La 51:1-19
Kɛ ha la nɔ hyɛlɔ ɔ. La nɛ David po benɛ e kɛ Batsheba ná bɔmi ɔ se nɛ gbalɔ Natan ba e ngɔ ɔ.
51 Oo Mawu, naa mi mɔbɔ ngɛ o suɔmi nɛ se pui ɔ nya.
Mo tsu ye tɔmi ɔmɛ ngɛ o mɔbɔ nami babauu ɔ nya.
2 Mo fɔ ye tɔmi ɔ ngɛ ye he kulaa,Nɛ o tsu ye yayami ɔ ngɛ ye he.
3 Ejakaa i le ye tɔmi ɔmɛ saminya,Nɛ ye yayami ɔ ngɛ ye hɛ mi* be fɛɛ be.
4 Mo, mo tutuutu* lɛ i pee yayami kɛ si;Nɔ́ nɛ i pee ɔ ji yayami ngɛ o hɛ mi.
Lɔ ɔ he ɔ, ke o tu munyu ɔ, e da,O kojomi ɔ da.
5 Hyɛ! Tɔmi ngɛ ye he nɛ a kɛ fɔ mi,Nɛ ye nyɛ ngɔ ye hɔ ngɛ yayami mi.*
6 Hyɛ! O bua jɔɔ anɔkuale yemi nɛ ngɛ nɔmlɔ tsui mi ɔ he;Moo tsɔɔ mi ní konɛ ma ná nile tsui.
7 Ngɔɔ hisopo kɛ tsu ye he ngɛ ye yayami ɔ he konɛ ye he nɛ tsɔ;Mo fɔ ye he konɛ ma hiɛ futaa pe snoo.
8 Ha nɛ ma nu ose hemi kɛ nyami he,Konɛ ye wuhi nɛ o ywia a nɛ a nya.
9 Mo je o hɛ ngɛ ye yayami ɔmɛ a he,Nɛ́ o tsu ye tɔmi ɔmɛ tsuo.
10 Oo Mawu, moo bɔ tsui nɛ mi tsɔ ha mi,Nɛ́ o ngɔ mumi ehe, mumi nɛ ma ha nɛ ma pee nɔ́ nɛ da be fɛɛ be* kɛ wo ye mi.
11 Ko sake mi kɛ je o hɛ mi kɛ fɔ he;Nɛ ko je o mumi klɔuklɔu ɔ ngɛ ye nɔ.
12 Ha nɛ ma ná bua jɔmi ngɛ o yi wami hemi ɔ mi ekohu;Ha nɛ ma ná suɔmi ɔ kaa ma bu mo tue.*
13 Nihi nɛ a tɔ̃ɔ ɔ, ma tsɔɔ mɛ o blɔ ɔmɛ,Konɛ yayami peeli nɛ a kpale kɛ ba o ngɔ.
14 Oo Mawu, ye Mawu nɛ heɔ ye yi wami, mo kpɔ mi kɛ je muɔ he fɔ yemi mi,Konɛ ye lilɛ kɛ bua jɔmi nɛ jaje o dami ɔ.
15 Oo Yehowa, mo bli ye nya,Konɛ ye nya nɛ jaje o yi jemi ɔ.
16 Ejakaa o sume afɔle, kaa o suɔ ɔ, jinɛ i ko ha mo;O bua jɔɛ sami afɔle he.
17 Afɔlehi nɛ Mawu bua jɔ he ji mumi nɛ hao;*Oo Mawu, tsui nɛ e kuɔ nɛ e hao ɔ, o be lɛ kuae.
18 Ngɛ o mɔbɔ nami ɔ nya a, moo pee Zion kpakpa;Moo fia Yerusalem gbogbo ɔmɛ.
19 Kɛkɛ ɔ, o bua maa jɔ dami afɔle ɔmɛ,Sami afɔle ɔmɛ, kɛ afɔlehi nɛ a ngɔɔ lɛ tsuo kɛ haa a he;Nɛ a maa sã na kuhi ngɛ o we afɔle sami latɛ ɔ nɔ.
Sisi Ningmahi
^ Aloo “ye juɛmi mi.”
^ Ngɛ Hebri gbi mi ɔ, “mo pɛ.”
^ Aloo “Nɛ i ji yayami peelɔ kɛ je be nɛ ye nyɛ ngɔ ye hɔ.”
^ Aloo “mumi nɛ daa si kpɛii.”
^ Ngɛ Hebri gbi mi ɔ, “Ngɔɔ o suɔmi mumi kɛ ye bua mi.”
^ Ngɛ Hebri gbi mi ɔ, “mumi nɛ kuɔ.”
