La 25:1-22
David la.
א [Alef]
25 Ao Yehowa, mo lɛ i plɛ ye hɛ mi kɛ tsɔɔ.*
ב [Bet]
2 Ye Mawu, i ngɔ ye hɛ kɛ fɔ o nɔ;Ko ha nɛ ye hɛ mi nɛ pue si.
Ko ha nɛ ye he nyɛli ɔmɛ nɛ a nya ngɛ ye nɔ́ nami ɔ he.
ג [Gimel]
3 Niinɛ, nihi nɛ a ngɔɔ a hɛ kɛ fɔɔ o nɔ ɔ, a ti nɔ ko nɔ ko hɛ mi be si puee,Se nihi nɛ a tsɔɔ nɔ nɛ e pee we nɔ ko se blɔ ɔ, a hɛ mi ma pue si.
ד [Dalet]
4 Ao Yehowa, mo ha nɛ ma le o blɔ ɔmɛ;Tsɔɔ mi o blɔ ɔmɛ.
ה [He]
5 Ha nɛ ma nyɛɛ ngɛ o we anɔkuale ɔ mi, nɛ́ o tsɔɔ mi ní,Ejakaa mo ji Mawu nɛ heɔ ye yi wami.
ו [Waw]
Ngɛ ligbi ɔ mi tsuo ɔ, i ngɔɔ ye hɛ kɛ fɔɔ o nɔ.
ז [Zayin]
6 Ao Yehowa, mo kai o mɔbɔ nami kɛ o suɔmi nɛ se puiNɛ́ o jeɔ kpo be fɛɛ be ɔ.*
ח [Het]
7 Ko kai yayamihi nɛ i pee kɛ tɔmihi nɛ i tɔ̃ ngɛ ye nihe mi ɔ.
Ao Yehowa, mo kai mi ngɛ o suɔmi nɛ se pui ɔ nya,Ngɛ o kpakpa peemi ɔ he je.
ט [Tet]
8 Yehowa hi, nɛ e da.
Enɛ ɔ he je nɛ e tsɔɔ yayami peeli bɔ nɛ e sa nɛ a hi si ha a nɛ.
י [Yod]
9 E ma kudɔ nihi nɛ a he jɔ ɔ konɛ a pee nɔ́ nɛ da,*Nɛ e maa tsɔɔ nihi nɛ a he jɔ ɔ e blɔ ɔ.
כ [Kaf]
10 Suɔmi nɛ se pui kɛ anɔkuale yemi ngɛ Yehowa blɔ ɔmɛ tsuo a nɔKɛ ha nihi nɛ a yeɔ e somi ɔ kɛ e kaimi ɔmɛ a nɔ ɔ.
ל [Lamed]
11 Ao Yehowa, e ngɛ mi kaa ye tɔmi ɔmɛ kle mohu lɛɛ,Se o biɛ ɔ he je ɔ, moo ngɔ kɛ ke mi.
מ [Mem]
12 Nɔ nɛ yeɔ Yehowa gbeye ɔ,
E maa tsɔɔ lɛ blɔ nɛ e sa nɛ e nyɛɛ nɔ.
נ [Nun]
13 E* ma ná nɔ́ kpakpa,Nɛ e sisi bimɛ a* nine maa su zugba a nɔ.
ס [Samek]
14 Nihi nɛ yeɔ Yehowa gbeye ɔ, mɛ lɛ huɛ bɔmi gbagbanii ngɛ a kɛ lɛ a kpɛti,Nɛ e haa nɛ a leɔ e somi ɔ.
ע [Ayin]
15 Ye hɛ ngɛ Yehowa nɔ be fɛɛ be,Ejakaa e ma je ye nane ngɛ ya mi.
פ [Pe]
16 Mo plɛ o hɛ mi kɛ tsɔɔ mi nɛ o na mi mɔbɔ,Ejakaa imi nɔ kake pɛ lɛ piɛ, nɛ i be yemi kɛ bualɔ ko.
צ [Tsade]
17 Ye tsui mi haomi ɔmɛ hiɛ babauu;Mo kpɔ̃ mi ngɛ ye nɔ́ nami ɔ mi.
ר [Resh]
18 Moo hyɛ ye haomi ɔ kɛ ye nyagba a,Nɛ́ o ngɔ ye he yayami ɔmɛ tsuo kɛ ke mi.
19 Hyɛ bɔ nɛ ye he nyɛli ɔmɛ a he hiɛ ha,Kɛ bɔ nɛ a ngɛ mi nyɛe ngmlikiti ha.
ש [Shin]
20 Moo po ye wami* he piɛ, nɛ o he ye yi wami.
Ko ha nɛ ye hɛ mi nɛ pue si, ejakaa i sa we ngɛ o ngɔ.
ת [Taw]
21 Anɔkuale yemi kɛ dami nɛ́ po ye he piɛ,Ejakaa i ngɔ ye hɛ kɛ fɔ o nɔ.
22 Ao Mawu, mo kpɔ̃ Israel ngɛ e haomi ɔmɛ tsuo a mi.
Sisi Ningmahi
^ Aloo “mo nɛ i woɔ ye klaa nɔ kɛ haa.”
^ Aloo “Nɛ́ ngɛ kɛ je blema lokoo ɔ.”
^ Ngɛ Hebri gbi mi ɔ, “nihi nɛ a he jɔ ɔ ngɛ kojomi mi.”
^ Aloo “E klaa.”
^ Ngɛ Hebri gbi mi ɔ, “ngmɛdu.” Hyɛ Munyu Komɛ A Sisi Tsɔɔmi.
^ Aloo “ye klaa.”
