La 81:1-16
Kɛ ha la nɔ hyɛlɔ ɔ; ngɛ Gitit* nɔ. Asaf la.
81 Nyɛɛ kɛ bua jɔmi nɛ wo nyɛ gbi nɔ kɛ je Mawu nɛ ji wa he wami ɔ yi.
Nyɛ he ose kɛ je Yakob Mawu ɔ yi.
2 Nyɛɛ je la a fiami sisi, nɛ nyɛ wo akasawa,Saku nɛ gbi ngɔɔ ɔ, kɛ kpã saku ɔ.
3 Ngɛ nyɔhiɔ ehe ɔ nɔ ɔ, nyɛ kpa koli ɔ,Ke nyɔhiɔ ɔ wa, nɛ wa gbijlɔ ligbi ɔ su ɔ, nyɛ kpa koli ɔ.
4 Ejakaa e ji blɔ tsɔɔmi kɛ ha Israel,E ji Yakob Mawu ɔ mlaa.
5 E kɛ ma si kaa kaimi nɔ́ kɛ ha YosefBenɛ e* je kpo kɛ ya tua Egipt zugba a.
I nu gbi ko, se i li nɔ nɛ ngɛ munyu ɔ tue. E de ke:
6 “I wo tlomi ɔ ngɛ e konɔ;I ngɔ kɛtɛ* ɔ ngɛ e dɛ.
7 O tsɛ mi ngɛ o haomi mi, nɛ i kpɔ̃ mo;Hiɔwe simi mi* lɛ i je kɛ he mo nɔ.
I ka mo nɛ i hyɛ ngɛ Meriba* nyu ɔmɛ a he. (Sela)
8 Ye we bi, nyɛɛ bu tue, nɛ ma ye odase kɛ si nyɛ.
Oo Israel, i ná nɛ nyɛ bu mi tue.
9 Jinɛ mawu kpa ko be nyɛ kpɛti hie,Nɛ nyɛ be si kplãe ha ma se mawu ko.
10 Imi Yehowa, imi ji nyɛ Mawu ɔ,Nɔ nɛ ngɔ nyɛ kɛ je Egipt zugba a nɔ kɛ ba a nɛ.
Nyɛɛ pã nyɛ nya mi hatoo, nɛ ma ha nɛ e ma hyi tɔ kɛ niye ní.
11 Se ye we bi ɔmɛ bui ye gbi tue;Israel bɛ e he si ha mi.
12 Lɔ ɔ he ɔ, i ha nɛ a nyɛɛ a tsui nɛ kplii ɔ se;A pee nɔ́ nɛ a susu kaa e da.*
13 I ná nɛ ye we bi ɔmɛ bu mi tue,I ná nɛ Israel nyɛɛ ngɛ ye blɔ ɔmɛ a nɔ!
14 Jinɛ i ko ba a he nyɛli ɔmɛ si oya nɔuu;I ko ye a he nyɛli ɔmɛ a nɔ kunimi.
15 Nihi nɛ a nyɛɔ Yehowa a, a he maa do blibliibli ngɛ e hɛ mi,Nɛ nɔ́ nɛ maa ba a nɔ ɔ maa hi si kɛ ya neneene.*
16 Se e maa lɛ mo* kɛ hwiit nɛ hi pe kulaa,*Nɛ e ma ha nɛ o maa tɔ kɛ tɛsa mi hwo.”
Sisi Ningmahi
^ Nɛ ji Mawu.
^ Aloo “kusii.”
^ Ngɛ Hebri gbi mi ɔ, “kɛ je hiɔwe simi laami he ɔ.”
^ E sisi ji, “Pɛ.”
^ Ngɛ Hebri gbi mi ɔ, “A nyɛɛ ngɛ mɛ nitsɛmɛ a ga womihi a nya.”
^ Ngɛ Hebri gbi mi ɔ, “Nɛ a be ɔ se be poe gblegleegble.”
^ Ngɛ Hebri gbi mi ɔ, “e maa lɛ lɛ,” nɛ ji Mawu we bi ɔmɛ.
^ Ngɛ Hebri gbi mi ɔ, “hwiit nɛ wo zɔ.”
