La 89:1-52
Maskil.* Ezrahino Etan la.
89 Níhi nɛ Yehowa peeɔ kɛ jeɔ e suɔmi nɛ e se pui kpo ɔ, ma la kɛ kɔ a he kɛ ya neneene.
I kɛ ye nya ma ha nɛ yi nɔhi tsuo maa le o we anɔkuale yemi ɔ.
2 Ejakaa i de ke: “Suɔmi nɛ se pui maa ma si kɛ ya neneene,*Nɛ o kɛ o we anɔkuale yemi ɔ ma si kpɛii ngɛ hiɔwe.”
3 “I kɛ nɔ nɛ i hla a so somi ko;I kã ye sɔmɔlɔ David kita ke:
4 ‘Ma ngɔ o nina* kɛ ma si kpɛii kɛ ya neneene,Nɛ ma ha nɛ o matsɛ sɛ ɔ maa du si kɛ ya neneene.’”* (Sela)
5 Oo Yehowa, hiɔwe ɔmɛ jeɔ o nyakpɛ ní ɔmɛ a yi,Ee, ni klɔuklɔu ɔmɛ a we asafo ɔ jeɔ o we anɔkuale yemi ɔ yi.
6 Mɛnɔ ngɛ bɔku ɔmɛ a mi nɛ a kɛ lɛ ma nyɛ maa to Yehowa he?
Mɛnɔ ngɛ Mawu binyumu ɔmɛ a kpɛti nɛ e ngɛ kaa Yehowa?
7 A yeɔ Mawu gbeye ngɛ ni klɔuklɔu ɔmɛ a we asafo ɔ mi;E je agbo nɛ e he ngɛ gbeye kɛ ha nihi tsuo nɛ bɔle lɛ ɔ.
8 Oo Yehowa Mawu tabohiatsɛ,Oo Yah, mɛnɔ ngɛ he wami kaa mo?
O we anɔkuale yemi ɔ bɔle mo kɛ kpe.
9 O yeɔ wo nɛ gli ɔ nɔ;Ke e we oslɔke ɔ pee hamahama a, o jɔɔ he.
10 O ye Rahab nɔ, nɛ o gbe lɛ.
O ngɔ o kɔni nɛ he wa a kɛ gbɛ o he nyɛli ɔmɛ kɛ fĩa.
11 O nɔ́ ji hiɔwe ɔmɛ, nɛ o nɔ́ ji zugba a;Zugba a kɛ níhi nɛ ngɛ nɔ ɔ, mo lɛ o to sisi.
12 Yiti je kɛ woyi je ɔ, mo lɛ o bɔ;Tabor kɛ Hermon kɛ bua jɔmi jeɔ o biɛ ɔ yi.
13 O kɔni ngɛ he wami;O nine si wa;A wo o hiɔ nine ɔ nɔ.
14 Dami kɛ dami sane yemi ji o matsɛ sɛ ɔ sisi tomi ɔ;Suɔmi nɛ se pui kɛ anɔkuale yemi daa si ngɛ o hɛ mi.
15 Nihi nɛ a kɛ bua jɔmi jeɔ o yi ɔ ngɛ bua jɔmi.
Oo Yehowa, o hɛ mi la a mi lɛ a nyɛɛɔ ngɛ.
16 A nyaa ngɛ o biɛ ɔ mi ligbi ɔ tsuo,Nɛ a woɔ a nɔ ngɛ o dami ɔ he je.
17 Ejakaa mo ji a hɛ mi nyami kɛ a he wami,Nɛ akɛnɛ o jɔɔ wɔ he je ɔ, wa náa he wami babauu.*
18 Ejakaa Yehowa nɔ́ ji wa tsɛ̃i ɔ nɛ,Israel Nɔ Klɔuklɔu ɔ nɔmlɔ ji wa matsɛ ɔ nɛ.
19 Jamɛ a be ɔ mi ɔ, o kɛ nihi nɛ a yeɔ mo anɔkuale ɔ tu munyu ngɛ nina mi, nɛ o de ke:
“I kɛ he wami dloo he walɔ ko;I wo nɔ ko nɛ i hla lɛ ngɛ ni ɔmɛ a kpɛti ɔ nɔ.
20 I na ye sɔmɔlɔ David;I ngɔ ye nu klɔuklɔu ɔ kɛ pɔ lɛ nu.
21 Ye nine maa ye bua lɛ,Nɛ ye kɔni maa wo lɛ he wami.
22 He nyɛlɔ ko be tó ngɔe ngɛ e dɛ,Nɛ yiwutsotsɛ ko be lɛ yi mi wae.
23 Ma ywia e he nyɛli ɔmɛ wɔtsɔwɔtsɔ kɛ je e hɛ mi,Nɛ ma kpata nihi nɛ nyɛɔ lɛ ɔ a hɛ mi.
24 Ye we anɔkuale yemi kɛ suɔmi nɛ se pui ɔ kɛ lɛ ngɛ,Nɛ a ma wo e he wami* ɔ nɔ ngɛ ye biɛ mi.
25 Ma ngɔ wo ɔ kɛ wo e nine nɔ,*Nɛ ma ngɔ e hiɔ nine kɛ fɔ pa amɛ a nɔ.
26 E ma kpa ngmlaa kɛ de mi ke: ‘Mo ji ye Tsɛ,Ye Mawu kɛ Tesa nɛ heɔ ye yi wami.’
27 Nɛ ma ngɔ lɛ kɛ pee kekleekle bi,Nɔ nɛ e nɔ kuɔ pe kulaa ngɛ zugba a nɔ matsɛmɛ ɔmɛ a kpɛti.
28 Ma ya nɔ nɛ ma je ye suɔmi nɛ se pui ɔ kpo kɛ ha lɛ kɛ ya neneene,Nɛ somi nɛ i kɛ lɛ so ɔ se be poe gblegbleegble.
29 Ma ha nɛ e nina* maa hi si kɛ ya neneene,Nɛ ma ha nɛ e matsɛ sɛ ɔ maa hi si daa kaa hiɔwe ɔmɛ.
30 Ke e bimɛ ɔmɛ je ye mlaa a he,Nɛ a nyɛɛ we ngɛ ye fami* ɔmɛ a nya,
31 Ke a kɛ ye blɔ tsɔɔmi ɔmɛ tsu we ní,Nɛ a yi ye mlaa amɛ a nɔ ɔ,
32 Lɛɛ i kɛ tso maa gbla a tue ngɛ a tue gbomi* ɔ he je,Nɛ ma fiaa mɛ kpa ngɛ a tɔmi ɔ he je.
33 Se i be ye suɔmi nɛ se pui ɔ jee ngɛ e nɔ gblegbleegble,Nɛ ye si womi* ɔ hu, i be hae nɛ e pee lakpa.
34 I be ye somi ɔ se jee,Nɛ i be nɔ́ nɛ ye nya de ɔ hu tsakee.
35 Akɛnɛ i ji nɔ klɔuklɔu he je ɔ, i kã kita si kake nyɔngloo;I be David lakpa yee.
36 E nina* maa hi si kɛ maa ya neneene;E matsɛ sɛ ɔ maa hi si daa kaa pu ngɛ ye hɛ mi.
37 E maa ma si kpɛii kɛ ya neneene kaa nyɔhiɔ,Kaa odasefono anɔkualetsɛ ngɛ bɔku ɔmɛ a mi.” (Sela)
38 Se mo nitsɛ o sake lɛ ngɔ fɔ he, nɛ o kua lɛ;O ná nɔ nɛ o pɔ lɛ nu ɔ he abofu wawɛɛ.
39 O je somi nɛ o kɛ o sɔmɔlɔ ɔ so ɔ se;O ble e matsɛ pɛɛ* ɔ akɛnɛ o sake kɛ fɔ zugba a he je.
40 O ku e tɛ gbogbo* ɔmɛ tsuo kɛ pue si;O ha nɛ e mahi nɛ a fia gbogbo wo a he ɔ pee ma doku.
41 Nihi tsuo nɛ a bee ɔ haa e ní;E kpɔ mi bi ɔmɛ gbeɔ e he guɛ.
42 O ha nɛ e he nyɛli ɔmɛ ye kunimi;*O ha nɛ e he nyɛli ɔmɛ tsuo nya.
43 Jehanɛ hu ɔ, o ha nɛ e klaate ɔ pee yaka,Nɛ o ha nɛ e nyɛ we nɛ e da ta a nya.
44 O ha nɛ e we afɛu ɔ ta,Nɛ o sake e matsɛ sɛ ɔ kɛ fɔ zugba.
45 O po e nihe mi ligbi ɔmɛ a nɔ kpiti;O ha nɛ zo gbe lɛ. (Sela)
46 Oo Yehowa, kɛ yaa si mɛni be nɛ o maa laa o he? Kɛ maa ya neneene lo?
Anɛ o we abofu ɔ maa ya nɔ maa tso kaa la lo?
47 Mo kai kaa ye wami be ɔ ngɛ kpiti!
Anɛ yaka gu nɛ o bɔ adesahi tsuo lo?
48 Adesa te nɛɛ lɛ maa hi si nɛ e be gboe?
Anɛ e ma nyɛ ma he lɛ nitsɛ e* yi wami ngɛ Yɔkɔ* he wami ɔ dɛ lo? (Sela)
49 Oo Yehowa, jije blema níhi nɛ o pee kɛ je suɔmi nɛ se pui kpo ɔ ngɛ,Níhi nɛ o kã David kita ngɛ he ngɛ o we anɔkuale yemi ɔ mi ɔ?
50 Oo Yehowa, mo kai ahlua nɛ a bɔɔ o sɔmɔli ɔmɛ ɔ;Mo kai bɔ nɛ e biɔ nɛ ma da ahlua nɛ nihi tsuo bɔɔ mi ɔ nya ha a;*
51 Oo Yehowa, mo kai bɔ nɛ o he nyɛli ɔmɛ jɛɔ nɔ nɛ o pɔ lɛ nu ɔ ha a;He fɛɛ he nɛ nɔ nɛ o pɔ lɛ nu ɔ maa gu ɔ, a jɛɔ lɛ.
52 A je Yehowa yi kɛ ya neneene. Amen, Amen.
Sisi Ningmahi
^ Aloo “Suɔmi nɛ se pui ɔ maa ma si kpɛii kɛ ya neneene.”
^ Ngɛ Hebri gbi mi ɔ, “ngmɛdu.”
^ Aloo “maa du si yi nɔhi tsuo.”
^ Ngɛ Hebri gbi mi ɔ, “wa koli woɔ e he nɔ.”
^ Ngɛ Hebri gbi mi ɔ, “e koli.”
^ Aloo “Ma ha lɛ he blɔ ngɛ wo ɔ nɔ.”
^ Ngɛ Hebri gbi mi ɔ, “ngmɛdu.”
^ Aloo “kojomi.”
^ Aloo “a we atuã tsɔmi.”
^ Ngɛ Hebri gbi mi ɔ, “ye we anɔkuale yemi.”
^ Ngɛ Hebri gbi mi ɔ, “ngmɛdu.”
^ Aloo “e jlasi.”
^ Aloo “e tɛ tsu.”
^ Ngɛ Hebri gbi mi ɔ, “O wo e he nyɛli ɔmɛ a hiɔ nine nɔ.”
^ Aloo “e klaa.”
^ Ngɛ Hebri gbi mi ɔ, “Sheol.” Hyɛ Munyu Komɛ A Sisi Tsɔɔmi.
^ Ngɛ Hebri gbi mi ɔ, “bɔ nɛ e biɔ nɛ ma hɛɛ ahlua nɛ nihi tsuo bɔɔ mi ɔ ngɛ ye gugue mi ha a.”
