La 41:1-13
Kɛ ha la nɔ hyɛlɔ ɔ. La nɛ David po.
41 Nɔ fɛɛ nɔ nɛ e susuɔ nɔ nɛ e ní ngɛ mɔbɔ ɔ he ɔ ngɛ bua jɔmi;Yehowa ma kpɔ̃ lɛ ngɛ haomi be mi.
2 Yehowa maa bu e he, nɛ e ma ha nɛ e hi wami mi.
A ma tsɛ lɛ ke nɔ nɛ e ngɛ bua jɔmi ngɛ zugba a nɔ;O be hae nɛ nɔ́ nɛ e he nyɛli* ngɛ hlae kaa e ba e nɔ ɔ nɛ ba mi kɔkɔɔkɔ.
3 Yehowa maa hyɛ e nɔ ngɛ e hiɔ sa nɔ;Be mi nɛ e be he wami ɔ, o ma tsake e sa a kulaa.
4 Ejakaa i de ke: “Oo Yehowa, naa mi mɔbɔ.
Mo tsa mi,* ejakaa i pee yayami kɛ si mo.”
5 Ye he nyɛli ɔmɛ tuɔ munyu yayahi ngɛ ye he ke:
“Mɛni be e ma gbo nɛ e biɛ maa laa?”
6 Ke a kpɛti nɔ ko ba slaa mi ɔ, e* tuɔ lakpa munyuhi.
E ba hlaa ye he sane yaya konɛ e ya sɛɛ;Lɔ ɔ se ɔ, e yaa nɛ e ya gbɛɔ kɛ fĩaa.
7 Nihi tsuo nɛ a nyɛɔ mi ɔ kɛ a sibi tuɔ munyu kusikusi;A toɔ ga yaya ngɛ ye he nɛ a deɔ ke:
8 “Nɔ́ yaya ba e nɔ;Amlɔ nɛ ɔ nɛ e nɔ si ɔ, e be si tee hu.”
9 Nɔ nɛ tue mi jɔmi ngɛ i kɛ lɛ wa kpɛti, nɛ́ i kɛ ye hɛ fɔ e nɔ,Nɛ́ e yeɔ ye niye ní ɔ, lɛ po e te si kɛ wo mi.*
10 Se moo na mi mɔbɔ nɛ o wo ye nɔ, Oo Yehowa,Konɛ ma gbla a tue ngɛ nɔ́ nɛ a pee ɔ he.
11 Nɔ́ nɛ ma ha nɛ ma le kaa o ná ye he bua jɔmi ji:
Ke ye he nyɛli ɔmɛ nyɛ we nɛ a he ose kaa a ye ye nɔ kunimi.
12 Imi lɛɛ o piɛɛ ye he ngɛ ye we anɔkuale yemi ɔ he je;O ma ha nɛ ma hi o hɛ mi kɛ ya neneene.
13 A je Yehowa, Israel Mawu ɔ yiKɛ ya neneene.*
Amen, Amen.
Sisi Ningmahi
^ Aloo “e he nyɛli a klaa.” Hyɛ Munyu Komɛ A Sisi Tsɔɔmi.
^ Aloo “ye klaa.”
^ Ngɛ Hebri gbi mi ɔ, “e tsui.”
^ Ngɛ Hebri gbi mi ɔ, “e wo e nane se kpo aloo e nane se ja nɔ kɛ si mi.”
^ Aloo “Kɛ je neneene kɛ ya neneene.”
