La 69:1-36
Kɛ ha la nɔ hyɛlɔ ɔ; a kɛ fɔ̃ “Lili* Mɔmɔ Ɔmɛ.” David la.
69 Oo Mawu, mo he ye yi wami, ejakaa nyu ɔ ngɛ mi* woe kɛ yaa.
2 I pu ngɛ mɔsɔ nɛ mi kuɔ mi, he nɛ zu nɛ he wa be.
I ya je nyu nɛ mi kuɔ mi,Nɛ pa nɛ ngɛ bee babaaba sa mi kɛ ho.
3 I kpã ngmlaa kɛ tsɛ hluu nɛ pɔ tɔ ye he;Ye gbi fĩa.
I hyɛ ye Mawu ɔ blɔ hluu nɛ pɔ tɔ ye hɛngmɛ.
4 Nihi nɛ a nyɛɔ mi yaka gu ɔA he hiɛ babauu pe ye yi bwɔmi.
Nihi nɛ a ngɛ hlae nɛ a gbe mi,Ye he nyɛli nɛ a tsɔɔ nɔ se blɔ ɔ,* a he ba hiɛ babauu.
A nyɛ ye nɔ, nɛ i ngɔ nɔ́ nɛ i ju we kɛ ha.
5 Oo Mawu, o le ye kuasia jemi ɔ,Nɛ ye fɔ yemi ɔ fɔɔ si paa ngɛ o hɛ mi.
6 Zo nɛ ko gbe nihi nɛ a kɛ a hɛ fɔ o nɔ ɔ ngɛ ye he je,Oo Nyɔmtsɛ Matsɛ, Yehowa tabohiatsɛ.
Nihi nɛ hlaa o se blɔ ɔ a hɛ mi nɛ ko pue si ngɛ ye he je,Oo Israel Mawu.
7 A gbeɔ ye he guɛ ngɛ o he je;Ye hɛ mi pue si kpɔtɔɔ.
8 I ba pee nubwɔ kɛ ha ye nyɛminyumu ɔmɛ,Ma se no kɛ ha ye nyɛ binyumu ɔmɛ.
9 Suɔmi nɛ i ngɛ kɛ ha o we ɔ ngɛ kaa la nɛ ngɛ tsoe ngɛ ye mi,O he guɛ nɛ nihi gbeɔ ɔ ba pue ye nɔ.
10 Benɛ i ba ye he si* nɛ i ha hwɔ ɔ,*A gbe ye he guɛ ngɛ lɔ ɔ he je.
11 Benɛ i ngɔ kpekpe kɛ pee ye tade ɔ,I ba pee he fɛu yemi* nɔ́ kɛ ha mɛ.
12 Ye he munyu sɔuu nɛ nihi nɛ a hii si ngɛ ma a gbo ɔ nya a tuɔ,Nɛ imi ji la ngɛ dã tɔli a nya.
13 Se ha ye sɔlemi ɔ nɛ su o ngɔNgɛ be nɛ sa mi, Oo Yehowa.
Ye Mawu, ngɛ o suɔmi babauu nɛ se pui ɔ nya a,Mo he mi nɔ, nɛ o tsɔɔ kaa o ji yi wami helɔ nɛ yeɔ anɔkuale.
14 Mo kpɔ̃ mi kɛ je mɔsɔ ɔ mi;Ko ha nɛ ma pu.
Mo kpɔ̃ mi kɛ je nihi nɛ a nyɛɔ mi ɔ a dɛ,Kɛ nyu nɛ mi kuɔ ɔ mi.
15 Ko ha nɛ nyu babauu nɛ ngɛ bee babaaba a nɛ sa mi kɛ ho,Aloo muɔ voo ɔ nɛ mi mi,Aloo vu* ɔ nɛ nga e nya kɛ wo ye yi.
16 Oo Yehowa, mo he mi nɔ, ejakaa o suɔmi nɛ se pui ɔ hi.
Ngɛ o mɔbɔ nami babauu ɔ nya a, mo plɛ o hɛ nɛ o hyɛ mi,
17 Nɛ koo ngɔ o hɛ mi kɛ laa o sɔmɔlɔ ɔ.
Mo he mi nɔ esɔ, ejakaa i ngɛ haoe.
18 Moo su ye he nɛ o kpɔ̃ mi;*Mo kpɔ̃ mi ngɛ ye he nyɛli ɔmɛ a he je.
19 O le ye he guɛ nɛ a gbeɔ ɔ, kɛ ye zo ɔ, kɛ ye hɛ mi si puemi ɔ.
O naa ye he nyɛli ɔmɛ tsuo.
20 He guɛ gbemi ha nɛ ye tsui kuɔ, nɛ pa a hí tsami.*
I hyɛ blɔ kaa nɔ ko maa na mi mɔbɔ lo, se i nɛ nɔ ko,I hyɛ kaa nɔ ko maa wo ye bua lo, se i nɛ nɔ ko.
21 Se a ha mi duɔ* ngɛ niye ní nane mi,Nɛ a ha mi wai nɛ kuã ke ma nu kɛ gbe kuma.
22 A we okplɔɔ ɔ nɛ pee klama nɛ du mɛ,Nɛ a nɔ yami ɔ nɛ pee klama ha mɛ.
23 Ha nɛ a hɛngmɛ nɔ nɛ wo diblii konɛ a ko hyɛ nɔ́,Nɛ́ a gbongu nɛ mimiɛ be fɛɛ be.
24 Plɛ o we abofu ɔ kɛ pue a nɔ,Nɛ́ o we abofu nɛ nya wa a nɛ ná mɛ.
25 Ha nɛ a sito he* ɔ nɛ pee ma doku;Nɔ ko nɔ ko nɛ ko hi a bo tsu ɔmɛ a mi.
26 Ejakaa a fieeɔ nɔ nɛ o fia lɛ nɔ́ ɔ se,Nɛ a yaa nɔ nɛ a tuɔ nihi nɛ o plaa mɛ ɔ a piimi ɔ he munyu.
27 Ha nɛ a fɔ yemi ɔ nɛ kle agbo,Nɛ́ a ko ná o dami ɔ mi blɔ fa mi nɔ́.
28 Á gbɛ* a biɛ ngɛ hɛ kali a womi* ɔ mi,Nɛ a ko ngma a biɛ kɛ piɛɛ dali a he.
29 Se i hao, nɛ i ngɛ piie.
Oo Mawu, ha nɛ he wami nɛ o kɛ heɔ nɔ yi wami ɔ nɛ po ye he piɛ.
30 Ma la yi jemi lahi kɛ ha Mawu biɛ ɔ,Nɛ i kɛ sina ma wo e nɔ gojoo.
31 Yehowa bua maa jɔ enɛ ɔ he pe na ku,Pe na ku wayoo kɛ e yi mi kolihi kɛ e nane koklotohi.
32 Nihi nɛ a he jɔ ɔ maa na, nɛ a ma nya.
Nyɛ nihi nɛ nyɛ hlaa Mawu se blɔ, nyɛ nɔ gbagba nɛ te.*
33 Ejakaa Yehowa buɔ ohiatsɛmɛ tue,Nɛ e be e nihi nɛ a nuu mɛ nyɔguɛ ɔ kuae.
34 Hiɔwe kɛ zugba nɛ je e yi,Wo kɛ nɔ́ fɛɛ nɔ́ nɛ yaa nɛ baa ngɛ a mi ɔ nɛ je e yi.
35 Ejakaa Mawu ma he Zion yi wami,Nɛ e maa kpale po Yuda ma amɛ,Nɛ a maa hi lejɛ ɔ, nɛ a nine maa su nɔ.*
36 E sɔmɔli ɔmɛ a sisi bimɛ ɔmɛ a nine maa su nɔ,Nɛ nihi nɛ a suɔ e biɛ ɔ maa hi nɔ.
Sisi Ningmahi
^ Aloo “Tɔngɔtofoe.”
^ Aloo “nyu ngɛ ye klaa.”
^ Aloo “Nihi nɛ a nyɛɔ mi yaka gu ɔ.”
^ Aloo “ye klaa.”
^ Baiblo komɛ de ke “Benɛ i fo ya nɛ i ha hwɔ ɔ.”
^ Ngɛ Hebri gbi mi ɔ, “abɛ bumi.”
^ Aloo “muɔ.”
^ Aloo “Moo su ye klaa he nɛ o ngɔ.”
^ Aloo “nɛ ye kɔni mi miɔ nɛ maa wo nyu.”
^ Aloo “tso nɛ duɔ ngɛ mi.”
^ Aloo “sito he nɛ a fia gbogbo wo he.”
^ Aloo “tsu.”
^ Aloo “wami womi.”
^ Ngɛ Hebri gbi mi ɔ, “nyɛ tsui nɛ ná he wami ekohu”
^ Nɛ ji, “zugba a.”
