La 7:1-17
-
Yehowa ji Kojolɔ nɛ da
-
“Oo Yehowa, moo kojo mi” (8)
-
Aywilɛho yemi la nɛ David la ha Yehowa ngɛ Kush nɛ ji Benyaminno ɔ munyu ɔmɛ a he je.
7 Oo Yehowa ye Mawu, o ngɔ lɛ i sa we ngɛ.
Mo he ye yi wami ngɛ nihi tsuo nɛ a waa mi yi mi ɔ a dɛ, nɛ́ o kpɔ̃ mi.
2 Ke pi jã a, a ma tsɔtslɔɔ ye* mi kaa bɔ nɛ jata peeɔ ɔ,Nɛ a maa ngɔ mi kɛ ho, nɛ nɔ ko be mi kpɔ̃e.
3 Oo Yehowa ye Mawu, ke i tɔ̃ ngɛ sane nɛ ɔ mi,Ke i yi dami sane,
4 Ke i tɔ̃ nɔ nɛ peeɔ mi kpakpa a nɔ,Aloo ke i ngɔ ye he nyɛlɔ ní yaka gu ɔ,*
5 Lɛɛ ha nɛ he nyɛlɔ nɛ fiee ye se nɛ e nine nɛ su ye* nɔ;Ha nɛ e naa ye wami nɔ kɛ wo zu mi,Nɛ e ha nɛ ye hɛ mi nyami ɔ nɛ laa ngɛ zu mi. (Sela)
6 Oo Yehowa, tee si ngɛ o mi mi fumi ɔ mi;Moo te si kɛ si ye he nyɛli ɔmɛ a we abofu ɔ;Tee si nɛ o ye bua mi, nɛ́ o hyɛ nɛ a ye dami sane.
7 Ha nɛ je ma amɛ nɛ a bɔle mo kɛ kpe;Nɛ o kɛ mɛ maa to ní kɛ je hiɔwe.
8 Yehowa maa kojo ni ɔmɛ.
Oo Yehowa, moo kojo mi ngɛ ye dami ɔ nya,Kɛ ye we anɔkuale yemi ɔ nya.
9 I kpa mo pɛɛ nɛ o po yiwutsotsɛmɛ a ní yayami ɔmɛ a se.
Se mo ha nɛ dalɔ nɛ pi si,Ejakaa mo ji Mawu nɛ da nɛ e hyɛɛ tsuihi a mi nɛ o naa bɔ nɛ nɔ nuɔ he ha ngɛ e mi tɔɔ.*
10 Mawu ji ye tsɛ̃i, e ji nihi nɛ a da ngɛ a tsui mi ɔ, a Yi Wami Helɔ.
11 Mawu ji Kojolɔ nɛ da,Nɛ Mawu kojoɔ* daa ligbi.
12 Ke nɔ ko pia we e he ɔ, Mawu duɔɔ e klaate ɔ nya;E dɔɔ e kɛ̃ɛ̃ ɔ mi, nɛ e peeɔ lɛ klaalo.
13 E dlaa e ta hwumi níhi nɛ gbeɔ nɔ ɔ;E peeɔ e kɛ̃ɛ̃ mi bi nɛ la ngɛ tsoe ngɛ nya a klaalo.
14 Hyɛ nɔ nɛ ngɔ yi wu tso ní peemi he hɔ ɔ;E ngɔɔ haomi hɔ, nɛ e fɔɔ lakpahi.
15 E tsuaa muɔ, nɛ e haa nɛ e mi kuɔɔ,Se e nɔɔ muɔ ɔ nɛ lɛ nitsɛ e tsua a mi.
16 Haomi nɛ e kɛ baa a kpaa buɔ lɛ nitsɛ e yi;E yi wu tso ní peepee ɔ ma kpa bu lɛ nitsɛ e yi.
17 Ma je Yehowa yi ngɛ e dami sane yemi ɔ he je;Ma la yi jemi lahi* kɛ ha Yehowa, Nɔ Nɛ E Nɔ Kuɔ Pe Kulaa a biɛ ɔ.
Sisi Ningmahi
^ Aloo “ye klaa.”
^ Baiblo komɛ de ke “Nɛ i ngmɛɛ nɔ nɛ teɔ si kɛ woɔ mi yaka gu ɔ he ɔ.”
^ Aloo “ye klaa.”
^ Aloo “hyɛɛ tsuihi kɛ setsomingmɛhi a mi.”
^ Aloo “buɔ nihi fɔ daa ligbi.”
^ Aloo “Ma fia la.”
