Habakuk 3:1-19
3 Sɔlemi nɛ gbalɔ Habakuk sɔle nɛ ngɛ kaa aywilɛho yemi la a ji nɛ ɔ nɛ:
2 Oo Yehowa, i nu o he sane.
Oo Yehowa, o ní tsumi ɔ peeɔ mi nyakpɛ.
Moo pee ní nguahi ekohu ngɛ jeha amɛ a mi!*
Ha nɛ nihi nɛ a le ngɛ jeha amɛ a mi.*
Mo kai nɛ o je o mɔbɔ nami ɔ kpo ke basabasa peemi ngɛ nɔ yae ɔ.
3 Mawu je Teman kɛ ba,
Nɔ Klɔuklɔu ɔ je Paran Yoku ɔ nɔ kɛ ba. (Sela)*
E we agboje ɔ kpe hiɔwe ɔ tsuo;
E yi jemi ɔ hyi zugba a nɔ tsuo tɔ.
4 E kpɛmi ɔ ngɛ kaa la.
La enyɔ kpɛ kɛ je e dɛ mi,
He nɛ e he wami ɔ laa ngɛ ɔ.
5 Hiɔ nɛ sãã nɔ nyɛɛ e hɛ mi,
Nɛ asla nɛ nya wa nyɛɛ e se.
6 E da si nɛ e hoso zugba a.
E hyɛ je ma amɛ, kɛkɛ nɛ a bɔni kpokpomi.
Yokuhi nɛ a ngɛ kɛ je blema lokoo ɔ ywia,
Nɛ kponguhi nɛ a ngɛ kɛ je blema a kɛ a hɛ mi bu si.
E nɔ́ ji blɔhi nɛ a ngɛ kɛ je blema lokoo ɔ tsuo.
7 I na haomi ngɛ Kushan bo tsu ɔmɛ a mi.
Bo tsuhi a he bohi nɛ ngɛ Midian zugba a nɔ ɔ kpokpo.
8 Oo Yehowa, anɛ pa amɛ lɛ o mi mi fu wawɛɛ ɔ lo,
Anɛ pa amɛ lo?
Aloo wo ɔ lɛ o mi mi fu ɔ?
Ejakaa o hi o we okpɔngɔ ɔmɛ a nɔ;
O ta zugba lɛ ɔmɛ ye kunimi.*
9 O je o kɛ̃ɛ̃ ɔ kpo nɛ o pee lɛ klaalo.
O ta hwumi ní ɔmɛ* pee klaalo kaa a ma tsu ní kaa bɔ nɛ o kã kita* ngɛ a nɔ ɔ. (Sela)
O kɛ pahi gba zugba a mi.
10 Benɛ yoku ɔmɛ na mo ɔ, a he mi ye mɛ wawɛɛ.
Hiɔmi nɛ wawɛɛ nɛ nyu hyi zugba a nɔ tɔ.
Nyu ɔmɛ wo gbi kɛ je muɔ voo ɔ mi.
A te da si kɛ ya hiɔwe.
11 Pu ɔ kɛ nyɔhiɔ ɔ da si ngɛ a hi he nɛ ngɛ hiɔwe ɔ.
O kɛ̃ɛ̃ mi bi ɔmɛ je kpo kɛ ho kaa la.
O we akplɔ ɔ kpɛ kaa oslabai.
12 O kɛ abofu nɛ nya wa nyɛɛ kɛ be ngɛ zugba a nɔ.
O kɛ abofu naa je ma amɛ a nɔ.*
13 O je kpo konɛ o he o ma a yi wami, nɛ o he nɔ nɛ o pɔ lɛ nu ɔ yi wami.
O ywia yiwutsotsɛmɛ a we ɔ nya dalɔ ɔ.*
A kpata we ɔ hɛ mi kɛ je e yi mi* kɛ ba si e sisi tomi ɔ nɔ. (Sela)
14 Benɛ a hia kɛ ma konɛ a ba gbɛ mi kɛ fĩa a
O kɛ e tabuli ɔmɛ a nyatsɛ ɔ nitsɛ ta hwumi níhi* gbɔ e yi.
A bua jɔ wawɛɛ kaa a ma kpata nɔ nɛ ngɛ nɔ́ nae ɔ hɛ mi ngɛ laami mi.
15 O kɛ o we okpɔngɔ ɔmɛ gu wo ɔ mi kɛ be,
Kɛ gu nyu babauu nɛ pee hamahama a mi.
16 I nu nɛ ye he kpokpo ngɛ ye mi;*
Benɛ i nu pɛmi ɔ he ɔ, ye nya do blibliibli.
Ye wu ɔmɛ a mi bɔni sami;
Ye nanehi bɔni domi ngɛ ye sisi.
Se i pee dii kɛ mlɛ haomi ligbi ɔ,
Ejakaa e ma nihi nɛ a ba tua wɔ ɔ a nɔ.
17 E ma nyɛ maa ba kaa fig tso ɔmɛ be mɔmɔ tsɛ̃e,
Nɛ tso yiblii ko be wai tso ɔmɛ a nɔ hie;
E ma nyɛ maa ba kaa oliv tso ɔmɛ be yiblii woe,
Nɛ ngmɔ ɔmɛ* be ní bae;
E ma nyɛ maa ba kaa to ɔmɛ maa ta to tsu ɔ mi,
Nɛ na ko hu be na tsu ɔ mi hie mohu lɛɛ;
18 Se imi lɛɛ, ma nya ngɛ Yehowa mi;
Nɛ ye bua maa jɔ wawɛɛ ngɛ Mawu nɛ heɔ ye yi wami ɔ mi.
19 Nyɔmtsɛ Matsɛ Yehowa ji ye he wami;E ma ha nɛ ye nanehi maa pee kaa afugbɛ nanehiNɛ e ma ha nɛ ma nyɛɛ ngɛ hehi nɛ a ya hiɔwe.
Sisi Ningmahi
^ Baiblo komɛ de ke “ngɛ wa be ɔ mi.”
^ Baiblo komɛ de ke “ngɛ wa be ɔ mi.”
^ Aloo “ji yi wami hemi.”
^ Baiblo komɛ de ke “kɛ̃ɛ̃ ɔmɛ.”
^ Baiblo komɛ de ke “A tu kitahi nɛ kɔɔ weku ɔmɛ a he ɔ he munyu.”
^ Ngɛ Hebri gbi mi ɔ, “fiaa je ma amɛ ní.”
^ Ngɛ Hebri gbi mi ɔ, “yi ɔ.”
^ Ngɛ Hebri gbi mi ɔ, “e kuɛ.”
^ Ngɛ Hebri gbi mi ɔ, “e we akplɔ ɔ.”
^ Ngɛ Hebri gbi mi ɔ, “ye mi mi kpokpo.”
^ Aloo “ kpongu ɔmɛ.”
