Kɛ Ya Ha Filemon 1:1-25
1 Paulo, nɔ nɛ a wo lɛ tsu ngɛ Kristo Yesu he je ɔ, kɛ wa nyɛminyumu Timoteo, kɛ ya ha Filemon, nyɛmi nɛ waa kɛ lɛ tsuɔ ní nɛ wa suɔ lɛ ɔ,
2 kɛ wa nyɛmiyo Apfia, kɛ wa nyɛmi ta bulɔ Akipo, kɛ asafo ɔ nɛ ngɛ o we ɔ mi ɔ:
3 Nyɛ nine nɛ su dloomi kɛ tue mi jɔmi nɛ je Mawu nɛ ji wa Tsɛ ɔ kɛ wa Nyɔmtsɛ Yesu Kristo ngɔ ɔ nɔ.
4 I naa ye Mawu ɔ si be fɛɛ be, nɛ i woɔ o ta ngɛ ye sɔlemihi a mi,
5 be mi nɛ i yaa nɔ nɛ i nuɔ o hemi kɛ yemi kɛ suɔmi nɛ o ngɛ kɛ ha Nyɔmtsɛ Yesu kɛ ni klɔuklɔu ɔmɛ tsuo he ɔ he je.
6 I sɔleɔ kaa hemi kɛ yemi nɛ o ná mi blɔ fa mi nɔ́ ɔ nɛ wo mo he wami nɛ́ o yɔse nɔ́ kpakpa fɛɛ nɔ́ kpakpa nɛ wa ná kɛ gu Kristo nɔ ɔ.
7 Ejakaa a, nyɛmi, benɛ i nu o suɔmi ɔ he ɔ, i ná bua jɔmi wawɛɛ kɛ bua womi, ejakaa kɛ gu o nɔ ɔ, ni klɔuklɔu ɔmɛ a tsui he jɔ mɛ.*
8 Enɛ ɔ he je ɔ, e ngɛ mi kaa i nyɛɔ nɛ i tuɔ munyu faa nitsɛ ngɛ Kristo blɔ fa mi nɛ ma nyɛ ma fã mo kaa o pee nɔ́ nɛ sa mohu lɛɛ,
9 se ma je suɔmi mi kɛ kpa mo pɛɛ, moo hyɛ imi Paulo, nyumu nɔkɔtɔma nɛ ɔ, ee, nɛ́ amlɔ nɛ ɔ hu a wo mi tsu ngɛ Kristo Yesu he ɔ.
10 I ngɛ mo pɛɛ kpae ngɛ ye bi Onesimo he je, nɔ nɛ i ba plɛ e tsɛ be mi nɛ i ngɛ tsu mi ɔ.*
11 Be ko nɛ be ɔ, jinɛ se nami be e he kɛ ha we mo, se amlɔ nɛ ɔ, se nami ngɛ e he kɛ ha imi kɛ mo tsuo.
12 I ngɛ lɛ blɔ woe kɛ ma o ngɔ ekohu, ee lɛ, imi nitsɛ ye tsui ɔ.*
13 I ko suɔ kaa e kɛ mi ko hi hiɛ ɔ konɛ e da o nane mi nɛ e sɔmɔ mi be mi nɛ a wo mi tsu ngɛ sane kpakpa a he ɔ.
14 Se i sume nɛ ma pee nɔ́ ko nɛ o kplɛɛ we nɔ, bɔ nɛ pee nɛ nɔ́ kpakpa nɛ o maa pee ɔ, o ko pee ngɛ nɔ nyɛmi nya, se mohu ngɛ mo nitsɛ o suɔmi nya.
15 Eko ɔ, enɛ ɔ tutuutu he je nɛ e je o he be bɔɔ* ko ɔ nɛ, konɛ o nine nɛ su e nɔ ekohu kɛ ya neneene,
16 pi kaa nyɔguɛ hu, se mohu kaa nɔ nɛ e pe nyɔguɛ, kaa nyɛmi nɛ a suɔ lɛ, titli ɔ, kɛ ha imi, se e pe jã po kɛ ha mo ngɛ he lo mi kɛ Nyɔmtsɛ ɔ mi tsuo.
17 Enɛ ɔ he ɔ, ke o buɔ mi kaa huɛ ɔ,* lɛɛ mo he lɛ atuu kaa bɔ nɛ o ma he mi ɔ nɔuu.
18 Jehanɛ se hu ɔ, ke e pee mo yayami ko aloo e ye mo hiɔ ko ɔ, buu jamɛ a hiɔ ɔ kɛ ha mi.
19 Imi Paulo, i kɛ imi nitsɛ ye nine lɛ ngɛ ngmae: Ma wo mo hiɔ ɔ—demi nɛ i be dee ke mo nitsɛ po o ye mi o he hiɔ.
20 Ee, nyɛmi, moo pee enɛ ɔ kɛ ye bua mi ngɛ Nyɔmtsɛ ɔ blɔ fa mi; ha nɛ ye tsui he nɛ jɔ lɛ* ngɛ Kristo blɔ fa mi.
21 I ngɛ nɔ mi mami kaa o maa pee jã, lɔ ɔ he ɔ, i ngɛ mo ngmae, ejakaa i le kaa o maa pee po pe nɔ́ nɛ i de ɔ.
22 Se kɛ piɛɛ lɔ ɔ he ɔ, mo dla he ko hu kɛ ha mi nɛ ma ba hi, ejakaa i ngɛ blɔ hyɛe kaa kɛ gu nyɛ sɔlemihi a nɔ ɔ, a maa kpale ngɔ mi* kɛ ha nyɛ ekohu.
23 Epafra, ye nyɛmi nɛ a wo i kɛ lɛ tsu ngɛ Kristo Yesu mi ɔ ke e biɔ mo,
24 jã nɔuu kɛ̃ nɛ e ji ngɛ Maako, Aristako, Dema, kɛ Luka, ye nyɛmimɛ nɛ i kɛ mɛ tsuɔ ní ɔ hu a blɔ fa mi.
25 Nyɔmtsɛ Yesu Kristo dloomi ɔ kɛ mumi ɔ nɛ nyɛ jeɔ kpo ɔ nɛ hi si.
Sisi Ningmahi
^ Aloo “tsui nɔ a mi.”
^ Hela, “a bɔ mi pã a.”
^ Aloo “nɔ nɛ i suɔ e sane ɔ.”
^ Hela, “ngmlɛfia kake.”
^ Hela, “nɔ nɛ o kɛ lɛ dlaa ní ɔ.”
^ Aloo “tsui nɛ nɔ ye mi.”
^ Aloo “ngmɛɛ ye he.”
