Fiɛɛlɔ 8:1-17
8 Mɛnɔ kɛ juɛmitsɛ sɔ? Mɛnɔ le nyagba ko nya tsaba?* Adesa nile haa nɛ e tsɔɔ e hɛ mi, nɛ e pɛneɔ e hɛ mi nɛ e tu ɔ.
2 I ngɛ dee ke: “Moo bu matsɛ ɔ fami ɔmɛ tue ngɛ kita nɛ o kã Mawu ɔ he je.
3 Koo ye oya kɛ je e hɛ mi. Ko fĩ nɔ́ yayami ko se; ejakaa e ma nyɛ maa pee nɔ́ fɛɛ nɔ́ nɛ e suɔ,
4 he wami ngɛ matsɛ munyu mi; mɛnɔ ma nyɛ ma de lɛ ke: ‘Mɛni o ngɛ pee ɔ?’”
5 Nɔ nɛ yeɔ mlaa nɔ ɔ, haomi be e nɔ bae, nɛ juɛmitsɛ tsui maa le be nɛ sa, kɛ blɔ nɛ e sa kaa e gu nɔ kɛ tsu níhi a he ní.*
6 Sane fɛɛ sane ngɛ be kɛ blɔ nɔ nɛ a guɔ kɛ tsuɔ he ní,* ejakaa adesa nyagbahi hiɛ babauu.
7 Akɛnɛ nɔ ko li nɔ́ nɛ maa ba he je ɔ, mɛnɔ ma nyɛ ma de bɔ nɛ e ma plɛ kɛ ba ha?
8 Kaa bɔ nɛ nɔ ko nɔ ko be he wami ngɛ mumi* ɔ nɔ, nɛ́ nɔ ko nɔ ko be nyɛe maa tsi mumi ɔ nya a, jã kɛ̃ nɛ nɔ ko nɔ ko be he wami ngɛ gbenɔ ligbi nɔ. Kaa bɔ nɛ ke a ngɛ ta hwue nɛ a ngmɛ́ ta bulɔ blɔ nɛ e jeɔ, jã kɛ̃ nɛ nihi nɛ a peeɔ yi wu tso níhi ɔ, yi wu tso ní peepee be mɛ blɔ ngmɛe nɛ a ye a he.*
9 I na ní nɛ ɔmɛ tsuo, nɛ i ngɔ ye tsui kɛ ha ní tsumi fɛɛ ní tsumi nɛ a tsuɔ ngɛ pu nɛ ɔ sisi ɔ; jamɛ a be ɔ mi tsuo ɔ, adesa yeɔ adesa nɔ kɛ yeɔ lɛ awi.*
10 Nɛ i na nɛ a ngɛ yiwutsotsɛmɛ ɔmɛ pue, ni nɛmɛ nɛ jinɛ a yaa he klɔuklɔu ɔ nɛ a baa a, se e kɛ we kulaa nɛ nihi a hɛ je a nɔ ngɛ ma nɛ a pee yi wu tso ní ngɛ mi ɔ mi. Enɛ ɔ hu ji yaka nɔ́.
11 Akɛnɛ a kojo we nihi nɛ a peeɔ ní yayamihi mla he je ɔ, adesahi kplii a tsui kaa a maa pee yayami.
12 E ngɛ mi kaa yayami peelɔ ma nyɛ maa pee yayami si lafa nɛ loloolo ɔ, e maa hi si be kɛkɛɛ mohu lɛɛ, se kɛ̃ ɔ, i le kaa nihi nɛ a yeɔ anɔkuale Mawu ɔ gbeye ɔ, e maa hi ha mɛ, ejakaa a yeɔ lɛ gbeye.
13 Se e be hie ha yiwutsotsɛ, nɛ jã kɛ̃ nɛ e be nyɛe ma ha nɛ e wami ligbi ɔmɛ nɛ a ngɛ kaa nini ɔ se nɛ kɛ, ejakaa e yi Mawu gbeye.
14 Yaka nɔ́ ko nɛ yaa nɔ ngɛ zugba a nɔ nɛ haoɔ mi ji: Dali komɛ ngɛ nɛ a kɛ mɛ hiɔ si kaa nɔ́ nɛ a pee yi wu tso ní, nɛ yiwutsotsɛmɛ komɛ hu ngɛ nɛ a kɛ mɛ hiɔ si kaa nɔ́ nɛ a pee nɔ́ nɛ da. I ngɛ dee ke, enɛ ɔ hu ji yaka nɔ́.
15 Lɔ ɔ he ɔ, i ngɛ dee ke nihi nɛ́ a nya, ejakaa nɔ́ ko be nɛ hi ha adesa ngɛ pu nɛ ɔ sisi pe nɛ e maa ye ní, nɛ e maa nu ní, nɛ e ma nya; e sa nɛ e ná enɛ ɔ kɛ piɛɛ ní nɛ e tsuɔ wawɛɛ ngɛ e wami ligbi ɔmɛ nɛ anɔkuale Mawu ɔ kɛ ha lɛ ngɛ pu nɛ ɔ sisi ɔ mi ɔ he.
16 I ma nya si ngɛ ye tsui mi kaa ma ná juɛmi konɛ ma na níhi tsuo nɛ yaa nɔ ngɛ zugba a nɔ ɔ, enɛ ɔ he ɔ, i hwɔ we mahe po nyɔ kɛ pia.*
17 Kɛkɛ nɛ i susu anɔkuale Mawu ɔ ní tsumi ɔ tsuo he, nɛ i yɔse kaa adesa be nyɛe maa nu níhi nɛ yaa nɔ ngɛ pu nɛ ɔ sisi ɔ sisi. Ke adesahi bɔ mɔde wawɛɛ kaa mɛni po, a be nyɛe maa nu sisi. Ke a de ke a ngɛ juɛmi nɛ a kɛ maa le po, a be nyɛe maa nu sisi.
Sisi Ningmahi
^ Aloo “Mɛnɔ le sane sisi tsɔɔmi.”
^ Aloo “be nɛ sa, kɛ bɔ nɛ a kojoɔ.”
^ Aloo “Sane fɛɛ sane kɛ e be kɛ e kojomi.”
^ Aloo “kɔɔhiɔ.”
^ Baiblo komɛ de ke, “yiwutsotsɛmɛ a yi wu tso ní peepee be nyɛe ma kpɔ̃ mɛ.”
^ Aloo “kɛ plaa lɛ.”
^ Baiblo komɛ de ke, “kaa nyɔ jio, pia jio, nihi hwɔ we mahe.”
