Habakuk 2:1-20
2 Ma ya nɔ ma da si ngɛ ye bu he ɔ,
Ma da ta hwumi kpoku ɔ nɔ.
Ma ya nɔ ma hwɔɔ konɛ ma hyɛ nɔ́ nɛ e ma de kɛ gu ye nɔ
Kɛ nɔ́ nɛ ma de ke a kã ye hɛ mi.
2 Kɛkɛ nɛ Yehowa ha mi heto ke: “Ngmaa nina a kɛ fɔ si, nɛ o kpɛ ngɛ tɛ tɛtlɛɛ nɔ,
Konɛ e kanemi nɛ ko ye ha nɔ nɛ ngɛ kanee nɛ́ e je kpo ɔ.
3 Ejakaa be nɛ a to nɛ nina a kɛ maa ba mi ɔ sui lolo,
E ma kɛ fo, nɛ e maa ba mi kɛ̃.
Ke e se kɛ po,* moo ya nɔ nɛ o hyɛ blɔ!*
Ejakaa e maa ba mi kokooko.
Nɛ e be se kpɛe!
4 Hyɛ nɔ nɛ woɔ e he nɔ ɔ;*
E tsui mi dɛ.
Se nɔ nɛ da a lɛɛ, e anɔkuale yemi ɔ* ma ha nɛ e hi wami mi.
5 Ngɛ anɔkuale mi ɔ, akɛnɛ wai sisiɔ nɔ he je ɔ,
Nyumu nɛ woɔ e he nɔ ɔ be oti nɛ e kɛ ma e hɛ mi ɔ he sue.
E* hɛ tsuɔ kaa Yɔkɔ;*
E ngɛ kaa gbenɔ, e tɔɛ gblee.
E yaa nɔ nɛ e buaa je ma amɛ tsuo a nya
Nɛ e buaa ni ɔmɛ tsuo a nya kɛ haa e he.
6 Anɛ nimli nɛ ɔmɛ tsuo be lɛ abɛ bue, a be lɛ blakpa fiae* nɛ a be ajo siae kɛ si lɛ lo?
A ma de ke:
‘Musu tloo nɔ nɛ buaa níhi nɛ pi e nɔ́ nya
Nɛ́ e haa nɛ e hiɔ kleɔ ɔ!
Kɛ yaa si mɛni be?
7 Anɛ nihi nɛ o ye mɛ hiɔ ɔ, a be si tee tlukaa lo?
A maa te si nɛ a ma hoso mo wawɛɛ,
Nɛ o maa pee kaa ta yibu ní kɛ ha mɛ nɛ́ a maa muɔɔ.
8 Akɛnɛ o ha je ma amɛ a níhi he je ɔ,
Je mahi nɛ piɛ ɔ tsuo maa ha o níhi,
Ejakaa o pue nihi a muɔ si
Nɛ o wa zugba a,
Kɛ mahi kɛ nihi nɛ a ngɛ a mi ɔ yi mi.
9 Musu tloo nɔ nɛ peeɔ ní yayahi konɛ e we ɔ nɛ ná he se,
Bɔ nɛ pee nɛ e pee e tsu ɔ ngɛ kɔɔhiɔ mi tsitsaa,
Konɛ e kɛ je amanehlu dɛ mi ɔ!
10 Ga nɛ o to ɔ ngɔ he guɛ gbemi kɛ ba o we ɔ nɔ.
Akɛnɛ o kpata nihi babauu a hɛ mi he je ɔ, o pee yayami kɛ si mo nitsɛ o he.*
11 Ejakaa tɛ ko ma kpa ngmlaa kɛ je gbogbo ɔ mi,
Nɛ plai ma he nɔ kɛ je tsu yi bumi tso ɔmɛ a kpɛti.
12 Musu tloo nɔ nɛ kɛ muɔ si puemi poɔ ma,
Nɛ́ e peeɔ nɔ́ nɛ dɛ kɛ toɔ ma sisi ɔ!
13 Hyɛ! Anɛ pi Yehowa tabohiatsɛ nɛ haa nɛ nihi tsuɔ ní wawɛɛ, nɛ e ya gbeɔ nya ngɛ la mi,
Nɛ́ je ma amɛ gboɔ yaka dengme ɔ lo?
14 Ejakaa zugba a nɔ tsuo ma hyi kɛ Yehowa hɛ mi nyami ɔ he nile
Kaa bɔ nɛ wo ɔ hyi tɔ kɛ nyu ɔ.
15 Musu tloo nɔ nɛ haa e huɛmɛ nɔ́ ko nɛ́ a nu,
Nɛ́ e kɛ abofu kɛ mi mi la woɔ mi konɛ a de,
Bɔ nɛ pee nɛ e hyɛ a he gu ɔ!
16 O ma hyi tɔ kɛ hɛ mi si puemi mohu pe hɛ mi nyami.
Mo hu moo nu eko konɛ a na heii kaa a pui mo.*
Kplu nɛ ngɛ Yehowa hiɔ nine mi ɔ maa ba o ngɔ,
Nɛ hɛ mi si puemi maa ha o hɛ mi nyami ɔ nɔ;
17 Ejakaa awi nɛ o ye Lebanon ɔ eko maa ba o nɔ,
Nɛ hɛ mi kpatami nɛ wo lohwe awi yeli ɔmɛ a he gbeye ɔ eko maa ba o nɔ,
Ejakaa o pue nihi a muɔ si
Nɛ o wa zugba a,
Kɛ mahi kɛ nihi nɛ a ngɛ a mi ɔ yi mi.
18 Ke amaga peelɔ ɔ pee amaga nɛ a hlɔ kɛ ma si ɔ
Mɛni se nami lɛ ngɛ he?
Mɛni se nami lɛ ngɛ dade amaga kɛ lakpa tsɔɔlɔ he,
Ke nɔ nɛ pee amaga a kɛ e hɛ fɔ nɔ,
Nɛ e pee mawuhi nɛ a tui munyu nɛ se nami ko be a he ɔ?
19 Musu tloo nɔ nɛ deɔ tso ke, “O hɛ nɛ tsɛ̃!”
Aloo nɔ nɛ deɔ tɛ nɛ tui munyu ke, “Tee si! Tsɔɔ wɔ ní! ɔ”
Hyɛ! A ngɔ sika tsu kɛ sika hiɔ kɛ ha he,
Nɛ mumi ko kulaa be e mi.
20 Se Yehowa ngɛ e sɔlemi we klɔuklɔu ɔ mi.
Nyɛ zugba a tsuo, nyɛɛ pee dii ngɛ e hɛ mi!’”
Sisi Ningmahi
^ Aloo “e pee kaa nɔ́ nɛ e se ngɛ kɛe po.”
^ Aloo “moo mlɛ lɛ wawɛɛ.”
^ Aloo “Hyɛ! Nɔ nɛ e klaa fu ɔ.”
^ Baiblo komɛ de ke “e hemi kɛ yemi ɔ.”
^ Aloo “E klaa.”
^ Ngɛ Hebri gbi mi ɔ, “Sheol,” Hyɛ Munyu Komɛ A Sisi Tsɔɔmi.
^ Aloo “ahama sãe kɛ si lɛ.”
^ Aloo “o klaa.”
^ Baiblo komɛ de ke “nɛ o dede.”
