La 47:1-9
Kɛ ha la nɔ hyɛlɔ ɔ. La nɛ Kora binyumu ɔmɛ po.
47 Nyɛ mahi tsuo, nyɛɛ fia nyɛ dɛ.
Nyɛɛ kɛ bua jɔmi nɛ he ose kɛ je Mawu yi kaa nihi nɛ a ye kunimi.
2 Ejakaa Yehowa, Nɔ Nɛ E Nɔ Kuɔ Pe Kulaa a he ngɛ nyakpɛ;Lɛ ji Matsɛ ngua nɛ yeɔ zugba a tsuo nɔ.
3 E ngɔɔ mahi kɛ woɔ wa sisi;E ngɔɔ je mahi kɛ woɔ wa nane si.
4 E hlaa wa weto ní kɛ haa wɔ,Weto ní nɛ Yakob, nɔ nɛ e suɔ ɔ kɛ fĩaa a. (Sela)
5 Mawu kuɔ kɛ ho be mi nɛ a kɛ bua jɔmi ngɛ ose hee;Yehowa kuɔ kɛ ho be mi nɛ a ngɛ bɛ* kpae.
6 Nyɛ la yi jemi lahi* ha Mawu, nyɛ la yi jemi lahi.
Nyɛ la yi jemi lahi ha wa Matsɛ ɔ, nyɛ la yi jemi lahi.
7 Ejakaa Mawu ji zugba a tsuo nɔ Matsɛ;Nyɛ la yi jemi lahi, nɛ nyɛ kɔ nɔ́ se.
8 Mawu ba pee Matsɛ ngɛ je ma amɛ a nɔ.
Mawu hii si ngɛ e matsɛ sɛ klɔuklɔu ɔ nɔ.
9 Ma amɛ a hɛ mi nyɛɛli ɔmɛ bua a he nya,A kɛ Abraham Mawu ɔ we bi ɔmɛ.
Ejakaa zugba a nɔ nɔ yeli ɔmɛ* ɔ, Mawu níhi ji mɛ.
A wo e nɔ gojoo.
Sisi Ningmahi
^ Aloo “agbosu koli; titimati.”
^ Aloo “Nyɛɛ fia la.”
^ Ngɛ Hebri gbi mi ɔ, “zugba a nɔ tsɛ̃i ɔmɛ.”
