Habakuk 1:1-17
1 Sɛ gbi nɛ gbalɔ Habakuk* nine su nɔ ngɛ nina mi:
2 Oo Yehowa, kɛ yaa si mɛni be nɛ ma fo ya kɛ bi yemi kɛ buami loko o maa bu mi tue?
Kɛ yaa si mɛni be nɛ ma bi nɛ o je mi kɛ je yiwutso níhi a mi loko o maa ye bua mi?
3 Mɛni he je nɛ o ha nɛ i naa ní yayamihi ɔ?
Nɛ mɛni he je nɛ o ngmɛ blɔ nɛ yi mi wami ngɛ nɔ yae jã a?
Mɛni he je nɛ o ha nɛ i naa hɛ mi kpatami kɛ yiwutso ní peepeehi ɔ?
Nɛ mɛni he je nɛ pɛ kɛ kunɔ pɔ he jã a?
4 Enɛ ɔ he ɔ, mlaa tsu we ní hu,
Nɛ a yi dami sane kulaa.
Ejakaa yiwutsotsɛmɛ bɔle dali kɛ kpe;
Enɛ ɔ he je nɛ a yi dami sane ɔ nɛ.
5 “Nyɛɛ hyɛ je ma amɛ nɛ nyɛɛ bu tue!
Nyɛɛ hyɛ mɛ too nɛ́ nyɛ nya nɛ kpɛ nyɛ he;
Ejakaa nɔ́ ko maa ya nɔ ngɛ nyɛ ligbi ɔmɛ a mi
Nɛ́ ke a de nyɛ po nyɛ be hee maa ye.
6 Ejakaa ma ha nɛ Kaldeabi maa ba,
A ji ma nɛ a yi mi wa nɛ a hɛ mi jɔɛ.
A ya tuaa zugba kpɔhi fuu
Nɛ a kpɔ̃ɔ wehi nɛ pi a nɔ́.
7 A he ngɛ gbeye, nɛ a he sawale nuɔ nihi.
A woɔ mɛ nitsɛmɛ a mlaahi nɛ a kɛ mɛ nitsɛmɛ a he wami* lɛ tsuɔ ní.
8 A okpɔngɔ ɔmɛ a he sɔɔ kaa ngatsɛhi,
A he ngɛ gbeye pe ogbeteehi ngɛ diblii mi.
A ta okpɔngɔ ɔmɛ tuuɔ kɛ yaa hɛ mi;
A okpɔngɔ ɔmɛ je tsitsaa kɛ ba.
A kpleɔ si kɛ fo kaa kɔle nɛ hɛɛ fo kɛ yaa ye ní.
9 Mɛ tsuo a kɛ ma a hɛ mi kaa a maa ye awi.
Ke a bua a he nya kɛ ma a, a hɛ mi ngɛ kaa puje he kɔɔhiɔ,
Nɛ a nuu nyɔguɛhi babauu kaa zia.
10 A yeɔ matsɛmɛ a he fɛu
Nɛ a muɔɔ ma nikɔtɔma amɛ.
A muɔɔ ma fɛɛ ma nɛ a fia gbogbo kɛ wo he ɔ;
A buaa zu nya, nɛ e peeɔ kaa kpoku nɛ a kuɔɔ kɛ ya ngɔɔ ma amɛ.
11 Nɛ a yaa a hɛ mi kaa kɔɔhiɔ, nɛ a ya guɔ zugba a nɔ kɛ beɔ,
Se a maa ye fɔ,
Ejakaa a he ye kaa a mawu ɔ lɛ haa mɛ he wami.”*
12 Oo Yehowa, anɛ pi mo nɛ o ngɛ kɛ je blema lokoo ɔ lo?
Oo ye Mawu, ye Nɔ Klɔuklɔu, o be gboe.*
Oo Yehowa, o hla mɛ konɛ a kojo;
Ye Tɛsa, o to mɛ si kɛ ha tue gblami.*
13 O hɛngmɛ ngɛ klɔuklɔu pe nɛ́ o maa hyɛ ní yayamihi,
Nɛ o be nyɛe maa hyɛ nɛ ní yayamihi maa hi nɔ yae.
Lɛɛ mɛni he je nɛ o ngmɛɔ nihi nɛ a yi anɔkuale blɔ ɔ
Nɛ o maa o nya nɛ yayami peeli miiɔ nihi nɛ a da pe mɛ ɔ?
14 Mɛni he je nɛ o ha nɛ nɔmlɔ pee kaa wo mi lo ɔ,
Kaa níhi nɛ a sãã si nɛ a be nɔ yelɔ ko ɔ?
15 E* kɛ gbowe nuɔ ní nɛ ɔmɛ tsuo.
E kɛ e we adlai ɔ* nuɔ mɛ,
Nɛ e buaa a nya ngɛ e we atsiki* ɔ mi.
Enɛ ɔ he je nɛ e nyaa wawɛɛ ɔ nɛ.
16 Lɔ ɔ he je nɛ e sãã afɔlehi kɛ haa e we adlai ɔ nɛ
Nɛ e sãã afɔlehi* kɛ haa e we atsiki ɔ nɛ;
Ejakaa ní nɛ ɔmɛ haa nɛ e náa ní,*
Nɛ e yeɔ niye ní kpakpa.
17 Anɛ e maa ya nɔ maa ngɔ e we adlai ɔ kɛ hi mɛ nue nɛ e maa hi mɛ jee ngɛ mi lo?
Anɛ e maa ya nɔ maa hi je ma amɛ gbee nɛ e mi mi be lɛ sãe lo?
Sisi Ningmahi
^ Eko ɔ, e sisi ji, “Bua jɔmi nɛ se be nɛ́ a kɛ fuaa nɔ atuu.”
^ Aloo “hɛ mi nyami.”
^ Baiblo komɛ de ke “A mawu ɔ ji a he wami.”
^ Baiblo komɛ de ke “wa be gboe.”
^ Aloo “hɛ mi kami.”
^ Nɛ ji, Kaldeabi ɔmɛ nɛ a ji he nyɛli ɔmɛ.”
^ Aloo “ya ngua a.”
^ Aloo “ya wayo.”
^ Aloo “tsopa kɛ e he via.”
^ Ngɛ Hebri gbi mi ɔ, “náa niye ní nɛ zɔ ngɛ he saminya.”
