La 108:1-13
La nɛ David po.
108 I* fĩ si kpɛii, Oo Mawu.
I kɛ ye tsui tsuo* ma la, nɛ ma fia la.
2 O hɛ nɛ tsɛ̃, Oo kpã saku; Oo saku, mo hu o hɛ nɛ tsɛ̃.
Ye hɛ maa tsɛ̃ makɛ.
3 Oo Yehowa, ma je o yi ngɛ ma amɛ a mi,Ma la yi jemi lahi* ha mo ngɛ je ma amɛ a kpɛti.
4 Ejakaa o suɔmi nɛ se pui ɔ kle kɛ su hiɔwe lokoo,Nɛ o we anɔkuale yemi ɔ su bɔku ɔmɛ a mi tɔɔ.
5 Oo Mawu, á wo o nɔ gojoo kɛ be hiɔwe ɔmɛ a he;Á na o hɛ mi nyami ɔ ngɛ zugba a nɔ tsuo.
6 Bɔ nɛ pee nɛ a kpɔ̃ o suɔli ɔmɛ ɔ,Moo ngɔ o hiɔ nine kɛ he wa yi wami, nɛ́ o ha ye sɔlemi ɔ heto.
7 Mawu nɛ e ngɛ klɔuklɔu ɔ* de ke:
“Ma nya, ma ngɔ Shekem kɛ ha kaa weto ní,Nɛ ma susu Sukot Dɔgba a kɛ ha nihi.
8 Ye nɔ́ ji Gilead kaa bɔ nɛ ye nɔ́ ji Manase ɔ,Nɛ Efraim ji dade pɛɛ* kɛ ha ye yi;Yuda ji ye hɛ mi nyɛɛlɔ tso.
9 Moab ji tsesi nɛ i fɔɔ ye nane he ngɛ mi.*
Edom nɔ lɛ ma sake ye tokota kɛ fɔ.
Ma he ose ejakaa ma ye Filistia nɔ kunimi.”
10 Mɛnɔ maa ngɔ mi kɛ ba ma nɛ a fia gbogbo wo he ɔ mi?
Mɛnɔ maa nyɛɛ ye hɛ mi hluu kɛ ya si Edom?
11 Oo Mawu, pi mo nɛ o kua wɔ ɔ lo?Wa Mawu, pi mo nɛ o kɛ wa tabo ɔmɛ yɛ ta hu ɔ lo?
12 Moo ye bua wɔ ngɛ wa haomi ɔ mi,Ejakaa yi wami hemi nɛ je adesa ngɔ ɔ ji yaka.
13 Mawu ma ha wɔ he wami,Nɛ e maa naa wa he nyɛli ɔmɛ a nɔ.
Sisi Ningmahi
^ Ngɛ Hebri gbi mi ɔ, “Ye tsui.”
^ Ngɛ Hebri gbi mi ɔ, “ye hɛ mi nyami ɔ.”
^ Aloo “Ma fia la.”
^ Baiblo komɛ de ke “Mawu nɛ ngɛ e he klɔuklɔu ɔ.”
^ Ngɛ Hebri gbi mi ɔ, “mɔ nɛ he wa.”
^ Ngɛ Hebri gbi mi ɔ, “Moab ji ye hedu tsesi.”
