La 42:1-11
Kɛ ha la nɔ hyɛlɔ ɔ. Kora binyumu ɔmɛ a Maskil.*
42 Oo Mawu, kaa bɔ nɛ afugbɛ hlaa nyu dɔhi a se blɔ ɔ,Jã kɛ̃ nɛ i* hlaa o se blɔ.
2 Mawu hɛ kalɔ ɔ he kuma yeɔ mi.*
Mɛni be nɛ ma ba Mawu hɛ mi?
3 Ye vonyu ji ye niye ní nyɔ kɛ pia;Ligbi ɔ mi tsuo ɔ, nihi yeɔ ye he fɛu ke: “Jije o Mawu ɔ ngɛ?”
4 I kaiɔ ní nɛ ɔmɛ, nɛ i deɔ mo ye tsui mi susumihi tsuo,*Ejakaa sa a, i kɛ nihi babauu nyɛɛɔ;Jinɛ i nyɛɛɔ blɛuu ngɛ a hɛ mi kɛ yaa Mawu we ɔ,Kɛ ose hemi kɛ si nami,Kaa nimli asafo nɛ a ngɛ gbijlɔ yee.
5 Mɛni he je nɛ i* pee vii ɔ?
Mɛni he je nɛ i ngɛ haoe ngɛ ye mi kikɛ nɛ ɔ?
Ma mlɛ Mawu,Ejakaa loloolo ɔ, ma ya nɔ nɛ ma je e yi kaa ye Yi Wami Helɔ Ngua.
6 Ye Mawu, i* pee vii.
Lɔ ɔ he je nɛ i kaiɔ mo,Ngɛ Yordan zugba a nɔ, kɛ Hermon yoku ɔmɛ a nɔ,Kɛ Mizar Yoku* ɔ nɔ ɔ nɛ.
7 Nyuhi nɛ a mi kuɔ woɔ a gbi nɔ, nɛ nyuhi nɛ a mi kuɔ heɔ nɔNgɛ o nyu nɛ ngɛ si puee ɔ pɛmi nya.
O we oslɔkehi nɛ a pee hamahama a tsuo ku pue ye nɔ.
8 Ke je na a, Yehowa ma je e suɔmi nɛ se pui ɔ kpo kɛ tsɔɔ mi,Nɛ ke je jɔ ɔ, ma la e la a—ma sɔle kɛ ha Mawu nɛ haa mi wami ɔ.
9 Ma bi Mawu, nɛ ji ye tɛsa a ke:
“Mɛni he je nɛ o hɛ je ye nɔ ɔ?
Mɛni he je nɛ e sa kaa ma nyɛɛ kɛ ya kɛ ba mɔbɔmɔbɔ ngɛ yi mi nɛ ye he nyɛlɔ ɔ waa mi ɔ he je?”
10 Ye he nyɛli kɛ nɔ gbemi munyuhi bɔɔ mi ahlua;*Ligbi ɔ mi tsuo ɔ, a yeɔ ye he fɛu ke: “Jije o Mawu ɔ ngɛ?”
11 Mɛni he je nɛ i* pee vii ɔ?
Mɛni he je nɛ i ngɛ haoe ngɛ ye mi kikɛ nɛ ɔ?
Ma mlɛ Mawu,Ejakaa loloolo ɔ, ma ya nɔ nɛ ma je e yi kaa ye Yi Wami Helɔ Ngua kɛ ye Mawu.
Sisi Ningmahi
^ Aloo “ye klaa.”
^ Aloo “yeɔ ye klaa.”
^ Aloo “nɛ i plɛɔ ye klaa kɛ pueɔ si.”
^ Aloo “ye klaa.”
^ Aloo “ye klaa.”
^ Aloo “yoku nyafii.”
^ Baiblo komɛ de ke “Ye he nyɛli bɔɔ mi ahlua kaa nɔ́ nɛ a ngɛ ye wu ɔmɛ ywiae.”
^ Aloo “ye klaa.”
