Abɛ 8:1-36
8 Anɛ pi juɛmi nɛ ngɛ ngmlaa kpae ɔ lo?
Anɛ pi nɔ́ se kɔmi nɛ ngɛ e gbi nɔ woe ɔ lo?
2 E daa si ngɛ hehi nɛ ya hiɔwe ngɛ gbɛjegbɛ ɔ tue,Ngɛ blɔ gbla amɛ a nya.
3 E ya nɔ nɛ e ngɛ ngmlaa kpae wawɛɛ,Ngɛ agbo ɔmɛ nɛ yaa ma a mi ɔ a kasa nya,Ngɛ sinya blɔ ɔmɛ a nya ke:
4 “Oo nyɛ nimli adesahi, i ngɛ nyɛ tsɛe;I wo ye gbi nɔ ha nɔ fɛɛ nɔ.*
5 Nyɛ nihi nɛ nyɛ be níhi a si kpami, nyɛɛ kase hɛ mi tɛmi;Nyɛ kuasiahi, nyɛ ná nɔ́ sisi numi tsui.
6 Nyɛɛ bu tue, ejakaa nɔ́ nɛ i ngɛ dee ɔ he hia,I tuɔ munyu nɛ da;
7 Ejakaa i kɛ gbi blɛuu tuɔ anɔkuale,*Nɛ ye nya hiɔ munyu yaya.
8 Munyuhi tsuo nɛ jeɔ ye nya a da.
Ekoeko be nɛ e ji munyu gɔdɔgɔdɔ aloo munyu kpɛ̃kpɛ̃ɛ.
9 Mɛ tsuo a ngɛ tɛɛ* kɛ ha nihi nɛ a kɔɔ nɔ́ se,Nɛ a da kɛ ha nihi nɛ a ná nile.
10 Nyɛɛ ngɔ ye tsɔsemi ɔ mohu pe sika hiɔ,Kɛ nile mohu pe sika tsu ngmingmiingmi,
11 Ejakaa juɛmi hi pe kora tɛhi;*A be nyɛe maa ngɔ níhi tsuo nɛ nihi suɔ saminya a kɛ to he.
12 Imi juɛmi, i kɛ hɛ mi tɛmi lɛ ngɛ;I ná nile kɛ nyɛmi nɛ a kɛ susuɔ nɔ́ he.
13 Nɔ́ nɛ Yehowa gbeye yemi tsɔɔ ji kaa o maa hiɔ yayami.
I hiɔ fĩami, kɛ he nɔ womi, kɛ nɔ́ yayami peemi, kɛ lakpa munyu.
14 I ngɛ ga womi kpakpa kɛ juɛmi;Ye nɔ́ ji nɔ́ sisi numi kɛ he wami.
15 Kɛ gu ye nɔ ɔ, matsɛmɛ yeɔ nɔ,Nɛ nikɔtɔmahi woɔ mlaa nɛ da.
16 Kɛ gu ye nɔ ɔ, ma nikɔtɔmahi yeɔ nɔ,Nɛ odehehi kojoɔ ngɛ dami mi.
17 I suɔ nihi nɛ a suɔ mi ɔ,Nɛ nihi nɛ a hlaa ye se blɔ ɔ maa na mi.
18 I ngɛ ní nɛ ye hɛ mi ngɛ nyami,Ní nami nɛ ngɛ daa* kɛ dami kɛ mi ngɛ.
19 Ye yiblii ɔ hi pe sika tsu, e hi pe sika tsu nɛ a tsu he po,Nɛ nɔ́ nɛ i haa nɔ ɔ hi pe sika hiɔ ngmingmiingmi.
20 I nyɛɛɔ dami blɔ ɔ nɔ,Ngɛ dami sane yemi blɔ ɔmɛ a kpɛti;
21 I haa nihi nɛ a suɔ mi ɔ weto ní kpakpa,Nɛ i haa nɛ a nito he ɔmɛ hyiɔ tɔtɔɔtɔ.
22 Imi lɛ Yehowa bɔ kekleekle,Imi ji níhi nɛ e pee blema lokoo ɔ, a kpɛti kekleekle nɔ́.
23 A to mi si blema lokoo,*Kɛ je sisije, momoomo loko zugba a ba.
24 Benɛ nyuhi nɛ a mi kuɔ ɔ be ɔ,Benɛ nyu hɛngmɛhi nɛ nyu babauu jeɔ a mi ɔ be ɔ, a fɔ mi* momo.
25 A fɔ mi loko a kɛ yoku ɔmɛ ma si,Loko kpongu ɔmɛ ba.
26 Benɛ e ná we nɛ e pee zugba a kɛ ngahi nɛ ngɛ nɔ,Aloo zugba a nɔ kekleekle zu ɔ.
27 Benɛ e to hiɔwe ɔ he blɔ nya a, i ngɛ lejɛ ɔ;Benɛ e po kla ngɛ nyu ɔmɛ a nɔ,*
28 Benɛ e ngɔ bɔku ɔmɛ kɛ to* hiɔwe,Benɛ e to nyu hɛngmɛhi nɛ a mi kuɔ ɔmɛ a sisi,
29 Benɛ e wo wo ɔ mlaaKaa e nyu ɔ nɛ ko be fami nɛ e kɛ ha lɛ ɔ he,Benɛ e to* zugba a sisi tomi ɔmɛ a sisi ɔ,
30 Jamɛ a be ɔ mi ɔ, i ngɛ e kasa nya kaa ga ní tsulɔ kpanaa.
Daa nɛ ɔ, imi lɛ e suɔ ye sane wawɛɛ nitsɛ;I nyaa ngɛ e hɛ mi be fɛɛ be;
31 I nya ngɛ zugba a nɛ e pee nɛ nihi ma nyɛ maa hi nɔ ɔ he,Nɛ i suɔ nimli* a bimɛ a sane wawɛɛ nitsɛ.
32 Amlɔ nɛ ɔ, ye bimɛ, nyɛɛ bu mi tue;Ejakaa nihi nɛ a nyɛɛɔ ye blɔ ɔmɛ a nɔ ɔ ngɛ bua jɔmi.
33 Nyɛɛ bu tsɔsemi tue, konɛ nyɛɛ le ní;Nyɛ ko kua tsɔsemi kɔkɔɔkɔ.
34 Nɔmlɔ nɛ daa ligbi ɔ, e baa ye sinya amɛ a nya mɔtu mla,*Nɛ e mlɛɔ ngɛ ye sinya tso ɔmɛ a heKɛ tsɔɔ kaa e buɔ mi tue ɔ ngɛ bua jɔmi;
35 Ejakaa nɔ nɛ maa na mi ɔ ma ná wami,Nɛ Yehowa bua maa jɔ e he.
36 Se nɔ nɛ kuaa mi ɔ yeɔ lɛ nitsɛ e he* awi,Nɛ nihi nɛ a nyɛɔ mi ɔ, a suɔ gbenɔ.”
Sisi Ningmahi
^ Ngɛ Hebri gbi mi ɔ, “ha nimli a bimɛ.”
^ Ngɛ Hebri gbi mi ɔ, “ye nya kɛ gbi blɛuu tuɔ anɔkuale.”
^ Aloo “Mɛ tsuo a mi tɛ̃.”
^ Aloo “Gbosi ní nɛ he jua wa.”
^ Aloo “A to mi si kɛ je blema tɔɔ.”
^ Aloo “a nu kɔɔmi nɛ a fɔ mi.”
^ Aloo “Benɛ e pee hiɔwe kɛ zugba a kpe he.”
^ Ngɛ Hebri gbi mi ɔ, “e ha nɛ bɔku ɔmɛ a he wa ngɛ.”
^ Aloo “Benɛ e kɛ mlaa to.”
^ Aloo “adesahi.”
^ Aloo “e ba fɔ̃ɔ̃ nyɔ ngɛ ye sinya amɛ a nya.”
^ Aloo “e klaa.”
