La 102:1-28
Sɔlemi nɛ nɔ nɛ a ngɛ lɛ yi mi wae ɔ sɔle be mi nɛ e hao,* nɛ e kɛ e hiami níhi ngɛ Yehowa hɛ mi fɔe ɔ.
102 Oo Yehowa, moo bu ye sɔlemi tue;Ha nɛ ya nɛ i foɔ kɛ biɔ yemi kɛ buami ɔ nɛ su o ngɔ.
2 Koo ngɔ o hɛ mi kɛ laa mi ngɛ ye haomi be mi.
Mo ta tue ha mi;*Ke i tsɛ mo ɔ, mo he mi nɔ esɔ.
3 Ejakaa ye ligbi ɔmɛ ngɛ laae kaa lasuku,Nɛ ye wu ɔmɛ dɔ la kaa nɔ́ nɛ a ngɛ flɔɔnɔɔ mi.
4 Ye tsui gbo ngɛ ye mi kaa nga nɛ e gbli,Ye hɛ je nɔ po kaa ma ye ní.
5 Kɛmɛmi nɛ i kɛmɛɔ wawɛɛ he je ɔ,Ye wuhi tsuo je kpo.
6 I pee kaa dɔkɔdɔkɔ nyagagatsɛ ngɛ nga nɔ;I pee kaa klomi wayoo ko ngɛ ma doku mi.
7 I hwɔ we mahe;*I pee kaa lohwe pɛlitsɛ nɛ lɛ nɔ kake too pɛ lɛ e maa si ngɛ tsu yi mi.
8 Ye he nyɛli ɔmɛ bɔɔ mi ahlua ligbi ɔ tsuo.
Nihi nɛ a yeɔ ye he fɛu ɔ* ngɔɔ ye biɛ kɛ gbiɛɔ nihi.
9 Lazu ba pee ye niye ní,Nɛ vonyu futu nɔ́ nɛ i nuɔ ɔ mi,
10 Ngɛ o we abofu ɔ kɛ o mi mi la a he je,O wo ye nɔ konɛ o sake mi kɛ fɔ he.
11 Ye ligbi ɔmɛ pee kaa nini nɛ ngɛ laae,*Nɛ i ngɛ gboe kaa nga.
12 Se mo Yehowa, o ngɛ kɛ yaa neneene,Nɛ o biɛ ɔ* maa hi si kɛ ya yi nɔhi tsuo.
13 O maa te si nɛ o maa na Zion mɔbɔ kokooko,Ejakaa be su nɛ o maa na lɛ mɔbɔ;Be nɛ a to ɔ su.
14 O sɔmɔli ɔmɛ a bua jɔ e tɛ ɔmɛ a he,Nɛ a mi mi sãã mɛ ngɛ e zu ɔ po he.
15 Je ma amɛ maa ye Yehowa biɛ ɔ gbeye,Nɛ zugba a nɔ matsɛmɛ ɔmɛ tsuo maa ye o hɛ mi nyami ɔ gbeye.
16 Ejakaa Yehowa maa kpale po Zion;E ma je e he kpo ngɛ e hɛ mi nyami ɔ mi.
17 E maa bu ohiatsɛmɛ a sɔlemi tue;E be e hɛ mae kɛ fɔ a sɔlemi nɔ.
18 A ngma nɔ́ nɛ ɔ kɛ fɔ si ha yi nɔ nɛ maa ba hwɔɔ se ɔ,Konɛ nihi nɛ a ná we nɛ a fɔ* mɛ ɔ nɛ a je Yah yi.
19 Ejakaa e jeɔ e he klɔuklɔu nɛ ya hiɔwe ɔ kɛ hyɛɔ zugba a,Yehowa jeɔ hiɔwe kɛ hyɛɔ zugba a,
20 Konɛ e nu huu peemi nɛ nɔ nɛ a wo lɛ tsu ɔ peeɔ ɔ,Nɛ́ e ha nɛ nihi nɛ a bu mɛ gbenɔ fɔ ɔ nɛ a ye a he,
21 Bɔ nɛ pee nɛ a jaje Yehowa biɛ ɔ ngɛ Zion,Kɛ e yi jemi ɔ ngɛ Yerusalem,
22 Ke ni ɔmɛ kɛ matsɛ yemi ɔmɛBua a he nya konɛ a sɔmɔ Yehowa a.
23 E kpɔ̃ ye he wami ɔ ngɛ ye dɛ mla tsɔ;E po ye ligbi ɔmɛ a nɔ kpiti.
24 I de ke: “Oo ye Mawu,Ko kpata ye hɛ mi be mi nɛ i wɛ lolo,Mo nɛ́ o jehahi ngɛ kɛ yaa yi nɔhi tsuo.
25 Kɛ je blema lokoo nɛ o fia zugba a sisi tomi ɔmɛ,Nɛ o nine nya ní tsumi ji hiɔwe ɔmɛ.
26 A hɛ mi ma kpata, se moo lɛɛ o maa hi si daa;Mɛ tsuo a maa pee momo kaa bɔ nɛ tade peeɔ momo ɔ.
O ma tsake mɛ kaa a tsakeɔ tade, nɛ a maa be kɛ ho.
27 Se moo lɛɛ o tsakee we, nɛ o jehahi be nyagbe bae gblegbleegble.
28 O sɔmɔli ɔmɛ a bimɛ maa hi si slɔkee,Nɛ a nina maa hi si slɔkee ngɛ o hɛ mi.”
Sisi Ningmahi
^ Aloo “e gbɔjɔ.”
^ Aloo “Moo ba si nɛ o bu mi tue.”
^ Baiblo komɛ de ke “I ta he lo kanyakanya.”
^ Aloo “Nihi nɛ a buɔ mi kaa nɔ ko nɛ biɛɛ ɔ.”
^ Aloo “nini nɛ ngɛ kae.”
^ Ngɛ Hebri gbi mi ɔ, “o kaimi ɔ.”
^ Ngɛ Hebri gbi mi ɔ, “nɛ a bɔ.”
