La 45:1-17
Kɛ ha la nɔ hyɛlɔ ɔ; a kɛ fɔ̃ “Lili* Mɔmɔ Ɔmɛ.” Kora binyumu ɔmɛ a la. Maskil.* Suɔmi la.
45 Nɔ́ kpakpa ko hyi ye tsui kɛ be nɔ.
I de ke: “Ye la a* kɔɔ matsɛ ko he.”
Ye lilɛ nɛ́ pee womi ngmalɔ nɛ he be* ningma tso.
2 Mo nɛ o he ngɛ fɛu pe kulaa ngɛ nimli a bimɛ a kpɛti.
O nya mi munyu ngɔɔ.
Lɔ ɔ he je nɛ Mawu jɔɔ mo kɛ yaa neneene ɔ nɛ.
3 Oo he walɔ, fĩ o klaate ɔ kɛ wo o ngmɔngmɔ he,Ngɛ o hɛ mi nyami kɛ o we agboje ɔ mi.
4 Nɛ́ o ya ye kunimi* ngɛ o we agboje ɔ mi;Moo hi o we okpɔngɔ ɔ nɔ ngɛ anɔkuale kɛ he si bami kɛ dami mi,Nɛ o hiɔ nine ma tsu* ní gbeyegbeyehi.
5 O kɛ̃ɛ̃ mi bi ɔmɛ a nya ba, nɛ a haa nɛ mahi nɔɔ si ngɛ o hɛ mi;A gbɔɔ matsɛ ɔ he nyɛli ɔmɛ a tsui mi.
6 Mawu ji o matsɛ sɛ kɛ yaa neneene;O matsɛ tso ɔ ji dami* matsɛ tso.
7 O suɔ dami, nɛ o hiɔ yi wu tso ní peepee.
Enɛ ɔ he je nɛ Mawu, nɛ ji o Mawu ɔ ngɔ bua jɔmi nu kɛ pɔ mo nu pe o huɛmɛ ɔmɛ ɔ nɛ.
8 Mimɛ kɛ aloe tso kɛ kasia tso he via liliili ngɛ o tade ɔmɛ tsuo a mi;Kpã sakuhi nɛ a fiaa ngɛ matsɛ we ngua nɛ a kɛ suɔ wu pee ɔ mi ɔ haa nɛ o nyaa.
9 Matsɛmɛ a biyihi piɛɛ yihi nɛ o wo a hɛ mi nyami ɔ a he.
Matsɛ yo* ɔ daa si ngɛ o hiɔ nɔ, nɛ e kɛ Ofir sika tsu dla e he.
10 Oo biyo, moo bu tue, ta tue nɛ́ o nu;O hɛ nɛ je o we bi ɔmɛ kɛ o tsɛ we ɔ nɔ.
11 Nɛ matsɛ ɔ hɛ ma ja ngɛ o he fɛu ɔ he,Ejakaa lɛ ji o nyɔmtsɛ,Lɔ ɔ he ɔ, mo kplã si ha lɛ.
12 Tiro biyo ɔ maa ngɔ nike ní kɛ ba;Nyumuhi a kpɛti niatsɛmɛ pe kulaa a maa suɔ kaa a hɛ mi nɛ ba nyami ngɛ o hɛ mi.
13 Matsɛ ɔ biyo ɔ hɛ mi ngɛ nyami wawɛɛ ngɛ matsɛ we ɔ;*A kɛ sika tsu kpã lo níhi kɛ wo e tade ɔ mi.
14 A maa ngɔ lɛ kɛ ba ha matsɛ ɔ kɛ e he tade nɛ a lo saminyayoo.*
A maa ngɔ e huɛmɛ yihi nɛ a li nyumu nɛ a nyɛɛ e se ɔ kɛ ba o hɛ mi.
15 A maa ngɔ mɛ kɛ ba kɛ nyami kɛ bua jɔmi;A maa sɛ matsɛ we ɔ.
16 O binyumu ɔmɛ maa da o nɛmɛ ɔmɛ a nane mi.
O maa pee mɛ ma nikɔtɔmahi ngɛ zugba a nɔ tsuo.
17 Ma ha nɛ yi nɔhi tsuo nɛ maa ba a maa le o biɛ ɔ.
Enɛ ɔ he je nɛ je mahi ma je o yi kɛ ya neneene ɔ nɛ.
Sisi Ningmahi
^ Aloo “Tɔngɔtofoe.”
^ Ngɛ Hebri gbi mi ɔ, “Ye ní tsumi ɔmɛ.”
^ Hebri munyu nɛ ɔ tsɔɔ nihi nɛ a hyɛɛ Mlaa womi ɔ kɛ Ngmami Klɔuklɔu ɔ fã komɛ a nɔ nɛ a ngmaa e mi munyu ɔmɛ kɛ fɔɔ si.
^ Aloo “manye.”
^ Aloo “maa tsɔɔ mo.”
^ Aloo “dami sane yemi.”
^ Aloo “Manyɛ.”
^ Ngɛ Hebri gbi mi ɔ, “ngɛ we ɔ mi.”
^ Baiblo komɛ de ke “tade klɔiihi nɛ a lo ní kɛ wo a mi.”
