La 74:1-23
Maskil.* Asaf la.
74 Oo Mawu, mɛni he je nɛ o kua wɔ kɛ yaa neneene ɔ?
Mɛni he je nɛ o mi mi fu* o tohi nɛ o hyɛɛ a nɔ nɛ a ngɛ o lohwehi a ní yemi he ɔ?
2 Mo kai nihi* nɛ o he mɛ blema lokoo ɔ,Wɛtso nɛ o kpɔ̃ mɛ kaa o weto ní ɔ.
Mo kai Zion Yoku ɔ, he nɛ o hi ɔ.
3 Moo nyɛɛ kɛ ya he nɛ pee ma doku kɛ yaa neneene ɔ.
He nyɛli kpata nɔ́ fɛɛ nɔ́ nɛ ngɛ he klɔuklɔu ɔ hɛ mi.
4 O he nyɛli ɔmɛ huã ngɛ o kpe he ɔ.
A ma mɛ nitsɛmɛ a we aflangaahi kaa okadihi ngɛ lejɛ ɔ.
5 A ngɛ kaa nyumuhi nɛ a wo gbiɛhi kɛ ngɛ tsohi pooe ngɛ hue tso nɛ mi ti mi.
6 A ngɔ gbiɛhi kɛ dade tsohi kɛ ku níhi tsuo nɛ a kpɛ́ ngɛ jami he ɔ.
7 A mɛ o jami he ɔ he la.
A ble bo tsu ɔ nɛ o biɛ ngɛ nɔ ɔ, nɛ a hule lɛ ngɔ pue si.
8 A kɛ a nina de ngɛ a tsui mi ke:
“Á sã Mawu kpe hehi tsuo nɛ* ngɛ zugba a nɔ ɔ.”
9 Wa nɛ okadi ko;Gbalɔ ko be hu,Nɛ wa ti nɔ ko li be abɔ nɛ nɔ́ nɛ ɔ maa ya nɔ.
10 Oo Mawu, kɛ yaa si mɛni be nɛ he nyɛli maa ya nɔ maa hi nɔ ahlua bɔe?
Anɛ he nyɛli be bumi náe kɛ ha o biɛ ɔ kɛ ya neneene lo?
11 Mɛni he je nɛ o je we o nine ɔ? Mɛni he je nɛ o je we o hiɔ nine ɔ?
Mo je o nine ɔ ngɛ o gugue mi* nɛ o kpata a hɛ mi.
12 Mawu ji ye Matsɛ kɛ je blema lokoo,Lɛ ji nɔ nɛ peeɔ yi wami hemi níhi ngɛ zugba a nɔ.
13 O kɛ o he wami ɔ klɛ wo ɔ mi;O ywia wo mi lohwe nguanguahi a yi.
14 O ywia Leviatan* yi;O ngɔ kɛ ha ni ɔmɛ, o ngɔ kɛ ha nihi nɛ a ngɛ nga kplanaa a nɔ ɔ kaa niye ní.
15 O gba blɔhi ha nyu hɛngmɛhi kɛ pahi;O ha nɛ pahi nɛ a beɔ daa a gbli.
16 O níhi ji nyɔ kɛ pia.
Mo lɛ o pee la* kɛ pu.
17 Mo lɛ o to zugba a huzu ɔmɛ tsuo;Mo lɛ o to mawulɛ be kɛ ahlabata be.
18 Oo Yehowa, mo kai ahlua nɛ he nyɛlɔ ɔ bɔɔ mo ɔ,Bɔ nɛ kuasiahi bui o biɛ ɔ ha a.
19 Koo ngmɛɛ o lahuɛ ɔ wami* he kɛ ha lohwe awi yeli.
O hɛ nɛ ko je o we bi nɛ a ngɛ haoe ɔ a wami nɔ kɛ ya neneene.
20 Mo kai somi nɛ o kɛ wɔ so ɔ,Ejakaa hehi nɛ wo diblii ngɛ zugba a nɔ ɔ ba pee awi yeli a hi he.
21 Ko ha nɔ nɛ e kɔni mi jɔ̃ ɔ nɛ kpale kɛ ho kɛ zo;Ha nɛ nɔ nɛ e ní ngɛ mɔbɔ kɛ ohiatsɛ nɛ a je o biɛ ɔ yi.
22 Oo Mawu, tee si nɛ o fã o he.
Mo kai ahlua nɛ kuasiahi bɔɔ mo be fɛɛ be ɔ.
23 O hɛ nɛ ko je níhi nɛ o he nyɛli ngɛ dee ɔ nɔ.
Nihi nɛ a teɔ si kɛ woɔ mo ɔ a hoo peemi ɔ yaa hiɔwe daa.
Sisi Ningmahi
^ Ngɛ Hebri gbi mi ɔ, “nɛ o we abofu ɔ je lasuku kɛ wo.”
^ Ngɛ Hebri gbi mi ɔ, “Mo kai o we asafo ɔ.”
^ Aloo “Á sã hehi tsuo nɛ a jaa Mawu ngɛ.”
^ Aloo “ngɛ o tade ɔ mi.”
^ Aloo “hiɔwe kane.”
^ Aloo “klaa.”
