La 147:1-20
147 Nyɛ je Yah yi!*
E hi kaa a ma la yi jemi lahi* kɛ ha wa Mawu ɔ;Hyɛ bɔ nɛ e hi nɛ e sa saminya ha kaa a ma je e yi!
2 Yehowa ngɛ Yerusalem sisi toe ekohu;E buaa Israelbi nɛ a gbɛ fĩa a nya.
3 E tsaa nihi nɛ a tsui kuɔ ɔ;E fĩɔ a pa amɛ a nɔ.
4 E le dodoe ɔmɛ a yibɔ;E tsɛɔ mɛ tsuo kɛ a biɛ.
5 Wa Nyɔmtsɛ ɔ kle nɛ e ngɛ he wami wawɛɛ nitsɛ;E nɔ́ sisi numi ɔ hí kalemi.
6 Yehowa woɔ nihi nɛ a he jɔ ɔ a nɔ,Se yiwutsotsɛmɛ lɛɛ, e tsɛ̃ɔ mɛ kɛ fiaa si.
7 Nyɛ la sina la ha Yehowa;Nyɛ la yi jemi lahi kɛ ha wa Mawu ɔ, nɛ nyɛɛ fia saku kɛ to he,
8 Nɔ nɛ ngɔɔ bɔku kɛ haa hiɔwe ɔ,Nɔ nɛ haa nɛ hiɔmi nɛɔ ha zugba a,Nɔ nɛ haa nɛ nga puɛɔ ngɛ yoku ɔmɛ a nɔ ɔ.
9 E haa lohwehi niye ní,Nɛ e haa kuakualabite bimɛ nɛ a ngɛ pɛe ɔ niye ní.
10 E bua jɔɛ okpɔngɔ he wami he;Nɛ nɔmlɔ nɛ nane mi wa po, pi nɔ́ ko kulaa ngɛ e hɛ mi.
11 Yehowa bua jɔɔ nihi nɛ yeɔ lɛ gbeye ɔ a he,E bua jɔɔ nihi nɛ a hyɛɔ e suɔmi nɛ se pui ɔ blɔ ɔ a he.
12 Oo Yerusalem, moo wo Yehowa hɛ mi nyami.
Oo Zion, mo je o Mawu ɔ yi.
13 E haa nɛ o ma a agbo ɔmɛ a se lami dade ɔmɛ a he waa;E jɔɔ o bimɛ nɛ a ngɛ o mi ɔ.
14 E ngɔɔ tue mi jɔmi kɛ baa o zugba a nɔ;E haa nɛ o tɔɔ kɛ hwiit nɛ hi pe kulaa.*
15 E tsɔɔ e fami ɔ kɛ baa zugba a nɔ;E munyu ɔ tuɔ fo esɔesɔ.
16 E tsɔɔ snoo kɛ baa kaa lohwe he bwɔmi;E gbɛɔ snoo* kɛ fĩaa kaa lazu.
17 E sakeɔ e gbiɛ ngo ngu ɔmɛ kɛ pueɔ si kaa dongo tɛ.
Mɛnɔ ma nyɛ maa da e fĩɛ ɔ nya?
18 Ke e fã a, gbiɛ ngo ngu ɔmɛ sileɔ.
E haa nɛ e kɔɔhiɔ ɔ fiaa, nɛ nyu ɔmɛ beɔ.
19 E jajeɔ e munyu ɔ kɛ tsɔɔ Yakob;E jajeɔ e blɔ tsɔɔmi ɔmɛ kɛ e kojomi ɔmɛ kɛ tsɔɔ Israel.
20 E pee we nɔ́ ko kaa kikɛ ha we je ma kpa ko;A li e kojomi ɔmɛ a he nɔ́ ko fɛɛ.
Nyɛ je Yah yi!*
Sisi Ningmahi
^ Aloo “Haleluyah!” “Yah” ji biɛ Yehowa a kpiti pomi.
^ Aloo “a maa fia la.”
^ Ngɛ Hebri gbi mi ɔ, “hwiit nɛ wo zɔ.”
^ Blɛfo gbi munyungu nɛ ji frost lɛ a ngɛ tsɔɔe ngɛ hiɛ ɔ nɛ.
^ Aloo “Haleluyah!” “Yah” ji biɛ Yehowa a kpiti pomi.
