Abɛ 7:1-27
7 Ye bi, moo ye ye munyu ɔmɛ a nɔ,Nɛ́ o ngɔ ye mlaa amɛ kɛ to kaa juetli.
2 Moo ye ye mlaa amɛ a nɔ konɛ o hi wami mi;Moo bu ye blɔ tsɔɔmi ɔ* he kaa bɔ nɛ o buɔ o hɛngmɛ nɔ anani* he ɔ.
3 Moo fĩ mɛ kɛ wo o nine nguɛhi a he;Ngmaa mɛ ngɛ o tsui nɔ.
4 Mo de juɛmi ke, “Ye nyɛmiyo ji mo,”
Nɛ́ o tsɛ nɔ́ sisi numi ke “ye weku no,”
5 Konɛ a bu o he ngɛ yo nɛ e wo blɔ yaya a he,*Ngɛ yo nɛ e je mi bami puɛ* ɔ kɛ e nya mi munyu nɛ ngɛ dɔkɔɔ ɔmɛ a he.
6 I hyɛ zugba kɛ gu ye we ɔ saflɛ ɔ mi,Kɛ gu ye saflɛ puɔ ɔmɛ a mi,
7 Nɛ benɛ i ngɛ nihi nɛ a juɛmi nya wɛ* ɔ hyɛe ɔ,I to niheyo ko he hɛ ngɛ nihewi ɔmɛ a kpɛti nɛ e be juɛmi.*
8 E ya be ngɛ gbɛjegbɛ ɔ nɛ kɛ yo ɔ blɔ gbla a nya kɛ we ɔ nɔ,Nɛ e nyɛɛ kɛ yaa he nɛ yo ɔ we ɔ ngɛ ɔ
9 Gbɔkuɛ nya si, be mi nɛ du ngɛ bue,Benɛ je ngɛ jɔe nɛ́ diblii ngɛ woe ɔ.
10 Kɛkɛ nɛ i na yo ko nɛ e kɛ lɛ ba kpe;E dla e he kaa tuutuu polɔ, nɛ e sisiɔ nɔ.*
11 E nya wa, nɛ e bui nɔ.
E* hí we mi gblee.
12 Ke o ke o hyɛɔ ɔ, e ngɛ agbo ɔ nya, nɛ ke o ke o hyɛɔ ɔ, e ngɛ ma a he nya buami he ɔmɛ,E woɔ ka ngɛ kɔ̃ nya fɛɛ kɔ̃ nya.
13 E nu niheyo ɔ nɛ e fĩɔ e nya he;Zo pee we lɛ, nɛ e de niheyo ɔ ke:
14 “I wo si ke ma sã tue mi jɔmi afɔlehi.
Mwɔnɛ ɔ, i ye ye siwo ɔmɛ a nɔ.
15 Lɔ ɔ he je nɛ i je kpo konɛ i kɛ mo nɛ ba kpe ɔ nɛ,I je kpo konɛ ma ba hla mo, nɛ i na mo!
16 I ngɔ sa nɔ bo kpakpahi kɛ ha ye sa a nɔ,Egipt klala nɛ hɛɛ su slɔɔtohi.
17 I ngɔ mimɛ, aloe, kɛ sinamon kɛ fĩa ye sa a nɔ.
18 Ba, ha nɛ wa je suɔmi kpo ha wa sibi kɛ ya si mɔtu;*Ha nɛ wa bla kɛ ná suɔmi mi ngɔɔmi,
19 Ejakaa ye huno ɔ be we mi;E hia blɔ kɛ ho he ko tsitsaa ya.
20 E hɛɛ sika kɛ baagi kɛ ho,Nɛ e be kpalee kɛ ba kɛ yaa si ligbi nɛ nyɔhiɔ ɔ maa wa.”
21 E ngɔ sisimi munyu kɛ gbe niheyo ɔ yi mi.
E ngɔ munyu dɔkɔɔ kɛ mlɔɔ lɛ.
22 Si kake too ɔ, e nyɛɛ yo ɔ se kɛ ho kaa na ku nɛ a yaa gbe,Kaa kuasia nɛ a yaa bɔ lɛ pã* kɛ gbla e tue.
23 Nyagbenyagbe ɔ, kɛ̃ɛ̃ mi bi maa gbɔ e ko;E li kaa nɔ́ nɛ ɔ maa ngɔ e wami* kɛ wo oslaa mi, kaa lohwe pɛlitsɛ nɛ e ngɛ oya yee kɛ yaa sɛ klama mi.
24 Amlɔ nɛ ɔ, ye bimɛ, nyɛɛ bu mi tue;Nyɛ ta tue kɛ ha munyuhi nɛ i tuɔ ɔ.
25 Nyɛ ko ha nɛ nyɛ tsui nɛ dɔ kɛ ya yo ɔ blɔ ɔmɛ a nɔ.
Nyɛ ko tla blɔ kɛ ya je e blɔ ɔmɛ a nɔ,
26 Ejakaa e ha nɛ nihi fuu gbo,Nɛ nihi nɛ e gbe ɔ hiɛ babauu.
27 E we ɔ ngɔɔ nɔ kɛ yaa Yɔkɔ mi;*E kɛ nɔ yaa gbenɔ mi tɔɔ.*
Sisi Ningmahi
^ Aloo “ye mlaa a.”
^ Aloo “hɛngmɛ nɔ lasiɛtɛ.”
^ Aloo “nihi nɛ a be níhi a si kpami.”
^ Ngɛ Hebri gbi mi ɔ, “e be tsui nɛ nuɔ nɔ́ sisi.”
^ Aloo “nɛ nɔ sisimi ngɛ e tsui mi.”
^ Ngɛ Hebri gbi mi ɔ, “E nane.”
^ Ngɛ Hebri gbi mi ɔ, “ha nɛ waa nu suɔmi kɛ ya si mɔtu nɛ waa tɔ.”
^ Aloo “a yaa wo lɛ kɔsɔkɔsɔ.”
^ Aloo “klaa.”
^ Ngɛ Hebri gbi mi ɔ, “Sheol.” Hyɛ Munyu Komɛ A Sisi Tsɔɔmi.
^ Ngɛ Hebri gbi mi ɔ, “kɛ nɔ yaa gbenɔ se tsu ɔmɛ a mi.”
