La 9:1-20
Kɛ ha la nɔ hyɛlɔ ɔ; ngɛ Mut Laben* nɔ. La nɛ David po.
א [Alef]
9 Oo Yehowa, i kɛ ye tsui tsuo ma je o yi;Ma jaje o nyakpɛ ní tsumi ɔmɛ tsuo kɛ tsɔɔ.
2 Ma nya, nɛ ma ná bua jɔmi ngɛ o mi;Mo Nɛ O Nɔ Kuɔ Pe Kulaa, ma la yi jemi lahi* kɛ ha o biɛ ɔ.
ב [Bet]
3 Ke ye he nyɛli ɔmɛ kpale a se ɔ,A ma tɛ si, nɛ a hɛ mi ma kpata ngɛ o hɛ mi.
4 Ejakaa o fãa ye he nɛ o yeɔ dami sane ha mi;O hii si ngɛ o matsɛ sɛ ɔ nɔ, nɛ o kojoɔ ngɛ dami nya.
ג [Gimel]
5 O kã je mahi a hɛ mi, nɛ o kpata yiwutsotsɛmɛ a hɛ mi,Nɛ o tsu* a biɛ kulaa kɛ yaa neneene.
6 He nyɛlɔ ɔ hɛ mi kpata kɛ yaa neneene;O hiaa a ma amɛ kɛ a sipoku,Nɛ nɔ́ ko be nɛ a kɛ ma kai mɛ hu.
ה [He]
7 Se Yehowa hii si ngɛ matsɛ sɛ nɔ kɛ yaa neneene;E kɛ e matsɛ sɛ ɔ ma si kpɛii kɛ ha dami sane yemi.
8 E maa kojo nihi nɛ a ngɛ zugba a nɔ ɔ* ngɛ dami nya;E maa kojo je ma amɛ ngɛ dami nya.
ו [Waw]
9 Yehowa maa pee wesa he* nɛ ngɛ slɔkee kɛ ha nihi nɛ a waa mɛ yi mi ɔ,E maa pee wesa he nɛ ngɛ slɔkee ngɛ haomi behi a mi.
10 Nihi nɛ le o biɛ ɔ maa ngɔ a hɛ kɛ fɔ o nɔ;Oo Yehowa, nihi nɛ a hlaa o se blɔ ɔ, o be mɛ kuae gblegbleegble.
ז [Zayin]
11 Nyɛ la yi jemi lahi kɛ ha Yehowa, nɔ nɛ ngɛ Zion ɔ;Nyɛ ha nɛ a le níhi nɛ e pee ɔmɛ ngɛ ni ɔmɛ a kpɛti.
12 Ejakaa nɔ nɛ yeɔ a muɔ he lue ɔ kaiɔ mɛ;E hɛ be nɔ́ nali a ya fomi ɔ nɔ jee.
ח [Het]
13 Oo Yehowa, moo na mi mɔbɔ; moo hyɛ haomi nɛ ye he nyɛli kɛ baa ye nɔ ɔ,Mo nɛ o woɔ ye nɔ kɛ jeɔ gbenɔ agbo ɔmɛ a nya,
14 Konɛ ma jaje níhi nɛ o pee nɛ a sa yi jemi ɔ ngɛ Zion biyo ɔ agbo ɔmɛ a nya,Nɛ́ ma nya ngɛ yi wami hemi níhi nɛ o pee ɔmɛ a mi.
ט [Tet]
15 Je ma amɛ nɔ muɔ nɛ mɛ nitsɛmɛ a tsua a mi;Mɛ nitsɛmɛ a nane du ya nɛ a wo kɛ laa a.
16 Kojomi nɛ Yehowa kojoɔ ɔ lɛ a kɛ le lɛ.
Yiwutsotsɛ nine nya ní tsumi pee klama nɛ du lɛ nitsɛ.
Higayon.* (Sela)
י [Yod]
17 Yiwutsotsɛmɛ maa kpale a se kɛ ya Yɔkɔ mi,*Je ma amɛ tsuo nɛ a hɛ jeɔ Mawu nɔ ɔ maa ya lejɛ ɔ.
18 Se pi daa nɛ nɛ hɛ maa je ohiatsɛmɛ a nɔ;Nɛ nihi nɛ a he jɔ ɔ hu a hɛ kɛ nɔ fɔmi ɔ se be poe gblegbleegble.
כ [Kaf]
19 Oo Yehowa, tee si! Ko ha nɛ nɔmlɔ adesa* nɛ ye kunimi.
Moo kojo je ma amɛ.
20 Oo Yehowa, ha nɛ gbeye nɛ nu mɛ,Ha nɛ je ma amɛ nɛ a le kaa nimli adesahi* kɛkɛ ji mɛ. (Sela)
Sisi Ningmahi
^ Aloo “ma fia la.”
^ Aloo “gbɛ.”
^ Aloo “E maa kojo zugba.”
^ Aloo “he nɛ ya hiɔwe.”
^ Ngɛ Hebri gbi mi ɔ, “Sheol.” Hyɛ Munyu Komɛ A Sisi Tsɔɔmi.
^ Ngɛ Hebri gbi mi ɔ, “adesa nɛ gboɔ ɔ.”
^ Ngɛ Hebri gbi mi ɔ, “adesahi nɛ a gboɔ.”
