plaa nɔ fɛɛ nɔ.”
^ Aloo “ngɛ ma a he nya buami he ɔ.”
^ Aloo “plɛɔ ngɛ e se asahi a nɔ ɔ.”
^ Baiblo komɛ de ke, “bee nɛ e kɛ e he woɔ pɛ nɛ kɔ we e he mi ɔ.”
^ Aloo “kɛ̃ɛ̃ mi bihi nɛ gbeɔ nɔ ɔ.”
^ Aloo “ngɛ kaa níhi nɛ a kɛ hɛ tsumi maa mi.”
^ Ngɛ Hebri gbi mi ɔ, “Jã nɛ nya mi nɛ ngɔɔ kɛ tsui yaya ngɛ.”
^ Aloo “ní hiɔmi.”
^ Aloo “Ejakaa a hiee e tsui.”
