La 44:1-26
Kɛ ha la nɔ hyɛlɔ ɔ. Kora binyumu ɔmɛ a la. Maskil.*
44 Oo Mawu, wa nu kɛ wɔ nitsɛmɛ wa tue,Wa nɛmɛ ɔmɛ de wɔNíhi nɛ o pee ngɛ a be ɔ mi,Nɛ ji níhi nɛ o pee blema lokoo ɔ.
2 O kɛ o nine fiee je mahi,Nɛ o to wa nɛmɛ ɔmɛ si ngɛ lejɛ ɔ.
O ywia je mahi, nɛ o fiee mɛ.
3 Pi mɛ nitsɛmɛ a klaate nɛ a kɛ ngɔ zugba a,Nɛ pi mɛ nitsɛmɛ a kɔni nɛ ha nɛ a ye kunimi.
Se mohu ɔ, o hiɔ nine, kɛ o kɔni, kɛ o hɛ mi la a lɛ ha nɛ a ye kunimi ɔ nɛ,Ejakaa o bua jɔ a he.
4 Oo Mawu, mo ji ye Matsɛ;Mo fã* nɛ Yakob nɛ ye kunimi kɛ pi si.*
5 Wa maa kpale wa he nyɛli ɔmɛ ngɛ o he wami nya;Wa maa naa nihi nɛ teɔ si kɛ woɔ wɔ ɔ a nɔ ngɛ o biɛ mi.
6 Ejakaa i kɛ ye hɛ fɔɛ ye kɛ̃ɛ̃ ɔ nɔ,Nɛ ye klaate ɔ be nyɛe ma he ye yi wami.
7 Mo lɛ o he wa yi wami ngɛ wa he nyɛli ɔmɛ a dɛ,Mo lɛ o pue nihi nɛ nyɛɔ wɔ ɔ a hɛ mi si.
8 Wa ma je Mawu yi daa ligbi,Nɛ wa ma je o biɛ ɔ yi kɛ ya neneene. (Sela)
9 Se amlɔ nɛ ɔ, o sake wɔ fɔ he nɛ o pue wa hɛ mi si,Nɛ o kɛ wa tabo ɔmɛ yɛ ta hu.
10 O yaa nɔ nɛ o haa nɛ wa tuɔ wa he nyɛli ɔmɛ a nya fo;Nihi nɛ a nyɛɔ wɔ ɔ ngɔɔ nɔ́ fɛɛ nɔ́ nɛ a suɔ.
11 O ngɔɔ wɔ kɛ haa wa he nyɛli ɔmɛ konɛ a ye wɔ kaa jijɔhi;O gbɛ wɔ kɛ fĩa je ma amɛ a mi.
12 O juaa o we bi ɔmɛ kɛ jua nɛ ba si kulaa;O ná we juami nɛ o jua mɛ ɔ he se.*
13 O ha nɛ wa kpɔ mi bi ɔmɛ gbeɔ wa he guɛ,O ha nɛ nihi tsuo nɛ bɔle wɔ ɔ muɔɔ wɔ, nɛ a yeɔ wa he fɛu.
14 O ha nɛ wa pee nihi nɛ bumi be a he* ngɛ je ma amɛ a kpɛti,A hyɛɛ wɔ nɛ a mimiɛɔ a yi.
15 Daa ligbi ɔ, ye hɛ mi pueɔ si,Nɛ zo gbeɔ mi kpɔtɔɔ
16 Ngɛ a we ahlua bɔmi ɔmɛ kɛ a jɛmi ɔmɛ a he je,Ngɛ wa he nyɛlɔ ɔ nɛ ngɛ lue yee ɔ he je.
17 Ní nɛ ɔmɛ tsuo ba wa nɔ, se wa hɛ ji o nɔ,Nɛ wa ji somi nɛ o kɛ wɔ so ɔ se
18 Wa tsui gba we kɛ ji o he;Wa nane hu gba we kɛ ji o blɔ ɔ nɔ.
19 Se o ku wɔ ngɔ pue si ngɛ nga mi gbehi a hi he;O kɛ diblii kpii ha wa nɔ.
20 Ke wa hɛ je wa Mawu ɔ biɛ nɔAloo wa gbɛ wa nine mi nɛ wa sɔle ha ma se mawu ko ɔ,
21 Anɛ Mawu be nae lo?
E le laami mi sanehi nɛ ngɛ tsui mi.
22 O he je ɔ, daa ligbi ɔ, a gbeɔ wɔ nɛ wa gboɔ;A bu wɔ kaa jijɔhi nɛ a yaa gbe.
23 Oo Yehowa, mɛni he je nɛ o hwɔɔ si loloolo ɔ? Tee si.
O hɛ nɛ tsɛ̃! Koo ya nɔ nɛ o sake wɔ kɛ fɔ he kɛ ya neneene.
24 Mɛni he je nɛ o ngɔ o hɛ mi kɛ laa a?
Mɛni he je nɛ o hɛ je wa haomi ɔmɛ kɛ yi mi nɛ a ngɛ wɔ wae ɔ nɔ ɔ?
25 Ejakaa a ba wɔ* si kɛ su zugba;A nyɛ wa nɔmlɔ tso ɔmɛ a nɔ kɛ wo zugba.
26 Moo te si kaa wa yemi kɛ bualɔ!
Mo kpɔ̃ wɔ ngɛ o suɔmi nɛ se pui ɔ he je.
Sisi Ningmahi
^ Aloo “ha.”
^ Aloo “Yakob nɛ e ná yi wami hemi ngua.”
^ Aloo “O ná we nɔ́ ko ngɛ bɔ nɛ o jua mɛ ha a nɔ.”
^ Ngɛ Hebri gbi mi ɔ, “wa pee abɛ bumi nɔ́.”
^ Aloo “a ba wa klaa.”
