La 18:1-50
Kɛ ha la nɔ hyɛlɔ ɔ. La nɛ Yehowa sɔmɔlɔ David po. Ligbi nɛ Yehowa kpɔ̃ lɛ kɛ je e he nyɛli ɔmɛ tsuo a dɛ mi nɛ e kpɔ̃ lɛ kɛ je Saul hu dɛ mi ɔ, e tu munyuhi nɛ ngɛ la nɛ ɔ mi ɔ kɛ ha Yehowa. E de ke:
18 Oo Yehowa, i suɔ mo, mo ji ye he wami.
2 Yehowa ji ye tɛsa, kɛ ye he piɛ pomi he, kɛ nɔ nɛ heɔ ye yi wami.
Ye Mawu ɔ ji ye tɛsa, e ngɔ lɛ i saa we ngɛ,Lɛ ji ye tsɛ̃i kɛ ye yi wami hemi koli,* ye wesa he nɛ ngɛ slɔkee.*
3 I ngɛ Yehowa, nɔ nɛ sa yi jemi ɔ tsɛe,Nɛ e ma kpɔ̃ mi kɛ je ye he nyɛli ɔmɛ a dɛ mi.
4 Gbenɔ kpã amɛ bɔle mi kɛ kpe;Yaka nimli nɛ a ngɛ kaa nyu nɛ ngɛ bee babaaba wo ye he gbeye.
5 Yɔkɔ* kpã amɛ bɔle mi kɛ kpe;Gbenɔ klama amɛ kɛ mi ba kpe.
6 Ngɛ ye haomi be mi ɔ, i tsɛ Yehowa,I ya nɔ nɛ i fo ya kɛ bi ye Mawu ɔ yemi kɛ buami.
E nu ye gbi ngɛ e sɔlemi we ɔ,Nɛ ya nɛ i fo kɛ bi yemi kɛ buami ɔ su e tue mi.
7 Kɛkɛ nɛ zugba a bɔni mimiɛmi, nɛ e hoso;Yoku ɔmɛ a sisi tomi ɔmɛ hosoNɛ a mimiɛ kɛ ya kɛ ba, ejakaa a wo e mi mi la.
8 Lasuku je e gugwɔ mi,Nɛ la nɛ sãã nɔ́ je e nya mi;La ngu hɛuu tso kɛ je e ngɔ.
9 E ha nɛ hiɔwe nya ba si benɛ e ngɛ si kplee ɔ,Nɛ diblii kpii ngɛ e nane si.
10 E hi kerub nɔ kɛ te kɛ ba.
E hi bɔfo ko* pɛlihi a nɔ kɛ sa kɛ ba zugba.
11 Nɛ e ngɔ diblii kɛ ha e he,E kɛ ha e he tsuo kɛ kpe kaa bo tsu,Ngɛ nyu nɛ yu tuu kɛ bɔku kpii mi.
12 E hɛ mi nɛ ngɛ kpɛe ɔ he je ɔ,Gbiɛ ngo ngu kɛ la ngu hɛuu je bɔku ɔmɛ a mi.
13 Kɛkɛ nɛ Yehowa ha nɛ hiɔwe bɔni simi;Nɔ Nɛ E Nɔ Kuɔ Pe Kulaa a ha nɛ a nu e gbiNɛ gbiɛ ngo ngu kɛ la ngu hɛuu je bɔku ɔ mi kɛ ba.
14 E tsɛ̃ e kɛ̃ɛ̃ mi bi ɔmɛ, nɛ e gbɛ mɛ ngɔ fĩa;E ha nɛ e we oslabai ɔ gba, nɛ a juɛmi gbɛ.
15 A na pa amɛ* a sisi heii;Oo Yehowa, ngɛ o hɛ mi kami ɔ kɛ o gugwɔ mi flimi ɔ he je ɔ,A na zugba a sisi tomi ɔmɛ.
16 E kpa e nine mi kɛ je hiɔwe;E pɛtɛ ye he nɛ e gbla mi kɛ je nyu nɛ mi kuɔ mi.
17 E kpɔ̃ mi kɛ je ye he nyɛlɔ nɛ he wa a dɛ mi,Kɛ je ni nɛmɛ nɛ a nyɛɔ mi, nɛ a he wa pe mi ɔ a dɛ mi.
18 A te si kɛ wo mi ngɛ ye amanehlu ligbi ɔ nɔ,Se Yehowa ye bua mi.
19 E ngɔ mi kɛ ba he ko nɛ ngɛ slɔkee;*E kpɔ̃ mi, ejakaa e bua jɔ ye he.
20 Yehowa jɔɔ mi ngɛ ye dami ɔ nya;E woɔ mi hiɔ ngɛ bɔ nɛ ye nine he tsɔ ha a nya.
21 Ejakaa i nyɛɛɔ Yehowa blɔ ɔmɛ a nɔ,I ji ye Mawu ɔ se nɛ́ lɔ ɔ ba pee yayami ha mi.
22 Ye hɛ ngɛ e kojomi ɔmɛ tsuo a nɔ;I be ye hɛ mae kɛ fɔ e blɔ tsɔɔmi ɔmɛ a nɔ.
23 Piami ko be ye he hie ngɛ e hɛ mi,Nɛ ma yu ye he ngɛ yayami he.
24 Yehowa nɛ wo mi hiɔ ngɛ ye dami ɔ nya;Ngɛ bɔ nɛ ye nine he tsɔ ngɛ e hɛ mi ɔ nya.
25 Nɔ nɛ yeɔ anɔkuale ɔ, o yeɔ lɛ anɔkuale;Nɔ nɛ piami ko be e he ɔ, o haa nɛ e naa kaa piami ko be o he;
26 Nɔ nɛ he tsɔ ɔ, o haa nɛ e naa kaa o he tsɔ,Se nɔ nɛ sisiɔ nɔ ɔ, o haa nɛ e naa kaa o le ga.
27 Ejakaa o heɔ nihi nɛ a ní ngɛ mɔbɔ* ɔ a yi wami,Se o baa he nɔ woli* si.
28 Oo Yehowa, mo lɛ o suɔ ye kane ɔ,Ye Mawu ɔ haa nɛ ye diblii peeɔ la.
29 Ngɛ o yemi kɛ buami nya a, ma nyɛ ma tua basabasa peeli;Ngɛ Mawu he wami nya a, ma nyɛ ma tu gbogbo.
30 Anɔkuale Mawu ɔ blɔ ɔ hi kɛ pi si;Yehowa munyu ɔ, a tsu he.
E ji tsɛ̃i kɛ ha nihi tsuo nɛ a ba saa we ngɛ e ngɔ ɔ.
31 Mɛnɔ ji Mawu ngɛ Yehowa se?
Nɛ mɛnɔ ji tɛsa ngɛ wa Mawu ɔ se?
32 Anɔkuale Mawu ɔ ji nɔ nɛ woɔ mi he wami,Nɛ e ma ha nɛ ye blɔ ɔ maa hi kɛ pi si.
33 E haa nɛ ye nane peeɔ kaa afugbɛ nane;E haa nɛ i daa hehi nɛ ya hiɔwe.
34 E tsɔseɔ ye nine kɛ haa ta hwumi;Ye kɔni ma nyɛ maa dɔ akɔblee kɛ̃ɛ̃ mi.
35 O haa mi o yi wami hemi tsɛ̃i ɔ,O hiɔ nine ɔ yeɔ kɛ buaa mi,*Nɛ o he si bami ɔ peeɔ mi nɔmlɔ ngua.
36 O ha nɛ ye nane blɔ ɔ bli gbajaa;Ye nane* be sanee.
37 Ma fiee ye he nyɛli ɔmɛ a se, nɛ ye nine maa su a nɔ;I be ye se kpalee kɛ ya si be nɛ a hɛ mi ma kpata pɛsɛpɛsɛ.
38 Nɛ ma fiaa mɛ ní nɛ a be si tee hu;A maa nɔ ngɛ ye nane nya.
39 O ma ha mi he wami nɛ ma kɛ hwu ta a;O ma ha nɛ ye he nyɛli ɔmɛ maa nɔɔ si ngɛ ye hɛ mi.
40 O ma ha nɛ ye he nyɛli ɔmɛ maa tu fo ngɛ ye hɛ mi;*Nɛ ni nɛmɛ nɛ a nyɛɔ mi ɔ, ma kpata a hɛ mi.*
41 A foɔ ya kɛ biɔ yemi kɛ buami, se nɔ ko be nɛ ma he a yi wami;A foɔ ya kɛ tsɛɔ Yehowa po, se e pui a nya mi.
42 Ma si* mɛ bukɔbukɔ kaa bunyuku nɛ kɔɔhiɔ muɔɔ kɛ yaa;Ma sake mɛ kɛ pue he kaa mɔsɔ ngɛ gbɛjegbɛ ɔmɛ a nɔ.
43 O ma kpɔ̃ mi kɛ je nihi nɛ a hlaa tɔmi ngɛ ye he ɔ a dɛ mi.
O maa hla mi kaa je mahi a nyatsɛ;
Nihi nɛ i li mɛ ma sɔmɔ mi.
44 Amaniɛ bɔmi kɛkɛ nɛ́ a maa nu ɔ ma ha nɛ a maa bu mi tue;Ma se bi ma ba kplã si ngɛ ye hɛ mi.
45 Ma se bi a kɔni mi ma jɔ̃;*A maa je a he piɛ pomi he ɔmɛ kɛ ba kɛ he domi blibliibli.
46 Yehowa hɛ ngɛ! Á je ye Tɛsa a yi!
Á wo ye Mawu nɛ heɔ ye yi wami ɔ hɛ mi nyami.
47 Anɔkuale Mawu ɔ yeɔ lue kɛ haa mi;E baa ni ɔmɛ si kɛ woɔ ye sisi.
48 E kpɔ̃ɔ mi kɛ jeɔ ye he nyɛli nɛ a mi mi fu ɔ a dɛ mi;O woɔ ye nɔ kɛ yaa tsitsaa nɛ nihi nɛ a tuaa mi ɔ a nine sui ye nɔ;O heɔ ye yi wami kɛ jeɔ yiwutsotsɛ ɔ dɛ mi.
49 Oo Yehowa, enɛ ɔ he je nɛ ma wo o hɛ mi nyami ngɛ je ma amɛ a kpɛti ɔ nɛ,Nɛ ma la yi jemi lahi* kɛ ha o biɛ ɔ.
50 E peeɔ ní nguanguahi kɛ heɔ e matsɛ ɔ yi wami;*E jeɔ suɔmi nɛ se pui kpo kɛ tsɔɔ nɔ nɛ e pɔ lɛ nu ɔ,Kɛ tsɔɔ David kɛ e nina* kɛ yaa neneene.
Sisi Ningmahi
^ Aloo “ye yi wami helɔ nɛ e he wa.” Hyɛ Munyu Komɛ A Sisi Tsɔɔmi.
^ Aloo “ye he nɛ ya hiɔwe.”
^ Ngɛ Hebri gbi mi ɔ, “Sheol.” Hyɛ Munyu Komɛ A Sisi Tsɔɔmi.
^ Ngɛ Hebri gbi mi ɔ, “E hi mumi ko.”
^ Aloo “A na nyu dɔ ɔmɛ.”
^ Aloo “he ko nɛ ngɛ gbajaa.”
^ Ngɛ Hebri gbi mi ɔ, “he nɔ womi hɛngmɛhi.”
^ Aloo “nihi nɛ a waa mɛ yi mi.”
^ Aloo “baa ye yi.”
^ Aloo “nane kpɔ mi.”
^ Aloo “ma plɛ a se kɛ wo mi.”
^ Ngɛ Hebri gbi mi ɔ, “ma ma a nya.”
^ Aloo “Ma gbee.”
^ Aloo “Ma se bi a he wami nɔ ma gbɔ.”
^ Aloo “ma fia la.”
^ Aloo “E yeɔ kunimi nguanguahi kɛ haa e matsɛ ɔ.”
^ Ngɛ Hebri gbi mi ɔ, “ngmɛdu.” Hyɛ Munyu Komɛ A Sisi Tsɔɔmi.
