La 49:1-20
Kɛ ha la nɔ hyɛlɔ ɔ. La nɛ Kora binyumu ɔmɛ po.
49 Nyɛ mahi tsuo, nyɛɛ bu nɔ́ nɛ ɔ tue.
Nyɛ nihi tsuo nɛ nyɛ ngɛ je ɔ mi,* nyɛ ta tue,
2 Nimli nɛ a ba si kɛ nimli nɛ a nɔ kuɔ,*Niatsɛmɛ kɛ ohiatsɛmɛ tsuo.
3 Imi nitsɛ ye nya maa tu juɛmi munyuhi,Nɛ níhi nɛ i susuɔ he ngɛ ye tsui mi ɔ maa tsɔɔ kaa i ngɛ nɔ́ sisi numi.
4 Ma bu abɛ tue saminya;Ma fia saku kɛ tsɔɔ ye we ajo ɔ sisi.
5 Mɛni he je nɛ e sa kaa ma ye gbeye ngɛ haomi behi a mi,Ke nihi nɛ a bɔɔ mɔde kaa a ma kpata ye hɛ mi ɔ a ní yayami* ɔmɛ bɔle mi kɛ kpe ɔ?
6 Nihi nɛ a kɛ a hɛ fɔɔ ní nɛ a ná a nɔNɛ́ a kɛ a ní babauu ɔ fĩaa a,
7 A ti nɔ ko be nyɛe ma kpɔ̃ e nyɛmi,Nɛ a ti nɔ ko be nyɛe ma ha Mawu kpɔmi nɔ́ ko ngɛ e nyɛmi he hulɔ,
8 (Kpɔmi nɔ́ nɛ e sa kaa a ha ngɛ a wami* he ɔ he jua wa wawɛɛ,Nɛ a be nyɛe maa wo gblee);
9 Konɛ e hi si kɛ ya neneene nɛ e ko na muɔ* ɔ.
10 E naa kaa juɛmitsɛmɛ po gboɔ;Kuasia kɛ nɔ nɛ susuu we nɔ́ he tsuo a hɛ mi kpataa,Nɛ a jeɔ níhi nɛ a ná a he kɛ haa ni kpahi.
11 Ngɛ a tsui mi ɔ, a suɔ nɛ a we ɔmɛ nɛ hi si kɛ ya neneene,Nɛ a suɔ nɛ a bo tsu ɔmɛ nɛ hi si yi nɔhi tsuo.
A kɛ mɛ nitsɛmɛ a biɛ wo a zugba amɛ.
12 Se adesa nɛ a wo e hɛ mi nyami po be si hie daa;E ngɛ kaa lohwehi nɛ a gboɔ ɔ nɔuu.
13 Blɔ nɛ kuasiahiKɛ nihi nɛ nyɛɛɔ a se, nɛ a bua jɔɔ a yaka munyu ɔmɛ a he ɔ nyɛɛ nɔ ji nɛ ɔ nɛ. (Sela)
14 A ngɔ mɛ kɛ ha Yɔkɔ* kaa jijɔhi nɛ a yaa gbe.
Gbenɔ maa hyɛ a nɔ;Dali maa ye a nɔ mɔtu.
A nɔmlɔ tso ɔ ma puɛ kulaa;Yɔkɔ* maa pee a we mi, se pi matsɛ we.
15 Se Mawu ma kpɔ̃ mi* kɛ je Yɔkɔ* dɛ,Ejakaa e maa gbla mi kɛ ya he nɛ ngɛ slɔkee. (Sela)
16 Koo ye gbeye kaa nɔ ko ngɛ ní babauu náe,Kaa e we mi afɛu níhi ngɛ hiɛe,
17 Ejakaa ke e gbo ɔ, e be nyɛe maa ngɔ nɔ́ ko nɔ́ ko kɛ ya;E hɛ mi nyami ɔ kɛ lɛ be yae.
18 Ejakaa benɛ e ngɛ wami mi ɔ, e jeɔ lɛ nitsɛ e* yi.
(Ke níhi a mi hi ha mo ɔ, nihi jeɔ o yi.)
19 Se nyagbenyagbe ɔ, e ya piɛɛɔ e nɛmɛ ɔmɛ a yi nɔ ɔ he.
A be la nae hu gblegbleegble.
20 Nɔmlɔ nɛ e nui nɔ́ nɛ ɔ sisi ɔ, ke a wo e hɛ mi nyami po,E ngɛ kaa lohwehi nɛ a gboɔ ɔ nɔuu.
Sisi Ningmahi
^ Aloo “níhi a blɔ nya tomi ɔ mi.”
^ Ngɛ Hebri gbi mi ɔ, “Adesahi a bimɛ kɛ nimli a bimɛ tsuo.”
^ Ngɛ Hebri gbi mi ɔ, “tɔmi.”
^ Aloo “klaa.”
^ Aloo “yɔkɔ.”
^ Ngɛ Hebri gbi mi ɔ, “Sheol.” Hyɛ Munyu Komɛ A Sisi Tsɔɔmi.
^ Ngɛ Hebri gbi mi ɔ, “Sheol.” Hyɛ Munyu Komɛ A Sisi Tsɔɔmi.
^ Aloo “ye klaa.”
^ Ngɛ Hebri gbi mi ɔ, “Sheol.” Hyɛ Munyu Komɛ A Sisi Tsɔɔmi.
^ Aloo “e klaa.”
