La 40:1-17
Kɛ ha la nɔ hyɛlɔ ɔ. La nɛ David po.
40 I hyɛ Yehowa blɔ wawɛɛ nitsɛ,*Nɛ e ta tue ha mi,* nɛ e nu ya nɛ i fo kɛ bi yemi kɛ buami ɔ.
2 E wo ye nɔ kɛ je muɔ kɛ e mi nyu babauu mi,Kɛ je mɔsɔ nɛ mi ti ɔ mi.
Nɛ e ngɔ ye nane kɛ ma tɛsa nɔ;E ha nɛ ye nane ma si saminya.
3 Kɛkɛ nɛ e ngɔ la ehe ko kɛ wo ye nya,Yi jemi la kɛ ha wa Mawu ɔ.
Nihi fuu maa na nɔ́ nɛ Mawu pee ɔ, nɛ a maa ye gbeyeNɛ a kɛ a hɛ maa fɔ Yehowa nɔ.
4 Nɔ nɛ ngɔɔ e hɛ kɛ fɔɔ Yehowa nɔNɛ́ e kɛ e hɛ fɔɛ atuã tsɔli aloo lakpatsɛmɛ a nɔ ɔ ngɛ bua jɔmi.
5 Hyɛ níhi sɔuu nɛ o pee,Oo Yehowa ye Mawu,O ní tsumi ɔmɛ ngɛ nyakpɛ nɛ o susuɔ wa he wawɛɛ.
Nɔ ko be nɛ a kɛ lɛ maa to o he;Ke i ke ma tu a he munyu aloo ma de ɔ,A maa hiɛ babauu tsɔ pe bɔ nɛ ma nyɛ ma de!
6 Afɔle kɛ nike ní ɔ, o sume,*Se o bli ye tue konɛ ma nu nɔ́.
O bi we sami afɔlehi kɛ yayami afɔlehi.
7 Kɛkɛ nɛ i de ke: “Hyɛ, i ba.
A ngma ye he sane ngɛ womi kpo ɔ mi.
8 Oo ye Mawu, ye bua jɔɔ o suɔmi nya ní peemi he,Nɛ o mlaa a ngɛ ye tsui mi tɔɔ.
9 I jajeɔ sane kpakpa nɛ kɔɔ dami he ɔ ngɛ asafo ngua a mi.
Oo Yehowa, kaa bɔ nɛ mo nitsɛ o le ɔ,Hyɛ! i ma we ye nya.
10 I laa we o dami ɔ nɔ ngɛ ye tsui mi.
I jajeɔ o we anɔkuale yemi ɔ kɛ yi wami hemi ɔ.
I laa we o suɔmi nɛ se pui kɛ o we anɔkuale ɔ nɔ ngɛ asafo ngua a mi.”
11 Oo Yehowa, ko je o mɔbɔ nami ɔ ngɛ ye nɔ.
O suɔmi nɛ se pui ɔ kɛ o we anɔkuale ɔ nɛ bu ye he daa.
12 Haomihi nɛ bɔle mi kɛ kpe ɔ hiɛ babauu tsɔ pe bɔ nɛ ma nyɛ ma kane.
Ye tɔmi ɔmɛ hiɛ babauu ngɛ ye nɔ, nɛ i nyɛ we nɛ ma na ye blɔ ɔ;A hiɛ babauu pe ye yi bwɔmi po,Nɛ ye kã nya ta.
13 Ao Yehowa, i kpa mo pɛɛ nɛ o je o tsui mi nɛ o he ye yi wami.
Ao Yehowa, moo ye oya nɛ o ba ye bua mi.
14 Nihi tsuo nɛ a ngɛ hlae nɛ a gbe mi ɔ,*Zo nɛ gbe mɛ nɛ a hɛ mi nɛ pue si.
Nihi nɛ a ngɛ hlae nɛ ma na nɔ́ ɔ,Á kɛ hɛ mi si puemi nɛ kpale a se.
15 Nihi nɛ a ngɛ mi dee ke: “Ɛhɛɛ! Ɛhɛɛ!” ɔ,
A hɛ mi nɛ pee mɛ yaa ngɛ mɛ nitsɛmɛ a hɛ mi si puemi ɔ he je.
16 Se nihi nɛ hlaa o se blɔ ɔ,Ha nɛ a nya, nɛ́ a bua nɛ jɔ ngɛ o mi.
Nihi nɛ a suɔ yi wami hemi níhi nɛ o pee ɔ nɛ́ a de be fɛɛ be ke:
“Á wo Yehowa nɔ gojoo.”
17 Se ohiatsɛ kɛ nɔ nɛ be yemi kɛ bualɔ ji mi;Yehowa o hɛ nɛ hi ye he.
Mo ji ye yemi kɛ bualɔ kɛ ye kpɔlɔ;Ye Mawu, koo to tsle.
Sisi Ningmahi
^ Aloo “I to ye tsui si, nɛ i mlɛ Yehowa.”
^ Aloo “Nɛ e ba si nɛ e bu mi tue.”
^ Aloo “o bua jɔɛ he.”
^ Aloo “a ngɔ ye klaa a.”
